ଭୁବନେଶ୍ୱର, ୪।୮ : ଆଗାମୀ ଦିନରେ ପୀଡ଼ିତାଙ୍କୁ ନ୍ୟାୟ ଦେବାକୁ ଲଢ଼ିବ କଂଗ୍ରେସ। ଅଗଷ୍ଟ ପନ୍ଦର ସ୍ୱାଧୀନତା ଦିବସ ପୂର୍ଵରୁ ୧୪ ତାରିଖରେ ଫକୀର ମୋହନ କଲେଜରୁ ଭୋଗରାଇ ପର୍ଯ୍ୟନ୍ତ ପଦଯାତ୍ରା କରିବ କଂଗ୍ରେସ । ପଦଯାତ୍ରା ପହଂଚିବା ପରେ ସନ୍ଧ୍ୟାରେ ଭୋଗରାଇରେ ସାଧାରଣ ସଭା ଅନୁଷ୍ଠିତ ହେବ ବୋଲି ପିସିସି ସଭାପତି ଭକ୍ତ ଚରଣ ଦାସ କହିଛନ୍ତି।
ସାମ୍ବାଦିକ ସମ୍ମିଳନୀରେ ଭକ୍ତ କହିଛନ୍ତି, ବଳଙ୍ଗା ପୀଡ଼ିତାଙ୍କୁ ନ୍ୟାୟ ନ ମିଳିଲେ ଡିଜି ଅଫିସ ଘେରାଉ କରାଯିବ। ଏହା ସହିତ ପୀଡିତା ନିଆଁ ଲଗେଇଥିବା ସ୍ଥାନରୁ ନିମାପଡା ପର୍ଯନ୍ତ ପଦଯାତ୍ରା ହେବ। ପରେ ନିମାପଡାରେ ସାଧାରଣ ସଭା କରାଯିବ। ପୀଡିତା ଯେତେବେଳେ ହପ୍ସିଟାଲ ଆସିଥିଲେ ନିଜେ ହୁଇଲ ଚେୟାରରେ ବସିକି ଆସିଥିଲେ, ତେବେ କେଉଁ ପରିସ୍ଥିତିରେ ତାଙ୍କର ମୃତ୍ୟୁ ହେଲା। ଏବେ ପ୍ରଶ୍ନ ଆସୁଛି ତାଙ୍କୁ କାହିଁକି ଦିଲ୍ଲୀ ଏମ୍ସକୁ ସିଫ୍ଟ କରାଗଲା । ପୀଡ଼ିତାଙ୍କ ବୟାନ ମଧ୍ୟ ୩ ଥରରୁ ଅଧିକ ସମୟ ରେକର୍ଡ ହୋଇଛି। ସେତେବେଳେ ତାଙ୍କର ସ୍ୱାସ୍ଥ୍ୟ ଅବସ୍ଥା କିପରି ଥିଲା ବୋଲି ପ୍ରଶ୍ନ କରିଛନ୍ତି ପିସିସି ସଭାପତି।
ସେହିପରି ଏଫଏମ କଲେଜ ପୀଡ଼ିତାଙ୍କ ମୃତ୍ୟୁ ଘଟଣାରେ ଦୁଇ ଜଣଙ୍କୁ ଗିରଫ ହେବା ପ୍ରସଙ୍ଗରେ ପିସିସି ସଭାପତି କହିଛନ୍ତି, ଦୁଇ ଜଣ ନୁହେଁ ଆଉ ଯେଉଁମାନେ ଅଭିଯୁକ୍ତ ଅଛନ୍ତି ତାଙ୍କୁ ମଧ୍ୟ ଗିରଫ କରାଯାଉ। କିଏ ପେଟ୍ରୋଲ ଆଣିଥିଲା, ତାହା ମଧ୍ୟ ଏ ପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। କାହା ନିର୍ଦେଶରେ ଏଫଆଇଆର ଗ୍ରହଣ କରାଗଲା ନାହିଁ, ତାହାର ମଧ୍ୟ ତଦନ୍ତ ହେଉ। ସେହି ଅଭିଯୁକ୍ତ ମଧ୍ୟ ଧରାହେବା ଦରକାର। ଏଫଆଇଆର ହୋଇଥିଲେ ଝିଅ ଜୀବନ ଯାଇନଥାନ୍ତ ବୋଲି ପିସିସି ସଭାପତି ଭକ୍ତ କହିଛନ୍ତି।
