ନୂଆଦିଲ୍ଲୀ : ଦିଲ୍ଲୀରେ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ଏକ ମନ୍ଦିରରେ ନିଆଁ ଲାଗିବା ଯୋଗୁଁ ଜଣେ ପୂଜାରୀ ଜୀବନ୍ତ ଜଳି ଯାଇଛନ୍ତି। ପୁଲିସ ମନ୍ଦିରରେ ଜଳୁଥିବା ହିଟରରୁ ନିଆଁ ଲାଗିବାର ଆଶଙ୍କା କରିଛନ୍ତି। ସୂଚନା ଆଧାରରେ, ଦିଲ୍ଲୀର ରୋହିଣୀରେ ଶନିବାର ଏକ ମନ୍ଦିରରେ ନିଆଁ ଲାଗିବା ଦ୍ୱାରା ୬୫ ବର୍ଷର ପୂଜାରୀ ଜଳି ଯାଇଛନ୍ତି। ତାଙ୍କୁ ହସ୍ପିଟାଲ ନିଆ ଯାଇ ଥିଲା , ସେଠାରେ ଡାକ୍ତର ତାଙ୍କୁ ମୃତ ଘୋଷିତ କରିଥିଲେ। ପୁଲିସ ଅନୁସାରେ, ମୃତକ ଜଣଙ୍କ ହେଉଛନ୍ତି ପଣ୍ଡିତ ବନୱାରୀ ଲାଲ୍ ଶର୍ମା।
ପୁଲିସ କହିଛି ଯେ, ଶନିବାର ପ୍ରେମ୍ ନଗର ଥାନାକୁ ସୂର୍ଯ୍ୟ ମନ୍ଦିରରେ ନିଆଁ ଲାଗିବାର ସୂଚନା ଦେବାର ଏକ ପିସିଆର କଲ୍ ଆସି ଥିଲା। ପୁଲିସ୍ ଟିମ୍ ଦମକଳ ବିଭାଗ ସହ ଘଟଣା ସ୍ଥଳରେ ପହଞ୍ଚି ଥିଲା। ଅଗ୍ନିଶମ ବାହିନୀ ନିଆଁକୁ କାବୁ କରିଛି , କିନ୍ତୁ ପୂଜାରୀ ଶର୍ମା ଭିତରେ ବେହୋସ୍ ଭାବେ ଉଦ୍ଧାର ହୋଇ ଥିଲେ। ତାଙ୍କୁ ତୁରନ୍ତ ସଞ୍ଜୟ ଗାନ୍ଧୀ ମେମୋରିଆଲ ହସ୍ପିଟାଲ ନିଆ ଯାଇଥିଲା, ସେଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରି ଥିଲେ।
ପ୍ରାରମ୍ଭିକ ଯାଞ୍ଚରୁ ଜଣାପଡ଼ିଛି ଯେ, ଘର ଭିତରେ ଚାଲୁ ଥିବା ହିଟର କାରଣରୁ ନିଆଁ ଲାଗି ଥାଇ ପାରେ। ଅଧିକାରୀମାନେ ୪ ସାକ୍ଷ୍ୟଙ୍କ ବୟାନ ରେକର୍ଡ କରିଛନ୍ତି, ଯେଉଁଥିରେ ଶର୍ମାଙ୍କ ପରିବାର ଦୁଇ ସଦସ୍ୟ, ଜଣେ ପଡୋଶୀ ଓ ଅଗ୍ନିକାଣ୍ଡର ସୂଚନା ଦେଇଥିବା ଲୋକ ସାମିଲ ଅଛନ୍ତି। ଏଥିରୁ କେହି ବି ଘଟଣା ବିଷୟରେ କୌଣସି ସନ୍ଦେହ କରି ନାହାନ୍ତି।
ପୁଲିସ୍ କହିଛି କି, ନିଆଁ ଲାଗିବାର ସଠିକ୍ କାରଣ ଏବେସୁଦ୍ଧା ଜଣାପଡ଼ି ନାହିଁ। ପୁଲିସ ଓ ଫରେନ୍ସିକ ଟିମ୍ ଘଟଣା ସ୍ଥଳର ଯାଞ୍ଚ କରୁଛି। ଜଣେ ବରିଷ୍ଠ ଅଧିକାରୀ କହିଛନ୍ତି, ଆମେ ସବୁ ସମ୍ଭାବିତ ଦିଗକୁ ନେଇ ଯାଞ୍ଚ କରୁଛୁ, କିନ୍ତୁ ଏବେସୁଦ୍ଧା କୌଣସି ବାହାର ବ୍ୟକ୍ତିଙ୍କ ସଂପୃକ୍ତିର କୌଣସି ପ୍ରମାଣ ମିଳି ନାହିଁ। ମାମଲାର ଯାଞ୍ଚ ଚାଲୁ ରହିଛି।
