ଭୁବନେଶ୍ୱର,୨୪/୦୧: ରାଜ୍ୟର ସବୁ ଠାରୁ କଡ଼ା ସୁରକ୍ଷାରେ ରହିଛି ରାଜଭବନ । ତେବେ ଏଭଳି କଡ଼ା ସୁରକ୍ଷା ବ୍ୟବସ୍ଥାକୁ ଭେଦ କରି ଚୋରମାନେ ରାଜଭବନ ପରିସରରୁ କାଟି ନେଲେ ୩୦ ଲକ୍ଷ ଟଙ୍କାର ଚନ୍ଦନ ଗଛ । ଏହି ଚୋରି ଘଟଣାକୁ ୨ ବର୍ଷ ବିତିଲାଣି । ହେଲେ ଏପର୍ଯ୍ୟନ୍ତ କ୍ୟାପିଟାଲ୍ ଥାନା ପୁଲିସ୍ କିଛି ଟେର ପାଇନାହିଁ । ପ୍ରକୃତରେ ଚୋର ଧରାପଡି ନାହିଁ ନା ଘର ଚୋର ବୋଲି ଜାଣିଶୁଣି ମାମଲାକୁ ଚାପିଦେଲେ ତାକୁ ନେଇ ପ୍ରଶ୍ନ ଉଠିଛି ।
୨୦୨୨ ନଭେମ୍ବର ମାସରେ ରାଜଭବନ ପରିସରରୁ ୪ଟି ଚନ୍ଦନ ଗଛ ଚୋରି ହୋଇଥିଲା । ପ୍ରତ୍ୟେକ ଗଛର ମୋଟେଇ ୩ରୁ ସାଢ଼େ ୩ ଫୁଟ୍ ଥିଲା । ଚୋରି ହେଲା ପରେ ରାଜଭବନ ପକ୍ଷରୁ କ୍ୟାପିଟାଲ ଥାନାରେ ଏଥଲା ଦିଆଗଲା । ଏହାପରେ ଆରମ୍ଭ ହେଲା ତଦନ୍ତ । ପୁଲିସ୍ ତଦନ୍ତ କରି ସିସିଟିଭି ଯାଞ୍ଚ କଲା । ଏହି ସମୟରେ ଜଣାପଡ଼ିଥିଲା ବାହାର ନୁହେଁ ବରଂ ରାଜଭବନ ଭିତର କର୍ମଚାରୀ ଏହି ଚନ୍ଦନ କାଠ ଚୋରିରେ ସଂପୃକ୍ତ ଅଛନ୍ତି । ପୁଲିସ୍ ସବୁ ଜାଣିଲା । ହେଲେ କ’ଣ ହେଲା କେଜାଣି ଚୋର ଗିରଫ ହେଲାନି କି ଚୋରି ଜିନିଷ ଜବତ ହେଲାନାହିଁ । ସବୁଠାରୁ ବଡ଼ କଥା ହେଲା ରାଜଭବନ ଭିତରେ ଥିବା ବରିଷ୍ଠ ଅଧିକାରୀମାନେ ଘଟଣାର ଅଧିକ ତଦନ୍ତ ନ ହେଉ ବୋଲି ପରୋକ୍ଷରେ ଚାହିଁଥିଲେ । ସେଥିପାଇଁ ପୁଲିସ୍ ଚୁପ୍ ବସି ପଡ଼ିଲା । ଚନ୍ଦନଗଛ ଚୋରି ଏବଂ ତଦନ୍ତରେ ଡୋରି ଲାଗିବା ରାଜଭବନ ପାଇଁ ପ୍ରଥମ ନୁହେଁ । ୧୩ ବର୍ଷ ତଳେ ମଧ୍ୟ ଚନ୍ଦନ ଗଛ ଚୋରି ହୋଇଥିଲା । ଅଭିଯୋଗ ହେଲା, ପୁଲିସ୍ ମାମଲା ରୁଜୁ କରି ତଦନ୍ତ କରି ଚୋର କିଏ ତାର ସନ୍ଧାନ ପାଇଲା । ହେଲେ କିଛି ଅଦୃଶ୍ୟ ଚାପରେ ପୁଲିସ୍ ଚେପା ହୋଇଗଲା । ଚୋର ଧରାପଡ଼ିଲା ନାହିଁ କି ଘଟଣା ପଦାକୁ ଆସିଲାନି । ଲକ୍ଷ ଲକ୍ଷ ଟଙ୍କା ମୂଲ୍ୟର କାଠ ଚୋରି କରି ରାଜଭବନ କର୍ମଚାରୀ ମାଲେମାଲ୍ ହେଛନ୍ତି । ପୁଲିସ୍ ସବୁ ଜାଣି ଚୁପ୍ ରହୁଛି ବୋଲି ଅଭିଯୋଗ ଉଠିଛି ।
