ରାଉରକେଲା ୦୧/୬: ପ୍ରାୟ ୨୧ ଦିନ ପରେ ସାଉଦିରୁ ଫେରିଛି ଇଞ୍ଜିନିୟର ଦିଲ୍ଲୀପଙ୍କ ମୃତ ଶରୀର। ସାଉଦିରୁ ସ୍ଵତନ୍ତ୍ର ବିମାନ ଯୋଗେ ଶନିବାର ମୃତଦେହ କୋଲକାତା ଆସିଥିଲା। ପରିବାର ଲୋକେ କୋଲକାତା ଯାଇ ପୁଅର ମୃତଦେହକୁ ରବିବାର ରାଉରକେଲା ଆଣିଥିଲେ। ଶେଷଥର ପାଇଁ ପୁଅକୁ ଦେଖି ବାପା ନିଜ କୋହ ସମ୍ଭାଳି ପାରୁ ନଥିବା ବେଳେ ମାଆ କାନ୍ଦି କାନ୍ଦି ଅଚେତ ହୋଇ ପଡୁଥିଲେ। ଶେଷରେ ବେଦବ୍ୟାସ ସ୍ଵର୍ଗଦ୍ଵାର ପୀଠରେ ମୃତଦେହ ସତ୍କାର କରାଯାଇଛି।
ପ୍ରକାଶ ଥାଉ କି, ରାଉରକେଲା ଛେଣ୍ଡରେ ରହୁଥିବା ପ୍ରାକ୍ତନ ଆରଏସପି କର୍ମଚାରୀ ସୁବାସ ଚନ୍ଦ୍ର ସାହୁଙ୍କ ପୁଅ ଦିଲ୍ଲୀପ ଇଞ୍ଜିନିୟର ଥିବାବେଳେ ନିକଟରେ ସାଉଦି ଆରବର ଆକ୍ୱା ପାୱାର ନାମକ କମ୍ପାନୀରେ ସିନିୟର ମ୍ୟାନେଜର ଭାବେ ଚାକିରି ପାଇଥିଲେ। ଏପ୍ରିଲ ୧୪ରେ ଅନ୍ୟ ୧୦ଜଣଙ୍କ ସହ ସାଉଦି ଯାଇ ଚାକିରୀରେ ଯୋଗ ଦେଇଥିଲେ। ହେଲେ ମେ ୧୦ରେ ଅଚାନକ ହାର୍ଟ ସମସ୍ୟାକୁ ନେଇ ଦିଲ୍ଲୀପଙ୍କ ମୃତ୍ୟୁ ହୋଇଥିବା ନେଇ କମ୍ପାନୀ ପକ୍ଷରୁ ତାଙ୍କ ପରିବାରକୁ ଜଣାଯାଇଥିଲା। ବିଦେଶରୁ ମୃତଦେହ ଆଣିବାକୁ ଦିଲ୍ଲୀପଙ୍କ ବାପା ଅସମର୍ଥ ଥିବାରୁ ଜିଲ୍ଲା ପ୍ରଶାସନ ଠାରୁ ନେତା, ହାଇକମିଶନ ପର୍ଯ୍ୟନ୍ତ ଜଣାଇଥିଲେ। କିନ୍ତୁ କାଗଜପତ୍ର ସମସ୍ୟା ଯୋଗୁ ମୃତଦେହ ଆସିପରୁନ ଥିଲା। ମଙ୍ଗଳବାର ସାଉଦି କମ୍ପାନୀ ପକ୍ଷରୁ ବିମାନ ଯୋଗେ ଦିଲ୍ଲୀପଙ୍କ ମୃତଦେହକୁ କୋଲକାତା ପଠାଇଥିଲେ।
