ନୂଆଦିଲ୍ଲୀ,୦୪/୦୮: ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀଙ୍କ ଦେହାନ୍ତ । ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ବାପା ତଥା ପୂର୍ବତନ ମୁଖ୍ୟମନ୍ତ୍ରୀ ଶିବୁ ସୋରେନଙ୍କ ପରଲୋକ । ୮୧ ବର୍ଷ ବୟସରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ଏ ନେଇ ସୂଚନା ଦେଇଛନ୍ତି ପୁଅ ହେମନ୍ତ ସୋରେନ୍ । ଦୀର୍ଘ ଦିନ ଧରି ସେ ଅସୁସ୍ଥ ଥିଲେ । କିଡନୀ ଜନିତ ରୋଗରେ ପୀଡିତ ଥିଲେ । ଦେଢ଼ ମାସ ତଳେ ତାଙ୍କୁ ଷ୍ଟ୍ରୋକ୍ ଆସିଥିଲା । ଏକ ମାସ ଧରି ଦିଲ୍ଲୀ ସାର୍ ଗଙ୍ଗା ରାମ୍ ହସ୍ପିଟାଲରେ ଲାଇଫ୍ ସପୋର୍ଟରେ ଥିଲେ । ଆଜି ସକାଳ ୮ଟା ୫୬ମିନିଟ୍ରେ ଶିବୁ ସୋରେନଙ୍କୁ ଡାକ୍ତର ମୃତ ଘୋଷଣା କରିଥିଲେ । ବାପା ବିୟୋଗରେ ଭାଙ୍ଗି ପଡ଼ିଛନ୍ତି ପୁଅ ହେମନ୍ତ ସୋରେନ୍ । ତାଙ୍କ ମୁଣ୍ଡ ଉପରୁ ବାପାଙ୍କ ହାତ ଚାଲିଯାଇଛି । ଏକ୍ସରେ ସେ କହିଛନ୍ତି, ''ଆଦରଣୀୟ ଗୁରୁଜୀ ଆଜି ଆମକୁ ଛାଡ଼ି ଚାଲି ଯାଇଛନ୍ତି । ଆଜି ମୁଁ ଶୂନ୍ୟ ହୋଇଗଲି।'' ଶିବୁ ସୋରେନ୍ଙ୍କ ବିୟୋଗରେ ଶୋକବ୍ୟକ୍ତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
आदरणीय दिशोम गुरुजी हम सभी को छोड़कर चले गए हैं।
— Hemant Soren (@HemantSorenJMM) August 4, 2025
आज मैं शून्य हो गया हूँ...
୩୮ ବର୍ଷ ଧରି ଶିବୁ ସୋରେନ୍ ଝାଡ଼ଖଣ୍ଡ ମୁକ୍ତି ମୋର୍ଚ୍ଚାର ପ୍ରମୁଖ ନେତା ରହିଥିଲେ । ଦଳର ସଂସ୍ଥାପକ ସଂରକ୍ଷଣ ରୂପରେ ଜଣାଶୁଣା ଥିଲେ । ୧୯୪୪ ଜାନୁଆରୀ ୧୧ରେ ହଜାରିବାଗରେ ଶିବୁ ସୋରେନ୍ ଜନ୍ମ ଗ୍ରହଣ କରିଥିଲେ । ଆଦିବାସୀଙ୍କ ଉପରେ ହେଉଥିବା ଶୋଷଣ ବିରୋଧରେ ସଂଗ୍ରାମ କରିଥିଲେ । ୭୦ ଦଶକରେ 'ଘନକଟନୀ ଆନ୍ଦୋଳନ' ଏବଂ ଅନ୍ୟ ଆନ୍ଦୋଳନ ଜରିଆରେ ଆଦିବାସୀ ସମାଜର ସ୍ୱର ହୋଇଥିଲେ । ବିହାରରୁ ଝାଡ଼ଖଣ୍ଡକୁ ଅଲଗା ରାଜ୍ୟ କରିବାରେ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ଥିଲା । ତିନି ଥର ୨୦୦୫, ୨୦୦୮ ଓ ୨୦୦୯ରେ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହୋଇଥିଲେ । ହେଲେ ଥରେ ବି ସମ୍ପୂର୍ଣ୍ଣ କାର୍ଯ୍ୟକାଳ ପୂରଣ କରିନଥିଲେ ।
