ଭୁବନେଶ୍ଵର, ୦୭/୦୮ : ବର୍ଷାଦିନ ଚାଲିଥିବାରୁ ଭୁବନେଶ୍ଵରରେ ଜଳବନ୍ଦୀ ସମସ୍ୟାର ସମାଧାନ ପାଇଁ ବିଏମସି ପକ୍ଷରୁ ସ୍ପେଶାଲ୍ ଡ୍ରାଇଭ୍ ଆରମ୍ଭ ହୋଇଛି। ବିଏମସି ମେୟର ଏବଂ କମିଶନର ଟିମ୍ ସହ ନିୟମିତ ସ୍ଥିତି ଅନୁଧ୍ୟାନ କରୁଛନ୍ତି। ଗୁରୁବାର ସକାଳେ ବିଏମସି କମିଶନର ଚଞ୍ଚଲ ରାଣା ପଞ୍ଚସଖା ନଗରର ଜଳବନ୍ଦୀ ଅଞ୍ଚଳ ପରିଦର୍ଶନ କରି ପ୍ରାଥମିକ ପର୍ଯ୍ୟାୟରେ ସମାଧାନ ପାଇଁ ଟିମ୍ ସହ ଆଲୋଚନା କରିଛନ୍ତି। ୱାଟକୋ ପକ୍ଷରୁ ଆବଶ୍ୟକୀୟ ପଦକ୍ଷେପ ନେବାକୁ କୁହାଯାଇଛି। BT ରୋଡ୍ ଏବଂ ଅନ୍ୟାନ୍ୟ ସ୍ଥାନରେ କାର୍ଯ୍ୟ ଆରମ୍ଭ କରିବା ପାଇଁ ୱାଟକୋକୁ ୪୮ ଘଣ୍ଟାର ସମୟ ଦିଆଯାଇଛି। ଏକ ମାସ ପରେ କମିଶନର ପୁଣି ଥରେ ପରିଦର୍ଶନ କରିବେ ବୋଲି ସୂଚନା ମିଳିଛି। 

ବିଏମସି କମିଶନର ପରିଦର୍ଶନ ବେଳେ କିଛି ସ୍ଥାନରେ ଜବରଦଖଲ ଏବଂ ଷ୍ଟ୍ରିଟ୍ ଲାଇଟ୍ ସମସ୍ୟା ମଧ୍ୟ ଚିହ୍ନଟ କରିଛନ୍ତି। ଆଲୋଚନା ମାଧ୍ୟମରେ ଜବରଦଖଲ ମୁକ୍ତ କରିବାକୁ ନିର୍ଦ୍ଦେଶ ଦିଆଯାଇଛି। ସେହିପରି ବିଏମସି ଦ୍ଵାରା ସୌନ୍ଦର୍ଯ୍ୟକରଣ ପାଇଁ କିଛି ଅଞ୍ଚଳକୁ ସ୍ଥିର କରାଯାଇଛି। ଜଳବନ୍ଦୀ ସମସ୍ୟାର ସମାଧାନ ପାଇଁ ଲୋକମାନଙ୍କ ଠାରୁ କମିଶନର ସହଯୋଗ ଲୋଡ଼ିଛନ୍ତି। ବିଏମସି କମିଶନରଙ୍କ ସହ ୱାଟକୋ, ସ୍ଥାନୀୟ କର୍ପୋରେଟର ଏବଂ ବାସିନ୍ଦା ଉପସ୍ଥିତ ଥିଲେ।