ହାଇଦ୍ରାବାଦ,୧୨/୦୪: ଶନିବାର ରାତ୍ରି ମ୍ୟାଚ୍ରେ ସନରାଇଜର୍ସ ହାଇଦ୍ରାବାଦ ଘରୋଇ ଗ୍ରାଉଣ୍ଡ୍ରେ ପଞ୍ଜାବ କିଙ୍ଗ୍ସକୁ ଭେଟିବାକୁ ଯାଉଛି । ୪ଟି ମ୍ୟାଚ ହାରି ସାରିଥିବା ଘରୋଇ ସନରାଇଜର୍ସ ବିଜୟ ଧାରାକୁ ଫେରିବା ପାଇଁ ବ୍ୟାକୁଳ । ମାତ୍ର ପଞ୍ଜାବ କିଙ୍ଗ୍ସ ବିଜୟ ଜାରି ରଖିବାକୁ ପ୍ରସ୍ତୁତ । ଫଳରେ ମ୍ୟାଚ୍ଟି ତୀବ୍ର ସଂଘର୍ଷପୂର୍ଣ୍ଣ ହେବା ଆଶା କରାଯାଉଛି । ଉପଲ ଷ୍ଟାଡ଼ିୟମ୍ର ବ୍ୟାଟିଂ ଅନୁକୂଳ ପିଚ୍ରେ ଚୌକା ଓ ଛକା ବର୍ଷାକୁ ମଧ୍ୟ ଅଟକାଇବା କଷ୍ଟକର ହେବ ।
ଗତ ବର୍ଷ ରନର୍ସ ଅପ୍ ହୋଇଥିବା ସନରାଇଜର୍ସ ପ୍ରଥମ ମ୍ୟାଚ୍ରେ ରାଜସ୍ଥାନ ରୟାଲ୍ସକୁ ହରାଇବା ପରେ କ୍ରମାନ୍ୱୟରେ ୪ଟି ମ୍ୟାଚ୍ ହାରି ସାରିଛି । ଦଳର କୌଣସି ରଣନୀତି କାମ ଦେଉ ନାହିଁ । ଗତ ସଜିନର ଆତଙ୍କ ଖେଳାଇଥିବା ଦୁଇ ଦୁର୍ଦ୍ଦର୍ଷ ଓପନର ଟ୍ରେଭିସ୍ ହେଡ୍ ଓ ଅଭିଷେକ ଶର୍ମା ମଧ୍ୟ ଫେଲ ମାରୁଛନ୍ତି । ପଏଣ୍ଟ ତାଲିକାର ଅନ୍ତିମ ସ୍ଥାନରେ ରହିଥିବା ସନରାଇଜର୍ସ ଆଉ ବିଳମ୍ବ ନକରି ବିଜୟ ଧାରାକୁ ଫେରିବାକୁ ଚାହୁଁଛି । ମାତ୍ର ଏହା ପୂର୍ବରୁ ସବୁ ବିଭାଗରେ ଉନ୍ନତି ଆଣିବାକୁ ପଡ଼ିବ । ପ୍ରଥମତଃ ୩୦୦ ରନ୍ ପାର କରିବାର ଯୋଜନାକୁ ଭୁଲି ଅଲ୍ରାଉଣ୍ଡ ପ୍ରଦର୍ଶନ ଉପରେ ଗୁରୁତ୍ୱ ଦେବାକୁ ପଡ଼ିବ । ବ୍ୟାଟରମାନେ ଛକା ମାରିବା ଛାଡ଼ି କ୍ରିଜରେ ଜମିବାକୁ ପ୍ରାଥମିକତା ଦେବେ । ଠିକ୍ ସେହିପରି ବୋଲିଂ ବିଭାଗରେ ସନ୍ତୁଳନ ବଜାୟ ରଖିବାକୁ ହେବ ।
ଶ୍ରେୟାସ ଆୟରଙ୍କ ନେତୃତ୍ୱରେ ପଞ୍ଜାବ କିଙ୍ଗ୍ସ ଚଳିତ ବର୍ଷ ଚମତ୍କାର ପ୍ରଦର୍ଶନ ଜାରି ରଖିଛି । ୪ଟି ମ୍ୟଚ୍ ଖେଳି ପଞ୍ଜାବ କିଙ୍ଗ୍ସ ୩ଟି ବିଜୟ ସହ ପଏଣ୍ଟ ତାଲିକାର ଚତୁର୍ଥ ସ୍ଥାନରେ ରହିଛି । ଆଜର ମ୍ୟାଚ୍ ଜିତିଲେ ଦ୍ୱିତୀୟ କିମ୍ବା ତୃତୀୟ ସ୍ଥାନକୁ ଉନ୍ନୀତ ହୋଇପାରିବ ।
