ଧାମରା,୨୨/୦୧: ପ୍ରତ୍ୟେକ ବର୍ଷ ଭଳି ଚଳିତ ବର୍ଷ ମଧ୍ୟ ଭିତରକନିକାରେ କୁମ୍ଭୀର ଗଣନା କରାଯାଉଛି । ଗତ ବର୍ଷ ଅପେକ୍ଷା କୁମ୍ଭୀରଙ୍କ ସଂଖ୍ୟା କମିଛି ନା ବଢିଛି ତାହା ଜାଣିବା ପାଇଁ ଆରମ୍ଭ ହୋଇଛି ଗଣନା । କୁମ୍ଭୀର ଗଣନା ପାଇଁ ଭିତରକନିକା ବନ୍ଦ କରାଯାଇଥିବା ବେଳେ ଜାନୁଆରୀ ୨୩ (ଗୁରୁବାର)ରୁ ଏହା ପର୍ଯ୍ୟଟକଙ୍କ ପାଇଁ ଖୋଲିବ ।
ଚଳିତ ବର୍ଷ ଜାନୁଆରୀ ୧୪ ତାରିଖରୁ କୁମ୍ଭୀର ଗଣନା ଆରମ୍ଭ ହୋଇଛି । ଏହି ଗଣନା ଜାନୁଆରୀ ୨୨ରେ ଶେଷ ହେବ । କୁମ୍ଭୀର ଗଣନା ପାଇଁ ୧୨ ତାରିଖରୁ ଭିତରକନିକାରେ ଥିବା ପର୍ଯ୍ୟଟକଙ୍କୁ ଅପସାରଣ କରାଯାଇଥିଲା । ଶୀତଦିନେ ଅଭୟାରଣ୍ୟ ମଧ୍ୟରେ ଥିବା ବିଭିନ୍ନ କ୍ରିକ୍, ଜୋର, ନାଳ ଓ ନଦୀପଠାରେ କୁମ୍ଭୀରମାନେ ଶୁଅନ୍ତି । ତେଣୁ ବନକର୍ମଚାରୀଙ୍କୁ କୁମ୍ଭୀର ଗଣିବା ସୁବିଧା ହୁଏ । ଏଥିପାଇଁ ୮ଟି ଟିମ୍ କରି ଗଣନା ଚାଲିଥିବାବେଳେ ଏହା ବୁଧବାର ଶେଷ ହେବ । ଅନ୍ୟପକ୍ଷରେ ବୈତରଣୀ, ବ୍ରାହ୍ମଣୀ ନଦୀରେ ଡଲଫିନ୍ ଗଣନା ପାଇଁ ବନ ବିଭାଗ ପ୍ରସ୍ତୁତ ହୋଇଛି । ଜାନୁଆରୀ୨୨ କିମ୍ବା ୨୩ରୁ ଡଲଫିନ୍ ଗଣନା ହେବ ।
