ବ୍ରହ୍ମପୁର,୧୬/୦୬: ପାରିବାରିକ କଳହର କରୁଣ ପରିଣତି l ପତ୍ନୀଙ୍କୁ ହାଣି କ୍ଷତାକ୍ତ କରିବା ପରେ ସ୍ୱାମୀ କଲା ଆତ୍ମହତ୍ୟା l ଗଞ୍ଜାମ ଜିଲ୍ଲା ଧରାକୋଟ ଥାନା ରାମଚନ୍ଦ୍ରପୁର କଇଠିରା ଗ୍ରାମରେ ଘଟିଛି ଅଭାବନୀୟ ଘଟଣା l ପାରିବାରିକ କଳହକୁ କେନ୍ଦ୍ରକରି କାଇଠିରା ଗ୍ରାମର ଏମ. ସୁବାଷ ରେଡ଼ୀ ତାଙ୍କ ପତ୍ନୀ ଏମ. ଯମୁନା ରେଡ଼ୀଙ୍କୁ ଧାରୁଆ ପନିକିରେ ଆକ୍ରମଣ କରିବା ପରେ ସୁବାଷ ନିଜେ ଆତ୍ମହତ୍ୟା କରିଥିବା ଜଣାପଡିଛି l 

ସୂଚନା ଅନୁସାରେ କୌଣସି ଏକ ପାରିବାରିକ କାରଣକୁ ନେଇ ଯମୁନା ଏବଂ ତାଙ୍କ ସ୍ୱାମୀ ସୁବାଷଙ୍କ ମଧ୍ୟରେ ଆଜି ସନ୍ଧ୍ୟାରେ କଥା କଟାକଟି ହୋଇଥିଲା l ପରେ ଏହା ଉଗ୍ର ରୂପ ନେବା ସହ ସୁବାଷ ଘରେ ରହିଥିବା ଗୋଟିଏ ଧାରୁଆ ପନିକିରେ ପତ୍ନୀଙ୍କ ଉପରକୁ ଆକ୍ରମଣ କରିଥିଲେ l ଏହି ଆକ୍ରମଣରେ ଯମୁନାଙ୍କ ବେକ, ମୁଣ୍ଡ, ମୁହଁ, ହାତରେ ଗଭୀର ଆଘାତ ଲାଗିଥିବା ବେଳେ ସେ ଗୁରୁତର ହୋଇ ଘରେ ପଡି ରହିଥିଲେ l ସାହି ପଡୋଶୀ ତାଙ୍କୁ ସେଠାରୁ ଉଧାରକରି ଚିକିତ୍ସା ନିମନ୍ତେ ଆସିକା ଉପଖଣ୍ଡ ଚିକିତ୍ସାଳୟରେ ଭର୍ତି କରିଥିବା ବେଳେ ଏଠାରେ ପ୍ରାଥମିକ ଚିକିତ୍ସା ପରେ ତାଙ୍କୁ ବ୍ରହ୍ମପୁର ସ୍ଥିତ ଏମକେସିଜି ମେଡିକାଲକୁ ସ୍ଥାନାନ୍ତର କରାଯାଇଛି l 

ଅନ୍ୟପଟେ ପତ୍ନୀଙ୍କୁ ଆକ୍ରମଣ ପରେ ସୁବାଷ ନିଜ ବାଡ଼ି ଘରେ ବେକରେ ଗାମୁଛା ଲଗାଇ ଝୁଲି ପଡ଼ିଥିଲେ l ଦୀର୍ଘ ସମୟ ଧରି ସୁବାଷ ଘରୁ ବାହାରକୁ ନଆସିବା କାରଣରୁ ସାହି ପଡୋଶୀ ଘରେ ସୁବାଷଙ୍କୁ ଖୁଲନ୍ତା ଅବସ୍ଥାରେ ରହିଥିବା ଦେଖି ପୋଲିସକୁ ଖବର ଦେଇଥିଲେ l ଧରାକୋଟ ପୋଲିସ ଗ୍ରାମରେ ପହଞ୍ଚି ମୃତଦେହ ଉଧାରକରୀ ଆସିକା ମେଡିକାଲରେ ଭର୍ତି କରିଥିବା ବେଳେ ଏନେଇ ମୃତକଙ୍କ ପୁଅ ଥାନାରେ ଲିଖିତ ଅଭିଯୋଗ ପରେ ପୋଲିସ ଏହାର ତଦନ୍ତ ଚଳାଇଛି l