ୟୁପିଏର ପ୍ରଥମ କାର୍ଯ୍ୟକାଳରେ କୋଇଲା ମନ୍ତ୍ରୀ ଥିଲେ ଶିବୁ ସୋରେନ୍ । କେନ୍ଦ୍ରୀୟ ମନ୍ତ୍ରୀମଣ୍ଡଳରୁ ଇସ୍ତଫା ଦେବାକୁ ପଡ଼ିଥିଲା । ବାପା ଶୋଭରାମ ସୋରେନ୍ଙ୍କ ହତ୍ୟା ପରେ ଶିବୁ ସୋରେନ୍ ରାଜନୀତିରେ ପ୍ରବେଶ କରିଥିଲେ । ୧୯୭୭ରେ ପ୍ରଥମ ଥର ଲୋକସଭା ନିର୍ବାଚନ ଲଢିଥିଲେ । ହେଲେ ପରାସ୍ତ ହୋଇଥିଲେ । ୧୯୮୦ରେ ତାଙ୍କୁ ସଫଳତା ମିଳିଥିଲା । ଏହାପରେ ୧୯୮୬, ୧୯୮୯, ୧୯୯୬ ନିର୍ବାଚନରେ ବି ବିଜୟ ହାସଲ କରିଥିଲେ । ୨୦୦୪ରେ ଡୁମକା ଲୋକସଭା ପାଇଁ ଚୟନ ହୋଇଥିଲେ । ୮ଥର ଲୋକସଭା ସାଂସଦ, ୩ ଥର ରାଜ୍ୟସଭା ସାଂସଦ ନିର୍ବାଚିତ ହୋଇଥିଲେ ।
ଶିବୁ ସୋରେନ୍ଙ୍କ ହେଦାନ୍ତରେ ବହୁ ବିଶିଷ୍ଟ ବ୍ୟକ୍ତି ଶୋକ ପ୍ରକାଶ କରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, ''ଶିବୁ ସୋରେନ୍ ଜୀ ଜଣେ ତୃଣମୂଳ ସ୍ତରର ନେତା ଥିଲେ ଯିଏ ଲୋକଙ୍କ ପ୍ରତି ଅଟଳ ସମର୍ପଣ ସହ ପଦ ପଦବୀଠୁ ଉର୍ଦ୍ଧ୍ୱରେ । ସେ ଆଦିବାସୀ ସମ୍ପ୍ରଦାୟ, ଗରିବ ଏବଂ ଦଳିତମାନଙ୍କୁ ସଶକ୍ତ କରିବା ପାଇଁ ବିଶେଷ ଭାବରେ ଆଗ୍ରହୀ ଥିଲେ । ତାଙ୍କ ବିୟୋଗରେ ମୁଁ ମର୍ମାହତ । ତାଙ୍କ ପରିବାର ସହିତ ମୋର ସମବେଦନା ।''
PM Narendra Modi tweets, "Shibu Soren Ji was a grassroots leader who rose through the ranks of public life with unwavering dedication to the people. He was particularly passionate about empowering tribal communities, the poor and downtrodden. Pained by his passing away. My… pic.twitter.com/iD2T4ZE7kd
— ANI (@ANI) August 4, 2025
ସେହିପରି କେନ୍ଦ୍ର ପ୍ରତିରକ୍ଷାମନ୍ତ୍ରୀ ଶୋକ ପ୍ରକାଶ କରି କହିଛନ୍ତି, ''ପୂର୍ବ ମୁଖ୍ୟମନ୍ତ୍ରୀ ଶିବୁ ସୋରେନ୍ ଦେଶର ବରିଷ୍ଠତମ ନେତାଙ୍କ ମଧ୍ୟରୁ ଜଣେ ଥିଲେ । ସେ ସମାଜର ଦୁର୍ବଳ ଶ୍ରେଣୀର ଲୋକଙ୍କ ପାଇଁ କାମ କରୁଥିଲେ । ଜନଜାତି ସମାଜର ଅଧିକାର ଏବଂ ସେମାନଙ୍କ ସଶକ୍ତିକରଣ ପାଇଁ ଜୀବନ ତମାମ ସଂଘର୍ଷ କରିଛନ୍ତି । ସେ ସର୍ବଦା ମାଟି ଏବଂ ମଣିଷଙ୍କ ସହ ଜଡ଼ିତ ଥିଲେ । ମୋର ତାଙ୍କ ସହିତ ଦୀର୍ଘ ଦିନର ସମ୍ପର୍କ ରହିଛି । ତାଙ୍କ ବିୟୋଗ ଖବରରେ ମୁଁ ମର୍ମାହତ । ତାଙ୍କ ପରିବାର ଏବଂ ସମର୍ଥକଙ୍କ ପ୍ରତି ମୋର ସମବେଦନା ।''
