ଭୁବନେଶ୍ୱର,୧୪/୦୬: ସେରୋ ପ୍ରପର୍ଟିଜ୍, ଦୁବାଇ ପକ୍ଷରୁ ଓଡ଼ିଶା ଓମେନ୍ ଇନ୍ ଦୁବାଇ(ଓଡବ୍ଲୁଡି) ସହଯୋଗରେ ଦୁବାଇର ବର୍ ଦୁବାଇ ଅଞ୍ଚଳରେ ଥିବା ମୋଭେନ୍ପିକ୍ ହୋଟେଲରେ ରଜ ଉତ୍ସବ-୨୦୨୫ ମହାଆଡ଼ମ୍ବରରେ ପାଳିତ ହୋଇଛି । ଏଥିରେ ୬୦୦ରୁ ଊଦ୍ଧ୍ୱର୍ ପ୍ରବାସୀ ଓଡ଼ିଆ ସାମିଲ ହୋଇ ଓଡ଼ିଶାର ଏହି ପାରମ୍ପରିକ ଉତ୍ସବକୁ ଆନନ୍ଦ ଉଲ୍ଲାସର ସହ ପାଳନ କରିଥିଲେ । ସେରୋ ପ୍ରପର୍ଟିଜ୍ ଏକ ଦୁଇ ଭିତ୍ତିକ ରିଅଲ ଏଷ୍ଟେଟ୍, ଯାହାକି ଅନିଲ ଦାସ ଓ ଶୀତଲ ଯୋଶୀଙ୍କ ଦ୍ୱାରା ପ୍ରତିଷ୍ଠିତ । ବ୍ୟବସାୟିକ ଓ ସାଂସ୍କୃତିକ ଦୃଷ୍ଟିକୋଣକୁ ଦୃଷ୍ଟିରେ ରଖି ସେରୋ ପ୍ରପର୍ଟିଜ୍ ପ୍ରବାସୀ ଓଡ଼ିଆ ସମୁଦାୟକୁ ଶକ୍ତିଶାଳୀ କରିବା ପାଇଁ ଏଭଳି ବିଭିନ୍ନ ମଞ୍ଚ ସୃଷ୍ଟି କରିଛି । କାର୍ଯ୍ୟକ୍ରମରେ ବିଶିଷ୍ଟ ଇମାରାତି ବ୍ୟବସାୟୀ ଡା. ବୁ ଅବ୍ଦୁଲ୍ଲା ମୁଖ୍ୟ ଅତିଥି ଓ ଡା.ଚିଦାତ୍ମିକା ଖଟୁଆ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ । କାର୍ଯ୍ୟକ୍ରମକୁ ଅଧିକ ଆକର୍ଷଣୀୟ କରିଥିଲେ ଟ୍ରାଇବାଲ କୁଇନ୍ ୱାର୍ଲ୍ଡ-୨୦୨୫ ପୂଜା ଲାକ୍ରା, ଅନ୍ତର୍ଜାତୀୟ ନୃତ୍ୟଶିଳ୍ପୀ ଗୁରୁ ସାସ୍ୱତ ଯୋଶୀ, ପ୍ରସିଦ୍ଧ ଓଲିଉଡ୍ ଫ୍ୟାସନ ଡିଜାଇନର ଜୀତ୍ ଜଗଜୀତ ଓ ଚଳଚ୍ଚିତ୍ର ଅଭିନେତା ରାଜ ମହାପାତ୍ର ।
ସନ୍ଧ୍ୟାର ମୁଖ୍ୟ ଆକର୍ଷଣ ଥିଲା ‘ଓଡ଼ିଆରାଇଜ୍’ର ଆଧାରିକ ଉନ୍ମୋଚନ, ଯାହାର ଥିମ୍ ଥିଲା ‘ରୁଟେଡ୍ ଇନ୍ ଓଡ଼ିଶା, ଗ୍ରୋଇଙ୍ଗ୍ ଗ୍ଲୋବାଲୀ’। ବିଶ୍ୱର କୋଣ ଅନୁକୋଣରେ ଥିବା ଓଡ଼ିଆମାନେ ଏହି ନେଟ୍ୱର୍କ ମାଧ୍ୟମରେ ଯୋଗାଯୋଗ କରି ସହଯୋଗ ଓ ପରିଚୟ ବୃଦ୍ଧି କରିପାରିବେ। ଏହି ଅବସରରେ ଅନିଲ ଦାସ କହିଲେ, ସେରୋ ପ୍ରପର୍ଟିଜ୍ ୨୦ଟି ଦେଶର ୨୧ରୁ ଅଧିକ ଓଡ଼ିଆ ସମୁଦାୟ ସହ ସଂଯୁକ୍ତ । ଓଡ଼ିଆରାଇଜ ମାଧ୍ୟମରେ ଓଡ଼ିଆମାନେ ସଂଯୁକ୍ତ, ସଶକ୍ତ ଓ ଉନ୍ନତ ହେବେ ।
ଡା. ବୁ ଅବ୍ଦୁଲ୍ଲା କହିଲେ, ଏହି କାର୍ଯ୍ୟକ୍ରମ ଏକ ସାଂସ୍କୃତିକ ଉତ୍ସବ ନୁହେଁ, ଏହା ଗୋଟିଏ ଆନ୍ଦୋଳନ । ଓଡବ୍ଲୁଡିର ସଂସ୍ଥାପକ ସଦସ୍ୟ ରାଜେଶ୍ୱରୀ ସାହୁ କହିଲେ ଯେ ଓଡବ୍ଲୁଡି ଏକ ଦୃଢ଼ ଓ ଗର୍ବିତ ଓଡ଼ିଆ ମହିଳା ସମୂଦାୟ ଗଠନ କରିବା ଲକ୍ଷ୍ୟରେ ଆରମ୍ଭ ହୋଇଥିଲା । ସେରୋ ପ୍ରପର୍ଟିଜର ସହଯୋଗ ଆମ ସ୍ୱପ୍ନକୁ ସାକାର କରିଛି । କାର୍ଯ୍ୟକ୍ରମରେ ସହଯୋଗ ପାଇଁ ଓଡ଼ିଶା ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗକୁ ଧନ୍ୟବାଦ ଦିଆଯାଇଛି । ଏଥିହସ ନୱା ଗ୍ରୁପ୍ ଓଡ଼ିଶାର ସଂସ୍ଥାପକ ବିଜୟଲକ୍ଷ୍ମୀ ତ୍ରିପାଠୀ, ସିଦ୍ଧାର୍ଥ ମହାପାତ୍ର, ଡାନ୍ୟୁବ୍ ପ୍ରପର୍ଟିଜ୍ ଓ ଡାନ୍ୟୁବ୍ ହୋମ୍ର ପ୍ରତିଷ୍ଠାତା ଅଧ୍ୟକ୍ଷ ରିଜୱାନ ସାଜନଙ୍କୁ କୃତଜ୍ଞତା ଜ୍ଞାପନ କରାଯାଇଛି ।
