ଗୋଶାଳା,୦୭/୦୭: ଗତ ୧ ତାରିଖ ବୁର୍ଲା ଥାନା ଚିପିଲିମା  ଫାଣ୍ଡି ଅଞ୍ଚଳର ଏକ ଟ୍ରାକ୍ଟର ବ୍ୟାଟେରି ଚୋରି ଘଟଣା ଭିନ୍ନ ମୋଡ଼ ନେଇଛି । ଅଭିଯୁକ୍ତ ଦୋଷ ସ୍ୱୀକାର କରିଥିବା ନେଇ ପୁଲିସ କହୁଥିବାବେଳେ ପୁଲିସର ନିର୍ଯାତନା ବିରୋଧରେ  ପରିବାର ସହ ଏସ୍‌ପିଙ୍କ ଦ୍ୱାରସ୍ଥ ହେଲେ ଅଭିଯୁକ୍ତ । ଏହି ଘଟଣାରେ ଚିପିଲିମା ପାଣ୍ଡି ଅଧିକାରୀ ଗଙ୍ଗାଧର ସାହୁଙ୍କୁ ନିଲମ୍ବନ କଲେ ସମ୍ବଲପୁର ଏସପି ମୁକେଶ ଭାମୁ। ଏନେଇ ସୂଚନା ଦେଲେ ଅତିରିକ୍ତ ଏସପି।

ସୂଚନାମତେ, ଚିପିଲିମା ଫାଣ୍ଡି ସାହାଜବାହାଲ ଗାଁରେ ଗତ ୧  ତାରିଖ ମଧ୍ୟରାତିରେ ମୁକୁନ୍ଦ ପାଣିଙ୍କ ଟ୍ରାକ୍ଟରର ବ୍ୟାଟେରି ଚୋରି ହୋଇଥିଲା । ଏନେଇ ମୁକୁନ୍ଦ ଚିପିଲିମା ଫାଣ୍ଡିରେ ଅଭିଯୋଗ  କରିଥିଲେ । ଗାଁର ରାଜେଶ ମିର୍ଦ୍ଧା (୨୬) ବ୍ୟାଟେରି ଚୋରି  କରିଥିବା ସେ ଅଭିଯୋଗ କରିଥିଲେ । ଗୋଶାଳା ପଟକୁ ଏକ  ସାଇକଲରେ ବ୍ୟାଟେରି ଧରି ଯାଉଥିବା ଦେକିଥିବା ନେଇ ମୁକୁନ୍ଦ  ପୁଲିସକୁ କହିଥିଲେ । ଏହାପରେ ଚିପିଲିମା ଫାଣ୍ଡି ଅଧିକାରୀ  ଗଙ୍ଗାଧର ସାହୁ ସାହାଜବାହାଲର ରାଜେଶକୁ ଫାଣ୍ଡିକୁ ଆଣି  ପଚରାଉଚରା କରିଥିଲେ । ଜେରା ବେଳେ ରାଜେଶ ଚୋରି କରିଥିବା  ସ୍ୱୀକାର କରିବା ସହ ବ୍ୟାଟେରି ଫେରସ୍ତ କରିବ  କହିବାରୁ ଫାଣ୍ଡି ଅଧିକାରୀ ତାକୁ ତାଗିଦ୍‌ କରି ଛାଡ଼ି ଦେଇଥିଲେ । ହେଲେ ଏହାପରେ ଯୁବକ ଜଣକ  ସମ୍ବଲପୁର ଜିଲ୍ଲା ମଙ୍ଗଳ ଅଧିକାରୀଙ୍କ ପାଖରେ ପୁଲିସ ବିରୋଧରେ ପାଲଟା ଅଭିଯୋଗ ଆଣିଥିବା ଜଣାପଡ଼ିଛି ।  ଜେରା ବେଳେ ଫାଣ୍ଡି ଅଧିକାରୀ ତାକୁ ମାଡ଼ପିଟ କରି ଜୋର  ଜବରଦସ୍ତ ଏକ କାଗଜରେ ଦୋଷ ସ୍ୱୀକାରୋକ୍ତି ଲେଖାଇଥିଲେ  ବୋଲି ରାଜେଶ ଅଭିଯୋଗ କରିଛି । ଏହାପରେ ଯୁବକ ତାର  ପରିବାର ସହିତ ସମ୍ବଲପୁର ଏସ୍‌ପିଙ୍କୁ ଭେଟି ସମାନ ଅଭିଯୋଗ  କରିଛନ୍ତି । ଘଟଣା ସମ୍ପର୍କରେ ଏସ୍‌ପିଙ୍କ ନିର୍ଦ୍ଦେଶ କ୍ରମେ ଏଏସ୍‌ପି  ହରେଶ ଚନ୍ଦ୍ର ପାଣ୍ଡେ, ବୁର୍ଲା ଏସ୍‌ଡିପିଓ ଅମ୍ବିତ ମହାନ୍ତି ଓ ବୁର୍ଲା ଥାନାଧିକାରୀ ଅନୀଳ ପ୍ରଧାନ ସାହାଜବାହାଲ ଯୁବକର ଘରକୁ ଯାଇ  ଘଟଣା ସମ୍ପର୍କରେ ପଚରାଉଚରା କରିଥିଲେ । ପରେ ସେଠାରୁ ଚିପିଲିମା ଫାଣ୍ଡି ପହଞ୍ଚି ଘଟଣାର ତଦନ୍ତ କରୁଥିଲେ। ଏହି ଘଟଣାରେ ଚିପିଲିମା ପାଣ୍ଡି ଅଧିକାରୀ ଗଙ୍ଗାଧର ସାହୁଙ୍କୁ ନିଲମ୍ବନ କରାଯାଇଛି।