ନୂଆଦିଲ୍ଲୀ: ଦୀର୍ଘ ୨୭ ବର୍ଷ ପରେ ଦିଲ୍ଲୀରେ ବିଜେପି କ୍ଷମତାକୁ ଫେରିବା ପରେ ରବିବାର ଆଦର୍ଶ ନଗରରୁ ନିର୍ବାଚିତ ବିଜେପି ବିଧାୟକ ରାଜକୁମାର ଭାଟିଆ କ୍ୟାମେରା ସାମ୍ନାରେ କାନ୍ଦି ପକାଇଛନ୍ତି । ଇଣ୍ଡିଆ ଟିଭି ସହ ସାକ୍ଷାତକାର ସମୟରେ ସେ ଭାବପ୍ରବଣ ହୋଇଯାଇଛନ୍ତି ଏବଂ କହିଛନ୍ତି ଯେ, ଭୋଟରମାନେ ତାଙ୍କୁ ବହୁତ ଭଲ ପାଇଛନ୍ତି । ଲୋକମାନେ ତାଙ୍କ ମୁହଁ ଦେଖି ନାହାଁନ୍ତି କିନ୍ତୁ ତାଙ୍କ କାମକୁ ସ୍ୱୀକାର କରିଛନ୍ତି । ଆଦର୍ଶ ନଗର ବିଧାନସଭା ଆସନରୁ ବିଜେପିର ରାଜକୁମାର ଭାଟିଆ ଆମ ଆଦମୀ ପାର୍ଟିର ମୁକେଶ ଗୋୟଲଙ୍କୁ ୧୧,୪୫୨ ଭୋଟରେ ପରାସ୍ତ କରିଛନ୍ତି । ରାଜ କୁମାର ଭାଟିଆ ମୋଟ ୫୨,୫୧୦ ଭୋଟ ପାଇଥିବା ବେଳେ ମୁକେଶ ଗୋୟଲ ୪୧,୦୨୮ ଭୋଟ ପାଇଛନ୍ତି ।
ଏହି ବିଜୟ ତାଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା । କାରଣ ୨୦୨୦ ମସିହାରେ ସେ ଆମ ଆଦମୀ ପାର୍ଟିର ପବନ ଶର୍ମାଙ୍କଠାରୁ ମାତ୍ର ୧୫୦୦ ଭୋଟରେ ପରାସ୍ତ ହୋଇଥିଲେ। ଦଳର ରଣନୀତି ବିଷୟରେ କହିବାକୁ ଗଲେ, ସେ କହିଛନ୍ତି ଯେ ସଂଗଠନ ପ୍ରତ୍ୟେକ ବୁଥରେ ଭୋଟରଙ୍କ ସହ ଯୋଗାଯୋଗ କରି ତୃଣମୂଳ ସ୍ତରରେ କଠିନ ପରିଶ୍ରମ କରିଛି । ସେ କହିଛନ୍ତି, ‘ଆମେ ପ୍ରତ୍ୟେକ ବସ୍ତିକୁ ଯାଇଥିଲୁ । ପ୍ରତ୍ୟେକ ବର୍ଗର ବ୍ୟକ୍ତି ଏବଂ ଲୋକଙ୍କୁ ଭେଟିଥିଲୁ।’
ବିଜୟର ଶ୍ରେୟ ପ୍ରଧାନମନ୍ତ୍ରୀ ମୋଦୀଙ୍କୁ ଦେଇ ସେ କହିଛନ୍ତି, ଏଥର ସେମାନେ ଏକ ଭିନ୍ନ ଉପାୟରେ କାମ କରିଥିଲେ । ସେମାନେ ଘରକୁ ଘର ଯାଇ ସମସ୍ତଙ୍କୁ ଭେଟି ପ୍ରଧାନମନ୍ତ୍ରୀ ମୋଦୀଙ୍କ ଚିଠି ପହଞ୍ଚାଇଥିଲେ । ସେ କହିଛନ୍ତି, ‘ଆମେ ପ୍ରଧାନମନ୍ତ୍ରୀ ମୋଦୀଙ୍କ ଯୋଜନା ବିଷୟରେ ଲୋକମାନଙ୍କୁ କହିଥିଲୁ ଏବଂ ସେମାନଙ୍କୁ ଆଶ୍ୱାସନା ଦେଇଥିଲୁ ଯେ ଏଗୁଡ଼ିକ କେବଳ ପ୍ରତିଶ୍ରୁତି ନୁହେଁ, ବରଂ ଆମେ ଏହି ଯୋଜନାଗୁଡ଼ିକୁ ପୂରଣ କରିବୁ।’
ଦିଲ୍ଲୀର ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ପ୍ରଶ୍ନରେ ଭାଟିଆ କହିଛନ୍ତି ଯେ, ଦଳ ଏହି ପ୍ରସଙ୍ଗରେ ନିଷ୍ପତ୍ତି ନେବ। ମୋ ମନରେ ମଧ୍ୟ ଏକ ନାମ ଅଛି କିନ୍ତୁ ଏହା ଗୋପନୀୟ । ମୁଁ କେବଳ ମୋଠାରୁ ଭଲ ନେତାଙ୍କ ନାମ ଦେବି । ମୋର ମୁଖ୍ୟମନ୍ତ୍ରୀ ହେବାକୁ କୌଣସି ଇଚ୍ଛା ନାହିଁ । ଦଳ ଯାହା ନିଷ୍ପତ୍ତି ନେବ। ବୈଠକ ପରେ ସେହି ନିଷ୍ପତ୍ତି ଗ୍ରହଣ କରାଯିବ। ସୂଚନାଯୋଗ୍ୟ, ଦିଲ୍ଲୀ ବିଧାନସଭା ନିର୍ବାଚନରେ ବିଜେପି ବଡ଼ ବିଜୟ ହାସଲ କରିଛି ଏବଂ ଅରବିନ୍ଦ କେଜ୍ରିୱାଲଙ୍କ ନେତୃତ୍ୱାଧୀନ ଆମ ଆଦମୀ ପାର୍ଟିକୁ ପରାଜୟ ମିଳିଛି । ଗତ ବିଧାନସଭାରେ ୭୦ ଆସନ ମଧ୍ୟରୁ ୬୨ ଆସନ ପାଇଥିବା ଆପ୍ ଏହି ନିର୍ବାଚନରେ ୨୨କୁ ହ୍ରାସ ପାଇଛି । ସେପଟେ ବିଜେପି ୨୭ ବର୍ଷ ପରେ ଦିଲ୍ଲୀରେ ପ୍ରବେଶ କରିଥିବାରୁ ୮ରୁ ୪୮ ଆସନ ଅକ୍ତିଆର କରି ସରକାର ଗଢ଼ିବାକୁ ଯାଉଛି ।
