ଅହମ୍ମଦାବାଦ: ବିମାନ ଦୁର୍ଘଟଣା ପରେ ବିଶ୍ବାସ କୁମାର ରମେଶ ନାମକ ଜଣେ ବ୍ୟକ୍ତି  ଖୁବ ଚର୍ଚ୍ଚାରେ ରହିଛନ୍ତି । ବିମାନରେ ଥିବା ୨୪୨ ଜଣଙ୍କ ମଧ୍ୟରୁ ରମେଶ ହିଁ ଏକମାତ୍ର ବ୍ୟକ୍ତି ଯିଏ ବିମାନ ଦୁର୍ଘଟଣାରେ ବଞ୍ଚି ଯାଇଛନ୍ତି । ରମେଶଙ୍କ ସିଟ୍ ନମ୍ବର 11A ଥିଲା । ଏହି ସିଟ୍ ବିଷୟରେ ଏକ ରୋଚକ ତଥ୍ୟ ସାମ୍ନାକୁ ଆସିଛି। ଅହମ୍ମଦାବାଦ ବିମାନ ଦୁର୍ଘଟଣାରେ ସିଟ୍ 11A ରେ ବସିଥିବା ବ୍ୟକ୍ତି ବଞ୍ଚିଯାଇଥିବା ଖବର ଶୁଣି ଆଶ୍ଚର୍ଯ୍ୟ ହୋଇଛନ୍ତି ଥାଇ ଗାୟକ ଏବଂ ଅଭିନେତା ଜେମ୍ସ ରୁଆଙ୍ଗସାକ୍ ଲୋଇଚୁସାକ୍ । କାରଣ, ୨୭ ବର୍ଷ ପୂର୍ବେ ସେ ମଧ୍ୟ ସିଟ୍ 11A ରେ ବସିଥିଲେ ଏବଂ ବିମାନ ଦୁର୍ଘଟଣାରେ ବଞ୍ଚି ଯାଇଥିଲେ। 

ଡିସେମ୍ବର ୧୯୯୮ରେ ରୁଆଙ୍ଗସାକ୍ ଥାଇ ଏୟାରୱେଜ୍ ଫ୍ଲାଇଟ୍ TG ୨୬୧ରେ ଯାତ୍ରା କରୁଥିଲେ। ବିମାନଟି ଦକ୍ଷିଣ ଥାଇଲ୍ୟାଣ୍ଡରେ ଅବତରଣ କରିବାକୁ ଚେଷ୍ଟା କରୁଥିଲା ଏବଂ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଦୁର୍ଘଟଣାରେ ୧୦୧ ଜଣଙ୍କର ମୃତ୍ୟୁ ହୋଇଥିଲା। ୧୦୧ ଜଣ ଯାତ୍ରୀଙ୍କ ମଧ୍ୟରୁ ସେ ଏକମାତ୍ର ବ୍ୟକ୍ତି ଥିଲେ, ଯିଏ ବଞ୍ଚି ଯାଇଥିଲେ । ସେ ମଧ୍ୟ ସିଟ୍ ୧୧A ରେ ବସିଥିଲେ। ସେ କହିଛନ୍ତି, ଏହି ଦୁର୍ଘଟଣା ପରେ ମୁଁ ଏତେ ଆଘାତ ପାଇଥିଲି ଯେ, ପ୍ରାୟ ୧୦ ବର୍ଷ ପର୍ଯ୍ୟନ୍ତ ମୁଁ ବିମାନରେ ଯାତ୍ରା କରିନଥିଲି। 

ବିଶ୍ୱାସ କୁମାର ରମେଶଙ୍କ ବଞ୍ଚିବା ଖବର ପ୍ରସାରିତ ହେବା ପରେ ରୁଆଙ୍ଗସାକଙ୍କ ପ୍ରତିକ୍ରିୟା ମିଳିଛି । ସିଟ୍‌ ନମ୍ବର 11A ସଂପର୍କରେ ସେ ବଡ଼ ଖୁଲାସା କରିଛନ୍ତି ।  ସେ ତାଙ୍କ ସୋସିଆଲ ମିଡିଆ ପୋଷ୍ଟରେ ଲେଖିଛନ୍ତି ଯେ, ଭାରତରେ ବିମାନ ଦୁର୍ଘଟଣାରୁ ବଞ୍ଚିଥିବା ବ୍ୟକ୍ତି ମଧ୍ୟ ସେହି ସିଟରେ ବସିଥିଲେ ଯେଉଁଠାରେ, ମୁଁ ୨୭ ବର୍ଷ ପୂର୍ବେ ବସିଥିଲି । ଅର୍ଥାତ ବିମାନ ଅଲଗା ହେଲେ ମଧ୍ୟ ସିଟ୍‌ ନମ୍ବର ଥିଲା ସମାନ, 11 A। ସେ ଆହୁରି ଲେଖିଛନ୍ତି ଯେ, ବିମାନ ଦୁର୍ଘଟଣା ଖବର ଶୁଣି ମୁଁ ମର୍ମାହତ। ଏହି ଦୁର୍ଘଟଣାରେ ଯେଉଁମାନେ ନିଜ ପ୍ରିୟଜନଙ୍କୁ ହରାଇଛନ୍ତି ସେମାନଙ୍କ ପ୍ରତି ମୋର ସମବେଦନା । 

ରୁଆଙ୍ଗସାକ୍ କହିଛନ୍ତି, ବିମାନ ଦୁର୍ଘଟଣାରେ ମୁଁ ବଞ୍ଚି ଯାଇଥିଲି । ଦୀର୍ଘ ୨୭ ବର୍ଷ ପରେ ଆଉ ଏକ ବିମାନ ଦୁର୍ଘଟଣାରେ ଅନ୍ୟ ଜଣେ ବ୍ୟକ୍ତି ସମାନ ସିଟ୍‌ରେ ବସିଥିବାରୁ ବଞ୍ଚି ଯିବା ଖବର ଆଶ୍ବର୍ଯ୍ୟ କରିଛି । ମୋର ସେହି ହୃଦୟ ବିଦାରକ ବିମାନ ଦୁର୍ଘଟଣାର ସ୍ମୃତିକୁ ତାଜା କରି ଦେଇଛି ।