ନୂଆଦିଲ୍ଲୀ,୧୪/୦୬: ଏଫ୍ଆଇଏଚ୍ ପ୍ରୋ ଲିଗ୍ରେ ଆଜି ଭାରତୀୟ ପୁରୁଷ ଓ ମହିଳା ଦଳ ଅଷ୍ଟ୍ରେଲିଆକୁ ଭେଟିବେ । ପୁରୁଷ ଦଳ ନେଦରଲାଣ୍ଡସ ଓ ଆର୍ଜେଣ୍ଟିନା ଠାରୁ ପରାସ୍ତ ହେବା ପରେ ଅଷ୍ଟ୍ରେଲିଆ ବିପକ୍ଷରେ ପ୍ରଥମ ବିଜୟ ଲକ୍ଷ୍ୟରେ ରହିଛି । ଭାରତୀୟ ମହିଳା ଦଳ ୟୁରୋପ ଗସ୍ତରେ ଆଜି ଅଷ୍ଟ୍ରେଲିଆ ବିପକ୍ଷରେ ବିଦେଶ ମାଟିରେ ପ୍ରୋ ଲିଗ୍ ଅଭିଯାନ ଆରମ୍ଭ କରିବାକୁ ଯାଉଛି । ମ୍ୟାଚଟି ଲଣ୍ଡନରେ ଖେଳାଯିବ ।
ପୁରୁଷ ଦଳ
ଭାରତ ଏ ପର୍ଯ୍ୟନ୍ତ ସିଜନରେ ୧୨ଟି ମ୍ୟାଚ୍ ଖେଳି ସାରିଲାଣି । କିନ୍ତୁ ଦଳ ମାତ୍ର ୧୫ ପଏଣ୍ଟ ହାସଲ କରିବାରେ ସଫଳ ହୋଇଛି । ମାତ୍ର ୫ଟି ମ୍ୟାଚ୍ରେ ଜିତି ପାରିଛି । ବିଦେଶରେ ନେଦରଲାଣ୍ଡସ ବିପକ୍ଷରେ ଅଭିଯାନ ଆରମ୍ଭ କରିଥିଲା । ଉଭୟ ମ୍ୟାଚ୍ରେ ଦଳ ନେଦରଲାଣ୍ଡସ ଠାରୁ (୨-୨, ୩-୨ ଗୋଲ) ପରାଜିତ ହୋଇଥିଲା । ସେମିତି ଆର୍ଜେଣ୍ଟିନା ଠାରୁ ଯଥାକ୍ରମେ ୪-୩ ଏବଂ ୨-୧ ଗୋଲରେ ପରାସ୍ତ ହୋଇଥିଲା ।
ଭାରତ ଆସନ୍ତା ୧୪ ଓ ୧୫ ତାରିଖରେ ଅଷ୍ଟ୍ରେଲିଆକୁ ଭେଟିବ । ଆର୍ଜେଣ୍ଟିନା ବିପକ୍ଷ ଦ୍ୱିତୀୟ ମ୍ୟାଚ୍ରେ ଭାରତ ପ୍ରଥମେ ଗୋଲ ଖାତା ଖୋଲିଥିଲା ଖେଳର ଚତୁର୍ଥ ମିନିଟରେ ଦଳକୁ ପେନାଲ୍ଟି କର୍ଣ୍ଣର ମିଳିଥିଲା। ଯୁଗରାଜ ସିଂ ଏହି ଗୋଲଟି ଦେଇଥିଲେ । ନବମ ମିନିଟ୍ରେ ଆର୍ଜେଣ୍ଟିନାକୁ ପେନାଲ୍ଟି କର୍ଣ୍ଣର ମିଳିଥିଲା । ଟୋମାସ ଡୋମେନ ଗୋଲ୍ ଦେଇ ସ୍ଥିତି ବରାବର କରିଥିଲେ । ଦ୍ୱିତୀୟ ଓ ତୃତୀୟ କ୍ୱାର୍ଟର ଖେଳ ପ୍ରବଳ ସଂଘର୍ଷପୂର୍ଣ୍ଣ ହୋଇଥିଲା । ଅନ୍ତିମ କ୍ୱାର୍ଟରରେ ଆର୍ଜେଣ୍ଟିନା ଏକ ପେନାଲ୍ଟି କର୍ଣ୍ଣର (୪୯ ମିନିଟ) ପାଇଥିଲା । ଡୋମେନ ଏହି ଗୋଲ୍ ଦେଇ ଦଳକୁ ୨-୧ରେ ଅଗ୍ରଣୀ କରାଇଥିଲେ । ଭାରତୀୟ ଖେଳାଳି ବହୁ ପ୍ରୟାସ କରି ମ୍ୟାଚ ବଞ୍ଚାଇବାକୁ ଉଦ୍ୟମ କରିଥିଲେ । କିନ୍ତୁ ସଫଳ ହୋଇପାରି ନଥିଲେ । କ୍ରମାନ୍ୱୟରେ ଦଳ ୪ଟି ମ୍ୟାଚ୍ ହାରିବା ଯୋଗୁ ପଏଣ୍ଟରେ କୌଣସି ବୃଦ୍ଧି ହୋଇନି । ଫଳରେ ଭାରତ ଟେବୁଲର ପଞ୍ଚମ ସ୍ଥାନକୁ ଖସି ଆସିଛି । ଟେବୁଲରେ ପ୍ରଥମ ଓ ଦ୍ୱିତୀୟ ସ୍ଥାନରେ ରହିପାରିଲେ ଦଳ ଆଗାମୀ ବିଶ୍ୱକପ୍କୁ ଦଳ ସିଧାସଳଖ ଯୋଗ୍ୟତା ହାସଲ କରିପାରନ୍ତା ।
ମହିଳା ଦଳ
ଭାରତୀୟ ମହିଳା ଦଳ ଘରୋଇ ଗ୍ରାଉଣ୍ଡରେ ୮ଟି ମ୍ୟାଚ୍ ଖେଳି ମାତ୍ର ୯ ପଏଣ୍ଟ ପାଇଛି । ୨ଟି ଦଳ ଜିତିବାରେ ସଫଳ ହୋଇଛି । ବିଦେଶରେ ଅଷ୍ଟ୍ରେଲିଆ ବିପକ୍ଷରେ ଅଭିଯାନ ଆରମ୍ଭ କରିବ । ଅଷ୍ଟ୍ରେଲିଆ ଭଳି ଶକ୍ତିଶାଳୀ ଦଳକୁ ସାମ୍ନା କରିବ । ପ୍ରଥମ ମ୍ୟାଚ୍ ଆସନ୍ତାକାଲି ଏବଂ ଦ୍ୱିତୀୟ ମ୍ୟାଚ୍ ୧୫ ତାରିଖରେ ଖେଳାଯିବ । ଏହାପରେ ୧୭ ଓ ୧୮ରେ ଆର୍ଜେଣ୍ଟିନା, ୨୧ ଓ ୨୨ରେ ବେଲଜିୟମ ଏବଂ ୨୮ ଓ ୨୯ରେ ଚୀନକୁ ଭେଟିବା ପରେ ଦଳର ସିଜନ ଶେଷ ହେବ । ସଲିମା ଟେଟେଙ୍କ ନେତୃତ୍ୱରେ ଦଳ ଭଲ ପ୍ରଦର୍ଶନ କରିବ ବୋଲି ଆଶା ରହିଛି ।
