ନୂଆଦିଲ୍ଲୀ,୭।୭: ଗତ ଏକ ମାସ ହେବ ଆସାମରେ ବନ୍ୟା ଯୋଗୁଁ ସ୍ଥିତି ଖୁବ୍ ଖରାପ ହୋଇ ପଡିଛି। ଲୋକଙ୍କୁ ସୁରକ୍ଷିତ ସ୍ଥାନକୁ ନିଆ ଯାଇଥିଲେ ବି ବନ୍ୟା ପାଣିରେ ୫୮ ଜଣଙ୍କର ଜୀବନ ଯାଇ ସାରିଛି। ଆସାମ ରାଜ୍ୟ ବିପର୍ଯ୍ୟୟ ପ୍ରଶମନ ପ୍ରାଧିକରଣ(ଏଏସ୍ଡିଏମ୍ଏ) କହିଛି ଗତ ମାସ ଆସାମରେ ଗମ୍ଭୀର ବନ୍ୟା ସ୍ଥିତି ଯୋଗୁଁ କୋଟି କୋଟି ଟଙ୍କା ଇନଫ୍ରାଷ୍ଟ୍ରକଚର ନଷ୍ଟ କରିଦେଇଛି। ବନ୍ୟା ପାଣିରେ ଅନେକ କିଛି ପ୍ରଭାବିତ ହୋଇଛି, ରାସ୍ତାଘାଟଠାରୁ ନେଇ ଫସଲ ନଷ୍ଟ ହୋଇସାରିଛି। କେବଳ ସେତିକି ନୁହେଁ ଗୃହପାଳିତ ପଶୁ ମଧ୍ୟ ପ୍ରଭାବିତ ହୋଇଛନ୍ତି। ବନ୍ୟା କାରଣରୁ ହଜାର ହଜାର ଲୋକ ବାସହରା ହୋଇଛନ୍ତି। ରିପୋର୍ଟ ଅନୁସାରେ, ୨୭ ଜିଲ୍ଲାରେ ୫୭୭ ଶିବିର ଓ ବିତରଣ କେନ୍ଦ୍ରରେ ୫,୨୬,୦୦୦ ରୁ ଅଧିକ ଲୋକ ଶରଣ ନେଇଛନ୍ତି।
ଆସମର ବହ୍ମପୁତ୍ର ସହିତ ୧୦ଟି ନଦୀର ଜଳସ୍ତର ବିପଦ ସଙ୍କେତ ଉପରେ ରହିଛି। ବ୍ରହ୍ମପୁତ୍ର ନଦୀର ଜଳସ୍ତର ନେମାଟିଘାଟ, ତେଜପୁର, ଧୁବରୀ ଓ ଗୋଲାପାରାରେ ବିପଦ ସଙ୍କେତ ଉପରେ ପ୍ରଭାବିତ ହେଉଛି। ଏଏସ୍ଡିଏମ୍ଏର ବନ୍ୟା ରିପୋର୍ଟ ଅନୁସାରେ, ଶନିବାର ପୁରା ଜିଲ୍ଲାରେ ବନ୍ୟା ସ୍ଥିତିରେ ଅଳ୍ପ ସୁଧାର ହୋଇଥିଲା, କିନ୍ତୁ ୨୯ ଜିଲ୍ଲାର ୨.୩୯ ମିଲିୟନ ଲୋକରୁ ଅଧିକ ଲୋକ ଏବେ ବି ବନ୍ୟାର ଦ୍ବିତୀୟ ଲହରରେ ପ୍ରଭାବିତ ହୋଇଛନ୍ତି।
ବନ୍ୟାରେ କାଜିରଙ୍ଗା ନ୍ୟାସନାଲ ପାର୍କ ମଧ୍ୟ ପ୍ରଭାବିତ ହୋଇଛି। ବନ୍ୟାରେ ୧,୫୪୯,୧୬୧ ପଶୁ ପ୍ରଭାବିତ ହୋଇଛନ୍ତି। ଉଦ୍ୟାନରେ ଏପର୍ଯ୍ୟନ୍ତ ୬ ଗଣ୍ଡା ସହିତ ୧୧୪ ପଶୁଙ୍କର ମୃତ୍ୟୁ ହୋଇସାରିଛି। ପୂର୍ବ ଅପେକ୍ଷା ଯଦିଓ ଜାତୀୟ ଉଦ୍ୟାନର ସ୍ଥିତି ଟିକେ ସୁଧୁରିଛୁ, କିନ୍ତୁ ଏବେ ବି ପାର୍କର ୬୬ ବନ ଶିବିର ପାଣିରେ ବୁଡି ରହିଛି।
