ମୁମ୍ବାଇ,୧୧/୦୧: ଭାରତ ବଜାରରୁ ବିଦେଶୀ ନିବେଶକଙ୍କ ଟଙ୍କା ଉଠାଣ ଟ୍ରେଣ୍ଡ ନୂଆବର୍ଷରେ ବି ଜାରି ରହିଛି । ବର୍ଷର ପ୍ରଥମ ୭ ଦିନରେ ବିଦେଶୀ ସଂସ୍ଥାଗତ ନିବେଶକ(ଏଫ୍ଆଇଆଇ)ମାନେ ଭାରତୀୟ ପୁଞ୍ଜି ବଜାରରୁ ୨୦୦ କୋଟି ଡଲାର ବା ପ୍ରାୟ ୧,୭୧,୭୫,୯୨,୦୦,୦୦୦ ଟଙ୍କା କାଢ଼ି ନେଇଛନ୍ତି । ଆଗାମୀ କିଛି ଦିନରେ କେତେକ ଗୁରୁତ୍ୱପୂର୍ଣ୍ଣ ଘଟଣା ବଜାରକୁ ପ୍ରଭାବିତ କରିପାରେ । ଏଥିପାଇଁ ଭାରତ ବଜାରକୁ ନେଇ ସତର୍କ ରହିଛନ୍ତି ବିଦେଶୀ ନିବେଶକ ।
କମ୍ପାନି ଗୁଡ଼ିକର ତୃତୀୟ ତ୍ରୟମାସିକ ଫଳାଫଳ ପ୍ରକାଶ ପାଇବା ଆରମ୍ଭ ହୋଇଗଲାଣି । ଜାନୁଆରୀ ୨୦ରେ ଡୋନାଲ୍ଡ ଟ୍ରମ୍ପ ଆମେରିକାର ରାଷ୍ଟ୍ରପତି ଭାବେ ଶପଥ ଗ୍ରହଣ କରିବେ । ଜାନୁଆରୀ ୩୧ରେ ଆମେରିକା ଫେଡେରାଲ ରିଜର୍ଭର ବୈଠକ ଥିବାବେଳେ ଫେବ୍ରୁଆରୀ ୧ରେ ଦେଶର ବଜେଟ୍ ଉପସ୍ଥାପନ ହେବ । ଏସବୁ ପୁଞ୍ଜି ବଜାର ଉପରେ ପ୍ରଭାବ ପକାଇବା ସ୍ୱାଭାବିକ । ବଜାର ହ୍ରାସ ବେଳେ ଖୁଚୁରା ନିବେଶକ ସେୟାର କିଣିଚାଲିଛନ୍ତି । ଅନ୍ୟପକ୍ଷରେ ଭାରତୀୟ ସେୟାରରେ ରିସ୍କ ନେବା ପାଇଁ ବିଦେଶୀ ନିବେଶକଙ୍କ ଭୋକ କମିଗଲାଣି ବୋଲି ମନେହୁଏ । ଅନ୍ତର୍ଜାତୀୟ ବ୍ରୋକରେଜ ସଂସ୍ଥା ଏଚ୍ଏସ୍ବିସି ବର୍ଷ ୨୦୨୫ରେ ଭାରତକୁ ‘ନ୍ୟୁଟ୍ରାଲ’ରେ ଡାଉନ୍ଗ୍ରେଡ୍ କରିଥିବା ପ୍ରଥମ ବ୍ରୋକରେଜ୍ କମ୍ପାନି ପାଲଟିଛି । ୨୦୨୫ରେ ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ସୂଚକାଙ୍କ ସେନ୍ସେକ୍ସ ୮୫,୯୯୦ ପଏଣ୍ଟରେ ରହିବ ବୋଲି ଏହା ଅନୁମାନ କରିଛି । ଶୁକ୍ରବାର କାରବାର ଶେଷରେ ସେନ୍ସେକ୍ସରେ ୨୪୧.୩୦ ପଏଣ୍ଟ ହ୍ରାସ ଘଟିଛି । ଫଳରେ ଏହା ୭୭,୩୭୮.୯୧ ପଏଣ୍ଟକୁ ଖସିଆସିଛି । ଅନ୍ୟପକ୍ଷରେ, ନ୍ୟାସ୍ନାଲ ଷ୍ଟକ୍ ଏକ୍ସଚେଞ୍ଜ(ଏନ୍ଏସ୍ଇ) ନିଫ୍ଟି ୯୫ ପଏଣ୍ଟ ଖସି ୨୩,୪୩୧.୫୦ ପଏଣ୍ଟରେ ବନ୍ଦ ହୋଇଛି ।
ବର୍ଷର ପ୍ରଥମ ସପ୍ତାହରେ ପୁଞ୍ଜି ବଜାରରେ ଉତ୍ଥାନ ପତନ ଦେଖିବାକୁ ମିଳିଛି । ବିଦେଶୀ ନିବେଶକ ପୁଞ୍ଜି କାଢ଼ି ନେବାର ଅନେକ କାରଣ ରହିଛି । ଲଗାତର ୪ ବର୍ଷ ଯାଏ ଦୁଇ ଅଙ୍କର ମଜଭୁତ ଅଭିବୃଦ୍ଧି ପରେ ଭାରତୀୟ କମ୍ପାନିଗୁଡ଼ିକର ଆୟରେ ଗତ ୨ଟି ତ୍ରୟମାସରେ ହ୍ରାସ ଦେଖିବାକୁ ମିଳିଛି । ତୃତୀୟ ତ୍ରୟମାସରେ ବି ଆଖିଦୃଶିଆ ସୁଧାର ଆଶା ନାହିଁ । ଏହା ମଧ୍ୟ ବିଦେଶୀ ନିବେଶକଙ୍କୁ ସତର୍କତା ଅବଲମ୍ବନ କରିବାକୁ ବାଧ୍ୟ କରିଛି ।
୨୦୨୪-୨୫ରେ ଦେଶର ମୋଟ ଘରୋଇ ଉତ୍ପାଦ(ଜିଡିପି) ଅଭିବୃଦ୍ଧିକୁ ନେଇ ଭାରତ ସରକାର ନିଜ ଅଗ୍ରିମ ଅନୁମାନରେ କହିଛନ୍ତି ଯେ, ଏହା ମନ୍ଥର ରହିବ । ଆଲୋଚ୍ୟ ଆର୍ଥିକବର୍ଷରେ ଦେଶର ବିକାଶ ହାର ୬.୪% ରହିବା ଅନୁମାନ କରାଯାଇଛି, ଯାହାକି ଗତବର୍ଷ ୮.୨% ଥିଲା । ଯଦି ୬.୪% ଅଭିବୃଦ୍ଧି ହୁଏ ତେବେ ଏହା ହେବ ୪ ବର୍ଷର ସର୍ବନିମ୍ନ ସ୍ତର ।
