ମୁମ୍ବାଇ: ମହାରାଷ୍ଟ୍ର ମୁଖ୍ୟମନ୍ତ୍ରୀ କିଏ ହେବେ ସେନେଇ ସସ୍‌ପେନ୍ସ ଲାଗି ରହିଥିବା ବେଳେ ଏକନାଥ ସିନ୍ଦେ ଆଜି ନିଜ ଗାଁକୁ ଯାଇଛନ୍ତି । ଦୁଇଟି ବଡ଼ ବୈଠକ ବାତିଲ ହେବା ପରେ ସିନ୍ଦେ ନିଜ ଗାଁ ସତାରା ଚାଲି ଯାଇଛନ୍ତି । ଏହା ପରେ ରାଜନୈତିକ ଚର୍ଚ୍ଚା ଆରମ୍ଭ ହୋଇଯାଇଛି । ଏହା ପୂର୍ବରୁ ଗୁରୁବାର ଦେବେନ୍ଦ୍ର ଫଡ଼ନାଭିସ ଏବଂ ଅଜିତ ପାଓ୍ବାରଙ୍କ ସମେତ ଏକନାଥ ସିନ୍ଦେ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ଭେଟିଥିଲେ । 

 ବିଧାନସଭା ନିର୍ବାଚନରେ ବିଜେପିର ବୃହତ୍ତ ବିଜୟ ପରେ ମହାରାଷ୍ଟ୍ର ସରକାର ଗଠନ ନେଇ ଫର୍ମୁଲା ଦିଲ୍ଲୀରେ ଧାର୍ଯ୍ୟ ହୋଇଛି ବୋଲି କୁହାଯାଉଛି । ଅମିତ ଶାହ ଏବଂ ବିଜେପିର ରାଷ୍ଟ୍ରୀୟ ସଭାପତି ଜେପି ନଡ୍ଡାଙ୍କ ସହ ସରକାର ଗଠନକୁ ନେଇ ସକରାତ୍ମକ ଆଲୋଚନା ହୋଇଛି ବୋଲି ଶୁକ୍ରବାର କହିଛନ୍ତି ସିନ୍ଦେ ।  ଏସବୁ ଭିତରେ ବିଜେପିର ବିଧାୟକ ଦଳ ନେତା ଚୟନ ହେବା ପରେ ମହାୟୁତି ବୈଠକ ଅନୁଷ୍ଠିତ ହେବ ବୋଲି କୁହାଯାଉଛି । 

 ଗାଁକୁ ଯିବା ପୂର୍ବରୁ ସିନ୍ଦେ କହିଛନ୍ତି, ମହାରାଷ୍ଟ୍ରର ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ହେବେ ସେନେଇ ଦିନେ କିମ୍ବା ଦୁଇ ଦିନ ମଧ୍ୟରେ ଘୋଷଣା କରାଯିବ ।  ଏନେଇ ଆଲୋଚନା ଜାରି ରହିଛି । ନିଷ୍ପତ୍ତି ଯାହ ହେବ ସେନେଇ ଜଣାଇ ଦିଆଯିବ । ଏହା ପୂର୍ବରୁ ପ୍ରଧାନମନ୍ତ୍ରୀ  ମୋଦୀଙ୍କ ନିଷ୍ପତ୍ତିକୁ ବିରୋଧ କରିବେ ନାହିଁ ବୋଲି ସିନ୍ଦେ ସ୍ପଷ୍ଟ କରିଥିଲେ । ସେପଟେ ଲଡକା ଭାଉ (ପ୍ରିୟର ଭାଇ) ପଦବୀ ମୋ ପାଇଁ ଅନ୍ୟ କୌଣସି ପଦବୀ ଠାରୁ ବଡ଼ ବୋଲି କହିଛନ୍ତି ଏକନାଥ ସିନ୍ଦେ ।