ଆଜି ସମସ୍ତଙ୍କ ନଜର ପ୍ରିୟାଂଶ ଆର୍ଯ୍ୟଙ୍କ ଉପରେ ରହିବ । ପଞ୍ଜାବ କିଙ୍ଗ୍ସର ଏହି ଯୁବ ଓପନର ଗତ ଚେନ୍ନାଇ ସୁପରକିଙ୍ଗ୍ସ ବିପକ୍ଷ ମ୍ୟାଚ୍ରେ ଶତକ ଅର୍ଜନ କରି ରାତା ରାତି ଷ୍ଟାର୍ ହୋଇଯାଇଛନ୍ତି । ଆଇପିଏଲ୍ ଇତିହାସରେ ଦ୍ୱିତୀୟ ଘରୋଇ ଖେଳାଳି ଭାବେ ସେ ଶତକ ଅର୍ଜନ କରିଛନ୍ତି ।
ସନରାଇଜର୍ସ ଅଧିନାୟକ ପ୍ୟାଟ୍ କମିନ୍ସ ଓ ପଞ୍ଜାବ କିଙ୍ଗସ ଅଧିନାୟକ ଶ୍ରେୟାସ ଆୟରଙ୍କ ମଧ୍ୟରେ ଏକ ଲଢେଇ ଦେଖିବାକୁ ମିଳିବ । କମିନ୍ସ ବିଶ୍ୱର ଅନ୍ୟତମ ଶ୍ରେଷ୍ଠ ପେସ୍ ବୋଲର । ୟର ମଧ୍ୟ ଚମତ୍କାର ଫର୍ମରେ ରହିଛନ୍ତି । ତଥାପି ତାଙ୍କୁ ଧୈର୍ଯ୍ୟର ସହ କିଛି ସମୟ ପାଇଁ କ୍ରିଜରେ ଜମିବାକୁ ହେବ । ସନରାଇଜର୍ସର ଦୁଇ ଓପନରଙ୍କ ପ୍ରଦର୍ଶନ ଉପରେ ଦଳର ଭାଗ୍ୟ ନିର୍ଭର କରିବ । ଉଭୟ ଫର୍ମକୁ ଫେରି ଏକ ଉପଯୋଗୀ ଓପନିଂ ଭାଗିଦାରୀ ଗଢି ପାରିଲେ ସନରାଇଜର୍ସ ବିଜୟୀ ହୋଇପାରିବ ।
ଉପଲ ଷ୍ଟାଡ଼ିୟମ ପିଚ୍ ବ୍ୟାଟିଂ ପାଇଁ ବେଶ୍ ଅନୁକୂଳ । ତେଣୁ ବିଶାଳ ସ୍କୋର ସଂଗୃହୀତ ହେବାର ଯଥେଷ୍ଟ ସମ୍ଭାବନା ରହିଛି । ରାତ୍ରିରେ ମ୍ୟାଚ୍ ଥିବାରୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
-:ସମ୍ଭାବ୍ୟ ଦ୍ବାଦଶ:-
ପଞ୍ଜାବ କିଙ୍ଗ୍ସ: ପ୍ରଭସିମରନ ସିଂହ, ପ୍ରିୟାଂଶ ଆର୍ଯ୍ୟ, ଶ୍ରେୟାସ ଆୟର(ଅଧିନାୟକ), ଗ୍ଲେନ ମ୍ୟାକ୍ସୱେଲ୍, ମାର୍କସ ଷ୍ଟଇନିସ୍, ଶଶାଙ୍କ ସିଂହ, ସୂର୍ୟାଂଶ ସେଡଗେ, ମାର୍କୋ ଜାନସେନ, ଲୋକି ଫର୍ଗୁସନ, ଅର୍ଶଦୀପ ସିଂହ, ୟୁଝବେନ୍ଦ୍ର ଚହଲ, ବିଜୟ କୁମାର ବୈଶାଖ/ନେହାଲ ୱଧେରା ।
ସନରାଇଜର୍ସ: ଟ୍ରେଭିସ୍ ହେଡ୍, ଅଭିଷେକ ଶର୍ମା, ଇଶାନ କିଷନ, ନୀତିଶ କୁମାର ରେଡ୍ଡୀ, ହେନରିକ କ୍ଲାସେନ, ଅନିକେତ ବର୍ମା, କାମିଣ୍ଡୁ ମେଣ୍ଡିସ, ପ୍ୟାଟ୍ କମିନ୍ସ(ଅଧିନାୟକ), ଜୀସନ ଅନସାରୀ, ଜୟଦେବ ଉନାକାତ/ହର୍ଷଲ ପଟେଲ, ମହମ୍ମଦ ସାମି, ରାହୁଲ ଚହର ।
