ମାଲକାନଗିରି : ମାଲକାନଗିରିରେ ଏକ ଜିଲ୍ଲା ସ୍ତରୀୟ ଲିଙ୍ଗଗତ ହିଂସା ଦୂରୀକରଣ ପ୍ରଶିକ୍ଷଣ ଓ ଶପଥ ପାଠ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ୧୬ ଦିନିଆ ଏହି ଅଭିଯାନର ଶପଥ ପାଠ ସମାରୋହ କାର୍ଯ୍ୟକ୍ରମଟି ଜିଲ୍ଲା ପ୍ରଶାସନ ଓ ଜିଲ୍ଲା ସମାଜ ମଙ୍ଗଳ ବିଭାଗ, ୱାନଷ୍ଟପ୍‌ ସେଣ୍ଟର, ଶକ୍ତିସଦନ, ମିଶନ ଶକ୍ତି, ଚାଇଲ୍ଡ ଲାଇନ ଓ ଜିଲ୍ଲା ଶିଶୁ ସୁରକ୍ଷା ବିଭାଗର ମିଳିତ ଆନୁକୂଲ୍ୟରେ, ଡିପିଆରସି ଟ୍ରେନିଂ ହଲରେ ହୋଇଥିଲା।

ଏହି ସମାରୋହ କାର୍ଯ୍ୟକ୍ରମରେ ଜିଲ୍ଲା ଶିଶୁ ସୁରକ୍ଷା ଅଧିକାରୀ ନାରାୟଣ ଦାସ କାର୍ଯ୍ୟକ୍ରମକୁ ପରିଚାଳନା କରି ଥିଲେ l ଉକ୍ତ କାର୍ଯ୍ୟକ୍ରମରେ ଡିଏସପି ଲକ୍ଷ୍ମୀଧର ସ୍ବାଇଁ ଉପସ୍ଥିତ ରହି କହି ଥିଲେ ଯେ, ଲିଙ୍ଗଗତ ହିଂସା ହେଉ କି ମହିଳା ଘରୋଇ ହିଂସା ହେଉ , କୌଣସି ଶିଶୁ ଓ ମହିଳାଙ୍କ ସମସ୍ୟା, ଅସୁବିଧା ସମୟରେ ପୁଲିସ ବିଭାଗ ସର୍ବଦା ସହଯୋଗ କରିବ ବୋଲି ପ୍ରତିଶ୍ରୁତି ଦେଇଥିଲେ । ଜିଲ୍ଲା ଜନସ୍ବାସ୍ଥ୍ୟ ଅଧିକାରୀ ଡାକ୍ତର ଏମ ହୁସେନ କହିଥିଲେ, ମହିଳା ଓ ଶିଶୁ ପୀଡ଼ିତାଙ୍କୁ ମାନସିକ ଏବଂ ସ୍ବାସ୍ଥ୍ୟ ଉପରେ ପରାମର୍ଶ ଦେବା ନିମନ୍ତେ ସ୍ୱାସ୍ଥ୍ୟ ବିଭାଗ ସମ୍ପୂର୍ଣ୍ଣ ସହଯୋଗ କରିବ।

ଜିଲ୍ଲା ସ୍ତରୀୟ ସମସ୍ତ ବିଭାଗକୁ, ଜିଲ୍ଲା ସମାଜ ମଙ୍ଗଳ ଅଧିକାରୀ ୪ ପ୍ରକାରର ହିଂସା ତଥା ଯୌତୁକ ନିରୋଧ ଆଇନ, ପୋକସୋ ଆଇନ, ଘରୋଇ ହିଂସା ଆଦି ବିଷୟରେ ପିପିଟି ମାଧ୍ୟମରେ ବୁଝାଇ ଥିଲେ ଏବଂ ଏହି ବାର୍ତ୍ତା ନିଜ ନିଜ ବିଭାଗର ତୃଣମୂଳ ସ୍ତରୀୟ କର୍ମଚାରୀମାନଙ୍କୁ ଗ୍ରାମୀଣ ସ୍ତରରେ ଜନ ସଚେତନ କରାଇବାକୁ ଅନୁରୋଧ କରିଥିଲେ l