କୋଣାର୍କ,୨୨।୫(ଆପ୍ର): କୋଣାର୍କ ଏନଏସି ଅନ୍ତର୍ଗତ ଜୁଣେଇ ଗ୍ରାମର ଜଣେ ମହିଳା ସୁଭଦ୍ରାର ପ୍ରଥମ କିସ୍ତି ପାଇଥିଲେ। କିନ୍ତୁ ୨ ୟ କିସ୍ତି ବେଳକୁ ସୁଭଦ୍ରା ପୋର୍ଟାଲରେ ସଂପୃକ୍ତ ଜୀବିତ ମହିଳାଙ୍କୁ ମୃତ ଦର୍ଶାଯାଇଥିଲା। ଫଳରେ ମହିଳା ଜଣକ ଦ୍ବିତୀୟ କିସ୍ତି ପାଇବାରୁ ବଞ୍ଚିତ ହୋଇଛନ୍ତି। ଜୀବିତ ଥାଇ ମୃତ ଦର୍ଶାଯିବାକୁ ନେଇ ସ୍ଥାନୀୟ ଅଞ୍ଚଳରେ ଏହା ଚର୍ଚ୍ଚାର ବିଷୟ ପାଲଟିଛି।
ଜୁଣେଇ ଗ୍ରାମର ସୁଶାନ୍ତ ମହାରଣାଙ୍କ ପତ୍ନୀ ସ୍ନେହଲତା ମହାରଣା ମହିଳା ଓ ଶିଶୁ କଲ୍ୟାଣ ବିଭାଗ ପକ୍ଷରୁ ସୁଭଦ୍ରାର ପ୍ରଥମ କିସ୍ତି ୫ହଜାର ଟଙ୍କା ପାଇଥିଲେ। କିନ୍ତୁ ୨ୟ କିସ୍ତି ତାଙ୍କୁ ମିଳି ନ ଥିଲା। ୨ୟ କିସ୍ତି ବେଳକୁ ସୁଭଦ୍ରା ପୋର୍ଟାଲରେ ସମ୍ପୃକ୍ତ ଜୀବିତ ମହିଳାଙ୍କୁ ମୃତ ଦର୍ଶାଯାଇଥିଲା। ଜୁଣେଇ ଗ୍ରାମର ସୁଭଦ୍ରା ହିତାଧିକାରୀ ସ୍ନେହଲତା ମହାରଣା ଜୀବିତ ଥିବାବେଳେ ସୁଭଦ୍ରା ପୋର୍ଟାଲରେ କେଉଁ ପ୍ରମାଣ ପତ୍ର ଆଧାରରେ ମୃତ ଦର୍ଶାଯାଇଛି ତାହା ତଦନ୍ତ ସାପେକ୍ଷ। ଏହି ଘଟଣାରେ ମହିଳା ଓ ଶିଶୁ କଲ୍ୟାଣ ବିଭାଗର ତ୍ରୁଟି ଯୋଗୁଁ ଜଣେ ଜୀବିତ ମହିଳାଙ୍କୁ ସୁଭଦ୍ରା ପୋର୍ଟାଲରେ ମୃତ ଘୋଷଣା କରାଯାଇ ସୁଭଦ୍ରାର ଦ୍ବିତୀୟ କିସ୍ତି ପ୍ରଦାନ କରାଯାଇନାହିଁ । ଏହାର ଉଚ୍ଚ ସ୍ତରୀୟ ତଦନ୍ତ କରିବା ପାଇଁ କୋଣାର୍କର ସାମାଜିକ କର୍ମୀ ଭାଗୀରଥୀ ସ୍ଵାଇଁ ଜନଶୁଣାଣି ପୋର୍ଟାଲ ମାଧ୍ୟମରେ ମୁଖ୍ୟମନ୍ତ୍ରୀଙ୍କ ନିକଟରେ ଅଭିଯୋଗ କରିଛନ୍ତି।
