ତେଲକୋଇ,୩୦/୦୭: ଥମୁନି ହାତୀ ଉପଦ୍ରବ। ଦନ୍ତା ନେଲା ଜୀବନ । ଦନ୍ତା ହାତୀ ଆକ୍ରମଣରେ ବୃଦ୍ଧାଙ୍କ ମୃତ୍ୟୁ ହୋଇଛି । ଘରେ ଶୋଇଥିବା ବେଳେ ବୃଦ୍ଧାଙ୍କୁ ହାତୀପଲ ବାହାରକୁ ଘୋଷାଡି ନେଇ ଦଳିଦେଇଛି । କେନ୍ଦୁଝର ଜିଲ୍ଲା ବନଖଣ୍ଡ ତେଲକୋଇ ବନାଞ୍ଚଳର କାଳିଆହତା ଫରେଷ୍ଟ ସେକ୍ସନ ଗଳଦା ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି । ମୃତକ ଜଣକ ୬୦ ବର୍ଷୀୟା ବନିତା ମାଝୀ । ଏନେଇ ଖବରପାଇ ତେଲକୋଇ ବନ ବିଭାଗ ଓ କାଳିଆହତା ଫାଣ୍ଡି ଅଧିକାରୀ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରୁଛନ୍ତି ।
ସୂଚନା ମୁତାବକ, ଉକ୍ତ ଅଞ୍ଚଳରେ ଦୀର୍ଘଦିନ ହେଲା ୯ ଟିକିଆ ହାତୀପଲ ଡେରା ପକାଇ ଉପଦ୍ରବ ଚଳାଇଛନ୍ତି । ମଙ୍ଗଳବାର ବିଳମ୍ବିତ ରାତିରେ ହାତୀପଲ ଖାଦ୍ୟ ଅନ୍ୱେଷଣରେ ଗଳଦା ଗ୍ରାମକୁ ପଶି ଆସିଥିଲେ । ଅସହାୟ ବନିତା ମାଝୀଙ୍କ ଘରକୁ ଭାଙ୍ଗି ଧାନ ଚାଉଳ ଖାଇବା ସହିତ ବନିତାଙ୍କୁ ଶୁଣ୍ଢରେ ଟେକି ନେଇ ଦଳି ମାରି ଦେଇଛି । ହେଲେ ପାଖରେ ଶୋଇଥିବା ନାତୁଣୀ ଅଳ୍ପକେ ବର୍ତ୍ତି ଯାଇଛନ୍ତି । ଅନ୍ୟପଟେ ସ୍ଥାନୀୟ ଲୋକେ ଘଟଣା ସମ୍ପର୍କରେ ବନ ବିଭାଗକୁ ଜଣାଇଥିଲେ ସୁଦ୍ଧା କର୍ମଚାରୀମାନେ ବିଳମ୍ବରେ ପହଞ୍ଚିଥିଲେ । ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ସେପଟେ ହାତୀ ଘଉଡେଇବାରେ ବନ ବିଭାଗ ଫେଲ୍ ମାରିଥିବା ଅଭିଯୋଗ କରିଛନ୍ତି ଗ୍ରାମବାସୀ । ଲୋକଙ୍କୁ ସୁରକ୍ଷା ମଧ୍ୟ ଦେଇ ପାରୁନାହାନ୍ତି । ଗଳଦା ଗାଁରେ ଗତକାଲି ବନ ବିଭାଗ ହାତୀ ସମ୍ପର୍କରେ କୌଣସି ସୂଚନା ଦେଇନଥିଲା ବୋଲି ଅଭିଯୋଗ ହୋଇଛି ।
