ମାଲକାନଗିରି /ଚିତ୍ରକୋଣ୍ଡା,୮/୧୨ : ମାଓବାଦୀ ଲିଡର ହିଡ଼ମା ଓ ତାଙ୍କ ସହଯୋଗୀ ନାମରେ ଟଙ୍କା ଆଦାୟ କରୁଥିବା ଅଭିଯୋଗରେ ଚିତ୍ରକୋଣ୍ଡା ପୁଲିସ ୫ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଏ ନେଇ ମାଲକାନଗିରି ଡିଏସପି ଲକ୍ଷ୍ମୀଧର ସ୍ୱାଇଁ ଓ ଚିତ୍ରକୋଣ୍ଡା ଆଇଆଇସି ମୁକୁନ୍ଦ ମେଲକା ମିଳିତ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
ସୂଚନା ଅନୁଯାୟୀ ଚିତ୍ରକୋଣ୍ଡା ଥାନା ଅନ୍ତର୍ଗତ ବଡ଼ପଦର ପଞ୍ଚାୟତର ନାଏବ ସରପଞ୍ଚ ଭକ୍ତରାମ ଶୀଶା ଚିତ୍ରକୋଣ୍ଡା ଥାନାରେ ଏହି ମାସ ୩ ତାରିଖରେ ଅଭିଯୋଗ କରିଥିଲେ । ଏହାପରେ ଚିତ୍ରକୋଣ୍ଡା ପୋଲିସ ଏହା ଉପରେ ପଦକ୍ଷେପ ନେଇ ଭକ୍ତରାମଙ୍କ ଅଭିଯୋଗ ଆଧାରରେ ମନ ପାଙ୍ଗି (୪୬), ଏମ ନାରାୟଣ((୩୧), ଜଗୁ ହନ୍ତାଳ(୫୨), ବିନୋଦ ଜେନା(୩୧), ଉମାକାନ୍ତ ମାଧେଭି(୨୫) ୫ଜଣଙ୍କୁ ଥାନାକୁ ଆଣିଥିଲା । ସେମାନଙ୍କୁ ପଚରାଉଚରା ପରେ ପୋଲିସ ସେମାନଙ୍କୁ ଗିରଫ କରିଥିଲା । ଏହି ପାଞ୍ଚ ଜଣଙ୍କ ମଧ୍ୟରୁ ତିନି ଜଣ ବଡ଼ ପଦର ଅଞ୍ଚଳର ସ୍ଥାନୀୟ ଲୋକ ଏବଂ ଆଉ ଦୁଇ ଜଣ ମାଲକାନଗିରିର ଅଟନ୍ତି।
ସେମାନଙ୍କ ନିକଟରୁ ଗୋଟିଏ ବନ୍ଧୁକ, ମୋବାଇଲ ୩ଟି ଜବତ କରାଯାଇଛି। ଏହି ୫ଜଣ ମିଶି ଲୋକଙ୍କଠାରୁ ମାଓବାଦୀ ଲିଡର ହିଡ଼ମାର ସହଯୋଗୀ ନାମରେ ଟଙ୍କା ଆଦାୟ, ଶୋଷଣ ଓ ପ୍ରଜକୋର୍ଟରେ ଜୀବନରେ ମାରି ଦେବାକୁ ଦମକ ଦେଇ ଭୟଭୀତ କରିଥିଲେ । ନାୟବ ସରପଞ୍ଚ ଓ ଜଣେ ସାମ୍ବାଦିକଙ୍କୁ ପ୍ରଜାକୋର୍ଟରେ ଡାକି ଜୀବନରୁ ମାରି ଦେବାକୁ ଧମକ ଦେଇଥିଲେ । ଆଜି ଏହି ପାଞ୍ଚ ନ କଲି ମାଓବାଦୀଙ୍କୁ ଚିତ୍ରକୋଣ୍ଡା ପୋଲିସ ଗିରଫ କରିଛି ଓ ତାଙ୍କଠାରୁ ଏକ ବନ୍ଧୁକ, ମାଓବାଦୀ ଚିଠି, ୩ଟି ମୋବାଇଲ ଜବତ କରି ଚିତ୍ରକୋଣ୍ଡା ଥାନାରେ କେଶ ନମ୍ବର ୨୦୪/୨୪ ଅନୁଯାୟୀ କେସ ରୁଜୁ କରି କୋର୍ଟ ଚାଲାଣ କରିଛି ।
