ବିଜାନୌର, ୨୨/୦୮ : ବିଶ୍ଵାସରେ ବିଷ, ସହାୟିକାଙ୍କ ଘୃଣ୍ୟ ମାନସିକତା। ସିସିଟିଭି ଭିଡିଓରୁ ସାମ୍ନାକୁ ଆସିଲା ଚାଞ୍ଚଲ୍ୟକର ସତ। ଭିଡିଓ ଦେଖି ମାଲିକ ମାଲିକାଣୀ ତାଜୁବ। ପ୍ରତି ଦିନ ଗ୍ଲାସରେ ପରିସ୍ରା କରି ବାସନକୁସନ ଉପରେ ଛିଞ୍ଚୁଥିଲା ସହାୟିକା। ଆଉ ସେହି ବାସନରେ ମାଲିକ ମାଲିକାଣୀଙ୍କୁ ପରଷି ଦେଉଥିଲେ ଖାଦ୍ୟ। ପ୍ରତିଦିନ ଖାଉଥିଲେ ସାହାୟିକାଙ୍କ ମୁତ୍ର ଗୋଳା ଖାଦ୍ୟ। ଦୀର୍ଘ ୧୦ ବର୍ଷ ହେଲା ଏଭଳି କରୁଥିଲେ ମହିଳା। ସହାୟିକାଙ୍କ ଏଭଳି ଘୃଣ୍ୟ କର୍ମ ଦେଖିଲେ ଆପଣଙ୍କର ବି ଘୂରାଇଦେବ ମୁଣ୍ଡ।
ଘଟଣାଟି ହେଉଛି ବିଜାନୌର ଜିଲ୍ଲାର ନଗିନାର। ଏଠାକାର ଜଣେ ପ୍ରତିଷ୍ଠିତ ବ୍ୟବସାୟୀଙ୍କ ଘରେ ଜନୈକା ମହିଳା ସହାୟିକା ଦୀର୍ଘ ୧୦ ବର୍ଷ ହେଲା କାମ କରୁଥିଲେ। କିଛି ଦିନ ହେବ ସହାୟିକାଙ୍କ ଅଜବ କାରନାମା ଦେଖି ଘରର ମହିଳା ସଦସ୍ୟଙ୍କ ସନ୍ଦେହ ହେଲା। ଏଥିପାଇଁ ସେମାନେ ରୋଷେଇ ଘରେ ଚୁପଚାପ୍ ସିସିଟିଭି ଲଗାଇଲେ। ଦିନେ ଦ୍ଵିପ୍ରହର ସମୟରେ ସହାୟିକା ଜଣଙ୍କ ବାସନ ଧୋଉଥିଲେ। ଏହି ସମୟରେ ଯେଉଁ ଦୃଶ୍ୟ ସିସିଟିଭିରେ କଏଦ ହେଲା ତାହା ଦେଖି କେହି ବିଶ୍ଵାସ କରିପାରି ନଥିଲେ। ମହିଳା ଜଣଙ୍କ ଏକ ଗ୍ଲାସରେ ପରିସ୍ରା କରି ବାସନକୁସନ ଗୁଡ଼ିକରେ ଛୁଞ୍ଚୁଥିଲେ। ଏହି ଘଟଣା ଦେଖି ବ୍ୟବସାୟୀ ଜଣଙ୍କ ତୁରନ୍ତ ଥାନାରେ ଅଭିଯୋଗ କରିଥିଲେ। ସିସିଟିଭି ଫୁଟେଜ୍ ଆଧାରରେ ପୁଲିସ ସହାୟିକାଙ୍କୁ ଗିରଫ କରିଛି। ମହିଳା ଜଣଙ୍କ ତାଙ୍କ ଦୋଷ ସ୍ଵୀକାର କରିଛନ୍ତି। ହେଲେ ସେ ଏଭଳି ଘୃଣ୍ୟ କାମ କାହିଁକି କରୁଥିଲେ ସେନେଇ କୌଣସି ସ୍ପଷ୍ଟ ସୂଚନା ମିଳିପାରି ନାହିଁ। ଏହି ଘଟଣା ବେଳର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହେଉଛି। ସହାୟିକାଙ୍କ ଏଭଳି ବିକୃତ ମାନସିକତାକୁ ଲୋକମାନେ ନିନ୍ଦା କରୁଛନ୍ତି।
ଏହା ପୂର୍ବରୁ ୟୁପି ଗାଜିଆବାଦରେ ସମାନ ଘଟଣା ଘଟିଥିଲା। ଜଣେ ସହାୟିକା ମାଲିକଙ୍କ ରୋଷେଇ ଘରେ ବାସନକୁସନରେ ଟଏଲେଟ୍ କରୁଥିଲେ। ପରିସ୍ରା କରି ଖାଦ୍ୟରେ ମିଶାଉଥିଲେ। ଏହି ଖାଦ୍ୟ ଖାଇ ବ୍ୟବସାୟୀଙ୍କ ପରିବାର ଲୋକେ ଅସୁସ୍ଥ ହେବାକୁ ଲାଗିଲେ। ଏହାପରେ ବ୍ୟବସାୟୀଙ୍କ ପତ୍ନୀ ଚୁପଚାପ୍ ରୋଷେଇ ଘରେ କ୍ୟାମେରା ଲଗାଇଥିଲେ। କ୍ୟାମେରାରେ ସହାୟିକାଙ୍କ ଅଜବ କାରନାମା ଧରାପଡ଼ିଥିଲା।
