କଟକ,୧୮/୦୪: ସବୁଜ ରଂଗର ଗାମୁଛାରେ ଧଳା ରଂଗରେ ଦଳୀୟ ଚିହ୍ନ ଶଂଖ ପ୍ରିଣ୍ଟ୍ ହୋଇଛି । ଏହା ବିଜେଡିର ଉତ୍ତରୀୟ, କୁହାଯାଇପାରେ ପରିଚୟ । ପୁଣି ବିଜେପି ପାଇଁ ଗେରୁଆ ରଙ୍ଗର ବିଭିନ୍ନ ପ୍ରକାରର ଧଡ଼ି ବିଶିଷ୍ଟ ଉତ୍ତରୀୟ ବା ଗାମୁଛା ରହିଛି । ସେମିତି କଂଗ୍ରେସ ଦଳ ପାଇଁ ଧଳା ରଙ୍ଗର ବିଭିନ୍ନ ପ୍ରକାରର ଗାମୁଛା ବଜାରରେ ବିକ୍ରି ହେଉଛି । ଏବେ ବିଭିନ୍ନ ଦଳର ନିର୍ବାଚନ ପ୍ରଚାର ବେଳେ ସମସ୍ତଙ୍କ ବେକରେ ଦେଖିବାକୁ ମିଳୁଛି ଏମିତିକା ଦଳୀୟ ପ୍ରତୀକ ସାଜିଥିବା ଉତ୍ତରୀୟ ବା ଗାମୁଛା । କେବଳ କଟକ ନୁହେଁ ସାରା ରାଜ୍ୟରେ ଏବେ ନିର୍ବାଚନ ବେଳେ ଆଶାୟୀ ପ୍ରାର୍ଥୀଙ୍କଠାରୁ ଆରମ୍ଭ କରି ସମର୍ଥକଙ୍କ ବେକରେ ଦଳୀୟ ଗାମୁଛା ଦେଖିବାକୁ ମିଳୁଛି । ଏହାକୁ ଦୃଷ୍ଟିରେ ରଖି କଟକ ସହରରେ ଥିବା ହୋଲ୍ସେଲ୍ କପଡା ବ୍ୟବସାୟୀମାନେ ଏବେ ସହର ସମେତ ସହର ବାହାରେ ଦୈନିକ ହଜାର ହଜାର ଗାମୁଛା କାରବାର କରୁଥିବା ଜଣାପଡିଛି ।
ପାର୍ବଣ ହେଉ କି କୌଣସି ଉତ୍ସବ ବା କାର୍ଯ୍ୟକ୍ରମ, ସବୁଠି ଅତିଥିଙ୍କୁ ଉତ୍ତରୀୟ ବା ଗାମୁଛା ଦେଇ ସ୍ୱାଗତ କରାଯିବା କଟକର ଏକ ପରମ୍ପରା । କଟକିଆଙ୍କ ପାଇଁ ଗାମୁଛା ପରମ୍ପରାର ପ୍ରତୀକ, ସ୍ୱାଗତ ସମ୍ବର୍ଦ୍ଧନାର ନିଦର୍ଶନ ସହ ଏକ ପ୍ରକାରର ସୌକ୍ ବି । ସେଥିପାଇଁ ଦେବୀ ଭସାଣିରେ ପ୍ରତି ପୂଜା କମିଟି ଭିନ୍ନ ଭିନ୍ନ ରଙ୍ଗର ଗାମୁଛା ବେକରେ ପକାଇ ଶୋଭାଯାତ୍ରାରେ ଯାଇଥାନ୍ତି । ଏହି ଠାଣି ଏବେ ରାଜନୀତିରେ ବି ଦେଖିବାକୁ ମିଳୁଛି । ବିଭିନ୍ନ ଦଳର ଆଶାୟୀ ପ୍ରାର୍ଥୀ ଓ ସେମାନଙ୍କ ସମର୍ଥକମାନେ ନିଜ ନିଜ ଦଳୀୟ ପ୍ରତୀକ ଉତ୍ତରୀୟ ବା ଗାମୁଛାକୁ ବେକରେ ପକାଇ ବୁଲି ବୁଲି ପ୍ରଚାର ଓ ଭୋଟ୍ ଭିକ୍ଷା କରୁଥିବା ଦେଖିବାକୁ ମିଳୁଛି । ବିଜେଡି ପାଇଁ ସବୁଜ ଓ ଧଳା ମିଶା ଗାମୁଛାରେ ବିଜେଡି ଲେଖା ସହିତ ଶଙ୍ଖ ଚିହ୍ନର ପ୍ରିଣ୍ଟ୍ ରହିଛି । ସେହିଭଳି ବିଜେପି ଓ କଂଗ୍ରେସର ସ୍ୱତନ୍ତ୍ର ରଂଗ । ଯଦିଓ ଏହି ଗାମୁଛା ପ୍ରତ୍ୟହ ବିକ୍ରି ହୋଇଥାଏ ଏବେ କିନ୍ତୁ ନିର୍ବାଚନ ଓ ଶ୍ରୀରାମ ନବମୀ ଥିବାରୁ ଅଧିକ ପରିମାଣରେ ବଜାରରେ ବିକ୍ରି ହେଉଛି ।
ଏହାକୁ ଦୃଷ୍ଟିରେ ରଖି କଟକ ଝୋଲାସାହି, ନନ୍ଦି ସାହି, ପିଠାପୁର ଓ ଚୌଧୁରୀ ବଜାରରେ ଥିବା ୨ ଶହରୁ ଅଧିକ ହୋଲ୍ସେଲ୍ ବ୍ୟବସାୟୀ ଦୈନିକ ହଜାର ହଜାର ଗାମୁଛା ବିକ୍ରି କରୁଛନ୍ତି । କଟକ ସମେତ କେନ୍ଦ୍ରାପଡା, ଯାଜପୁର, ଚଣ୍ଡିଖୋଲ ଆଦି ସ୍ଥାନକୁ ମଧ୍ୟ କଟକରୁ ଗାମୁଛା ଯାଉଛି । ଅଧିକ ଚାହିଦା ଥିବାରୁ ବ୍ୟବସାୟୀମାନେ ତାମିଲନାଡୁ, ଉତ୍ତରପ୍ରଦେଶ, ଖୋର୍ଦ୍ଧା ଓ ସମ୍ବଲପୁର ଆଦି ସ୍ଥାନରୁ ଭିନ୍ନ ରଂଗ, ପ୍ରକାରର ଗାମୁଛା ଆଣୁଛନ୍ତି । ଯାହାର ମୂଲ୍ୟ ସର୍ବନିମ୍ନ ୧୫ ଟଙ୍କାରୁ ଆରମ୍ଭ କରି ୪୦୦ ଟଙ୍କା ପର୍ଯ୍ୟନ୍ତ ରହିଛି । ଏ ନେଇ ଝୋଲାସାହି ସ୍ଥିତ ଶ୍ରୀ ମା ତାରିଣୀ କ୍ଲଥ୍ ଷ୍ଟୋର୍ର ମ୍ୟାନେଜର ଜୟ କ୍ରିଷ୍ଣା ଶର୍ମା କହିଛନ୍ତି, ତାଙ୍କ ଦୋକାନରେ ପାଖାପାଖି ୨ ଶହରୁ ଅଧିକ ଭେରାଇଟି ଓ ରଙ୍ଗର ଗାମୁଛା ରହିଛି । ଏବେ କିନ୍ତୁ ଦଳୀୟ ବ୍ରାଣ୍ଡ୍ ବିଶିଷ୍ଟ ଗାମୁଛା ଅଧିକ ବିକ୍ରି ହେଉଛି । ଅନେକ ନେତା ଅର୍ଡର୍ କରି ପ୍ରିଣ୍ଟ୍ କରାଇ ଗାମୁଛା ନେଇ ସାରିଥିଲା ବେଳେ ଏବେ ବି ଅର୍ଡର ଚାଲିଛି । ସାଧାରଣ ଦିନ ଅପେକ୍ଷା ଏବେ ଦୁଇ ଗୁଣା କାର୍ବାର ହେଉଥିବା ସେ କହିଛନ୍ତି ।
Also Read :-