ଭଞ୍ଜନଗର,୧୬/୬- ସ୍ଥାନୀୟ ଉତ୍ତର ଘୁମୁସର ବନଖଣ୍ଡ ଅଧୀନ ଜଗନ୍ନାଥ ପ୍ରସାଦ ରେଞ୍ଜ ଅଫିସ ଉପରକୁ ବୋମା ମାଡ଼। ଏ ନେଇ ଜଗନ୍ନାଥ ପ୍ରସାଦ ଥାନାରେ ବନ ବିଭାଗ ପକ୍ଷରୁ ଅଭିଯୋଗ କରାଯାଇଛି। ତେବେ ବୋମାମାଡ଼ର କାରଣ ସଂପର୍କରେ ଏଯାଏଁ କୌଣସି ସ୍ପଷ୍ଟ ସୂଚନା ମିଳିପାରିନାହିଁ।
ରେଞ୍ଜ ଅଫିସ ଗେଟ୍ ସାଇଡ଼ରେ ଥିବା ଗୋଦାମ ଘର ଉପରେ ରବିବାର ରାତିରେ ବୋମା ମାଡ଼ ହୋଇଥିଲା। ଏଥିରେ ଗୋଦାମ ଘରର କବାଡ ଉଡି ଯାଇଛି। ଏଠାରେ ଶୋଇଥିବା କିଛି ବୁଲା କୁକୁର ମଧ୍ୟରୁ ଗୋଟିଏ କୁକୁର ମୃତ୍ୟୁ ଘଟିଚି। ତେବେ ଗୋଦାମ ଘରେ କିଛି ଭଙ୍ଗାରୁଜା ସାଇକେଲ ରହିଥିବାରୁ ବାସ୍ତବରେ କିଏ କାହିଁକି ସେହି ଗୋଦାମ ଘର ଉପରକୁ ଟାର୍ଗେଟ କରି ବୋମା ମାଡ଼ କଲା ତାର କାରଣ ଖୋଜା ଚାଲିଛି। ଅପରପକ୍ଷରେ ରେଞ୍ଜ କର୍ମଚାରୀଙ୍କୁ ଭୟଭୀତ କରିବାକୁ ଏଭଳି ବୋମାମାଡ କରାଯାଇଥାଇପାରେ ବୋଲି ମଧ୍ୟ ଆଶଙ୍କା ପ୍ରକାଶ ପାଇଛି। ତେବେ ରବିବାର ବିଳମ୍ବିତ ରାତିରେ ଏଭଳି ଘଟଣା ଘଟିଥିଲେ ମଧ୍ୟ ସୋମବାର ଅପରାହ୍ନରେ ଏନେଇ ଥାନାରେ ଅଭିଯୋଗ କରାଯାଇଛି। ଡିଏଫଓ ବାହାରେ ଥିବା ବେଳେ ଏସିଏଫ୍ ରଶ୍ମି ରଞ୍ଜନ ସ୍ବାଇଁ ଘଟଣାସ୍ଥଳରେ ପହଞ୍ଚି ତଦନ୍ତ କରିଛନ୍ତି। ଅନ୍ୟ ପକ୍ଷରେ ଅଭିଯୋଗ ପାଇବା ପରେ ପୁଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ପରଖିଛି। ତଦନ୍ତ ଜାରି ରହିଛି ବୋଲି ଥାନା ଅଧିକାରୀ ପ୍ରମୋଦ କୁମାର ଲେଙ୍କା ସୂଚନା ଦେଇଛନ୍ତି। ଏ ସଂପର୍କରେ ଡିଏଫଓ ହିମାଂଶୁ ଶେଖର ମହାନ୍ତି ଙ୍କ ସହ ଯୋଗାଯୋଗ କରାଯାଇଥିବା ବେଳେ ସେ ଏହି ଘଟଣାକୁ ଅଧିକ ଗମ୍ଭୀରତାର ସହ ନେଇଥିବା କହିଛନ୍ତି। ରେଞ୍ଜ ଗଠନ ପରଠାରୁ କେବେ ଏଭଳି ଘଟଣା ଘଟିନଥିବା ବେଳେ ଏଭଳି କାହିଁକି ହେଲା ତାର କାରଣ ଖୋଜୁଛି ବନ ବିଭାଗ।
