ମୁମ୍ବାଇ,୧୪/୦୧: ମନ୍ଥର ଅଭିବୃଦ୍ଧି ଏବଂ ଅନ୍ୟାନ୍ୟ ଆଶଙ୍କା ମଧ୍ୟରେ ଦୁର୍ବଳ ହୋଇଚାଲିଛି ଟଙ୍କା । ଆମେରିକୀୟ ଡଲାର ତୁଳନାରେ ଏହାର ବିନିମୟ ମୂଲ୍ୟ ୮୭ ସ୍ତର ଆଡ଼କୁ ଗଲାଣି । ସପ୍ତାହର ପ୍ରଥମ କାରବାର ଦିବସ ଅର୍ଥାତ୍ ସୋମବାର ଡଲାର ତୁଳନାରେ ୫୭ ପଇସା ଖସିଛି ଟଙ୍କା । ଏହାର ବିନିମୟ ମୂଲ୍ୟ ୮୬.୬୧ ସ୍ତରକୁ ଖସିଯାଇଛି । ଏଯାବତ୍ ଏହା ସବୁଠାରୁ ନିମ୍ନ ସ୍ତର । ଜାନୁଆରୀ ୧୦ରେ ଏହା ୮୬.୦୪ ସ୍ତରରେ ବନ୍ଦ ହୋଇଥିଲା । ଦୁଇବର୍ଷରେ ଟଙ୍କା ମୂଲ୍ୟରେ ସର୍ବବୃହତ୍ ହ୍ରାସ ଘଟିଛି ।
ବିଶେଷଜ୍ଞଙ୍କ ଅନୁସାରେ, ଟଙ୍କା ଦୁର୍ବଳ ହେବା ପଛରେ ଅନେକ କାରଣ ରହିଛି । ଇତିମଧ୍ୟରେ ଭାରତୀୟ ସେୟାର ବଜାରରେ ବିଦେଶୀ ନିବେଶକଙ୍କ ବିପୁଳ ମାତ୍ରାରେ ସେୟାର ବିକ୍ରି ଏହାର ଏକ ପ୍ରମୁଖ କାରଣ । ତା’ସହିତ ଭୁ-ରାଜନୈତିକ ସମସ୍ୟାଗୁଡ଼ିକ ମଧ୍ୟ ଟଙ୍କା ଉପରେ ନକାରାତ୍ମକ ପ୍ରଭାବ ପକାଉଛି । ଟଙ୍କା ମୂଲ୍ୟରେ ହ୍ରାସ ଅର୍ଥାତ୍ ଭାରତ ପାଇଁ ଅନେକ ସାମଗ୍ରୀର ଆମଦାନି ବ୍ୟୟବହୁଳ ହେବ । ଏହାବ୍ୟତୀତ ବିଦେଶ ଭ୍ରମଣ ଏବଂ ବିଦେଶରେ ପାଠପଢ଼ା ବି ମହଙ୍ଗା ହେବ । ପେଟ୍ରୋଲିୟମ ସାମଗ୍ରୀ ଏବଂ ସୁନା ଦାମ ବଢ଼ିବ । ସାମଗ୍ରୀ ଦର ବଢ଼ିବା ସହ ମୁଦ୍ରାସ୍ଫୀତି ଚିନ୍ତା ଆହୁରି ତେଜିବ । ଦେଶରେ ବିଦେଶୀ ନିବେଶ କମିବ ।
ଅନ୍ୟପକ୍ଷରେ, ଟଙ୍କାର ବିନିମୟ ମୂଲ୍ୟ ଖସିବା ଦ୍ୱାରା ବିଦେଶୀ ପର୍ଯ୍ୟଟକଙ୍କ ପାଇଁ ଭାରତ ଭ୍ରମଣ ଶସ୍ତା ହେବ । ଦେଶର ମେଡିକାଲ ପର୍ଯ୍ୟଟନ ଶିଳ୍ପକୁ ଫାଇଦା ମିଳିବ । ବିଦେଶରୁ ଡଲାର ପଠାଇଲେ ଏହାର ଅଧିକ ବଦଳ ମୂଲ୍ୟ ମିଳିବ । ଡିସେମ୍ବରରୁ ଟଙ୍କା ଦରରେ ୨% ହ୍ରାସ ଘଟିଛି । ଆଉ କିଛି ଦିନ ଏହା ଚାପ ମଧ୍ୟରେ ରହିବ ବୋଲି ବିଶେଷଜ୍ଞମାନେ ଆଶଙ୍କା ପ୍ରକାଶ କରିଛନ୍ତି । ବର୍ତ୍ତମାନ ପରିସ୍ଥିତିରେ ଟଙ୍କାକୁ ଟ୍ରାକ୍କୁ ଆଣିବା ପାଇଁ ଆର୍ବିଆଇର ହସ୍ତକ୍ଷେପ ଲୋଡ଼ା । କେନ୍ଦ୍ରୀୟ ବ୍ୟାଙ୍କକୁ ଏହାର ସଂକୁଚିତ ହେଉଥିବା ବୈଦେଶିକ ମୁଦ୍ରା ଭଣ୍ଡାରକୁ ଦେଖିଚାହିଁ ବ୍ୟବହାର କରିବାକୁ ପଡ଼ିବ ବୋଲି ଏମାନେ ମତ ଦେଇଛନ୍ତି । ଦୁର୍ବଳ ଟଙ୍କାକୁ ଟ୍ରାକ୍କୁ ଆଣିବା ପାଇଁ ଆର୍ବିଆଇ ସ୍ପଟ୍ ଏବଂ ଫର୍ୱାର୍ଡ ମାର୍କେଟରେ ଡଲାର ବିକ୍ରି କରୁଛି ।
ସୂଚନାଯୋଗ୍ୟ, ଜାନୁଆରୀ ୩ରେ ଶେଷ ହୋଇଥିବା ସପ୍ତାହରେ ଦେଶର ବୈଦେଶିକ ମୁଦ୍ରା ଭଣ୍ଡାର ୬୩୪୬୦ କୋଟି ଡଲାରକୁ ଖସିଆସିଛି । ବିଶ୍ୱର ପ୍ରାୟ ୮୫% କାରବାର ଆମେରିକୀୟ ଡଲାରରେ ହୋଇଥାଏ । ଏହାକୁ ବିଶ୍ୱର ସବୁଠାରୁ ସ୍ଥିର କରେନ୍ସି ଭାବେ ଗଣନା କରାଯାଇଥାଏ । ବିଶ୍ୱବ୍ୟାପୀ କେନ୍ଦ୍ରୀୟ ବ୍ୟାଙ୍କଗୁଡ଼ିକରେ ଥିବା ବିଦେଶୀ ମୁଦ୍ରା ମଧ୍ୟରେ ୬୪% ଡଲାର ଆକାରରେ ଅଛି । ବିଶ୍ୱବ୍ୟାପୀ ୩୯% ଋଣ ଆମେରିକୀୟ ଡଲାରରେ ଦିଆଯାଇଥାଏ ।
