ଚନ୍ଦନେଶ୍ବର, ୬/୭( ଆ.ପ୍ର) ସମୁଦ୍ରକୁ ମାଛ ଧରିବାକୁ ଯାଉଥିବା ବେଳେ ଡଙ୍ଗାରୁ ଖସିପଡି ଜଣେ ମତ୍ସ୍ୟଜୀବୀଙ୍କ ମୃତ୍ୟୁ ଘଟିଛି। ମୃତ ମତ୍ସ୍ୟଜୀବୀ ଜଣକ ବାଲେଶ୍ବର ଜିଲ୍ଲା ଭୋଗରାଇର କୀର୍ତନିଆ ଗାଁର ଭୀମ ଚରଣ ବଢେଇଙ୍କ ପୁଅ ଜଗନ୍ନାଥ ବଢେଇ(୪୯) ।
ନାରାୟଣ ମହାନ୍ତି ପଡିଆ ପଂଚାୟତ ଅଧୀନ କୀର୍ତନିଆ ଗାଁର ଜଗନ୍ନାଥ ବଢେଇ ସମୁଦ୍ରରୁ ମାଛଧରି ଜୀବିକା ନିର୍ବାହ କରନ୍ତି । ରବିବାର ସକାଳେ ଅନ୍ୟ ୪ ଜଣ ମତ୍ସ୍ୟଜୀବୀଙ୍କ ସହିତ ନିଜ ଡଙ୍ଗାରେ କୀର୍ତନିଆ ଜେଟିରୁ ସମୁଦ୍ରକୁ ମାଛ ଧରିବାକୁ ବାହାରି ଥିଲେ । ଜେଟି ଠାରୁ ଅଳ୍ପ ଦୂର ସମୁଦ୍ରର ଏକ ଲହଡ଼ି ମାଡ଼ରେ ବୋଟଟି ଦୋହଲି ଯିବାରୁ ସେ ତଳକୁ ଖସି ପଡିଥିଲେ । ସାଥୀରେ ଥିବା ଅନ୍ୟମାନେ ତାଙ୍କୁ ଉଦ୍ଧାର କରି ତୁରନ୍ତ ଜଳେଶ୍ଵରପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଏହି ଖବର ଭୋଗରାଇର ମତ୍ସ୍ୟଜୀବୀ ଓ ସ୍ଥାନୀୟ ଅଂଚଳରେ ଶୋକର ଛାୟା ଖେଳାଇ ଦେଇଛି ।
ଘରେ ରୋଗିଣା ସ୍ତ୍ରୀ,ଜଣେ ଝିଅ ଓ ନାବାଳକ ପୁଅଟିଏ । ଏଭଳି ପରିସ୍ଥିତିରେ ପରିବାର ପ୍ରତି ପୋଷଣ ଚିନ୍ତା ସମସ୍ତଙ୍କ ଆଖିରୁ ନିଦ ହଜାଇ ଦେଉଛି । ପୂର୍ବତନ ଜିଲ୍ଲା ପରିଷଦ ସଦସ୍ୟ ପ୍ରଦୀପ ବେହେରା, ନାରାୟଣ ମହାନ୍ତି ,ପଡିଆ ସରପଂଚ ରାଧାରାଣୀ ବେହେରା, ସମିତି ସଦସ୍ୟ ବିଶ୍ଵନାଥ ଗିରି ଏବଂ ଗାଁବାସୀ ତାଙ୍କ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ଦାବୀ କରିଛନ୍ତି ।
