ଶରୀରକୁ ଖାଦ୍ୟ ଯେତିକି ଆବଶ୍ୟକ ପାଣି ବି ସେତିକି ଜରୁରୀ । ହେଲେ ଶୀତ ଦିନେ ଥଣ୍ଡା ପବନ ଯୋଗୁଁ ଲୋକମାନେ କମ୍ ପାଣି ପିଇଥାନ୍ତି । ଯାହା ସମ୍ପୂର୍ଣ୍ଣ ଭୁଲ୍ । ଖରା ହେଉ କି ଶୀତ ଋତୁ, ପ୍ରତିଦିନ ପର୍ଯ୍ୟାପ୍ତ ପରିମାଣରେ ପାଣି ପିଇବା ନିହାତି ଆବଶ୍ୟକ । ତେଣୁ ଯଦି ଆପଣ କମ୍ ପାଣି ପିଉଛନ୍ତି ତେବେ କଣ ସବୁ ସମସ୍ୟାର ସମ୍ମୁଖୀନ ହେବାକୁ ପଡ଼ିଥାଏ ଆସନ୍ତୁ ଜାଣିବା ।
ଡିହାଇଡ୍ରେସନ: ପ୍ରତ୍ୟେକ ବୟସରେ ଶରୀରରେ ଜଳର ଅଭାବ ଦେଖିବାକୁ ମିଳିଥାଏ । ବିଶେଷକରି ଛୋଟ ପିଲାଙ୍କ ଶରୀରରେ ଜଳାଭାବ ହେଲେ ପାଟି ଓ ଜିଭ ଶୁଖିଯିବା, କାନ୍ଦିଲେ କମ୍ ଲୁହ ବୋହିଲା, ପରିସ୍ରା କମିବା ଭଳି ଲକ୍ଷଣ ନଜର ଆସିଥାଏ । ତେଣୁ ଶୀତ ଦିନେ ବି ପର୍ଯ୍ୟାପ୍ତ ପରିମାଣର ପାଣି ପିଇବା ଆବଶ୍ୟକ ।
ମୁଣ୍ଡବିନ୍ଧା: କମ୍ ପାଣି ପିଉଥିଲେ ମୁଣ୍ଡବିନ୍ଧା ସମସ୍ୟା ବଢିଥାଏ । ଶରୀରରେ ଜଳ ଅଭାବ ଯୋଗୁଁ ମସ୍ତିଷ୍କ କୋଶିକାଗୁଡିକ ସଙ୍କୁଚିତ ହୋଇ ଏହି ସମସ୍ୟା ଦେଖାଯାଏ । ଏଥିସହ ପେଟରେ ଏସିଡ ସୃଷ୍ଟି ହୋଇ ଗ୍ୟାସ୍ କରେ ।
ମୋଟାପା: କମ୍ ପାଣି ପିଇବା ଦ୍ବାରା ମୋଟା ହେବାର ଆଶଙ୍କା ଥାଏ । କାରଣ ଗୋଟିଏ ଦିନରେ ଆମେ କେତେ ଖାଦ୍ୟ ଖାଉ ତା' ଉପରେ ନିର୍ଭର କରି ଶରୀର ପାଇଁ ଆବଶ୍ୟକ ପାଣି ପିଇବା ଉଚିତ୍ । ନହେଲେ ଖାଦ୍ୟ ଭଲରେ ହଜମ ହୋଇନଥାଏ।
ମୁଖ ଦୁର୍ଗନ୍ଧ: କମ୍ ମାତ୍ରାରେ ପାଣି ପିଇଲେ ଗଳା ଓ ପାଟି ଶୁଖିଯାଏ । ଏହାଯୋଗୁଁ ପାଟିରେ ବ୍ୟାକ୍ଟେରିଆ ଜମା ହୋଇ ପାଟିରୁ ଦୁର୍ଗନ୍ଧ ହୋଇଥାଏ । ସେହିପରି ଶରୀରରେ ଜଳ ଅଭାବ ହେଲେ ଝାଳ ବୋହିବା ଓ ପରିସ୍ରା ମଧ୍ୟ କମ୍ ହୋଇଥାଏ ।
ଥକ୍କାପଣ, ଶୁଷ୍କ ତ୍ବଚା:ଶରୀର ସକ୍ରିୟ ଭାବେ କାର୍ଯ୍ୟ କରିବା ପାଇଁ ଜଳ ଆବଶ୍ୟକ । ଜଳର ଅଭାବ ହେଲେ ଟିକିଏ କାମ କରିବା ପରେ ଭାରି ଥକ୍କା ଅନୁଭବ ହୋଇଥାଏ । ସେହିପରି ଜଳାଭାବ ହେତୁ ଚର୍ମ ଶୁଷ୍କ ହୋଇଯିବା, କୁଣ୍ଡେଇ ହେବା, ଡାର୍କ ସର୍କଲ ଓ ଚର୍ମ କୁଞ୍ଚନ ଭଳି ସମସ୍ୟା ଦେଖାଯାଏ ।
