ନୂଆଦିଲ୍ଲୀ: ଗୁଜରାଟର ଅହମ୍ମଦାବାଦରେ ଗୁରୁବାର ଏକ ବଡ଼ ବିମାନ ଦୁର୍ଘଟଣାକୁ ନେଇ ସାରା ଦେଶରେ ହଇଚଇ । ୨୪୨ ଜଣଙ୍କୁ ନେଇ ଲଣ୍ଡନ ଯାଉଥିବା ବେଳେ କ୍ରାସ୍ ହୋଇଗଲା ଏୟାର ଇଣ୍ଡିଆ ବିମାନ । ଯାତ୍ରୀଙ୍କ ବ୍ୟତୀତ ବିମାନରେ ଥିଲେ ୧୨ କ୍ରୁ ସଦସ୍ୟ ଏବଂ ଦୁଇ ପାଇଲଟ୍ । ଉଡ଼ାଣ ଭରିବାର ମାତ୍ର ୫ ମିନିଟ୍ ପରେ ଏକ ମେଡିକାଲ୍ କଲେଜ୍ର ହଷ୍ଟେଲ୍ ବିଲ୍ଡିଂରେ ପିଟି ହୋଇ ଜଳିଯାଇଥିଲା ଏୟାର ଇଣ୍ଡିଆର B787 ଡ୍ରିମଲାଇନର । ବିମାନରେ ଥିଲେ ୬୦ରୁ ଅଧିକ ଫରେନ୍ ନ୍ୟାସନାଲ୍ । ସେହିଭଳି ଗୁଜରାଟର ପୂର୍ବତନ ମୁଖ୍ୟମନ୍ତ୍ରି ବିଜୟ ରୂପାନୀଙ୍କ ମୃତ୍ୟୁ ମଧ୍ୟ ହୋଇଛି ।
ବିମାନ ଦୁର୍ଘଟଣା କଥା ଶୁଣିଲେ ଥରିଉଠେ ଛାତି । ହୁଏତ ଅହମ୍ମଦାବାଦର ଏହି ବିମାନ ଦୁର୍ଘଟଣା ବିଶ୍ବ ବିମାନ ଦୁର୍ଘଟଣା ଇତିହାସରେ ସବୁଠାରୁ ଭୟଙ୍କର ।ମଝି ଆକାଶରେ ଦୁଃଖଦ ମୃତ୍ୟୁ । କେହି କିଛି ବୁଝିବା ଆଗରୁ ଘଟିଗଲା ଏତେ ବଡ଼ ଦୁର୍ଘଟଣା । ତେବେ ପୂର୍ବରୁ ଭାରତ ସମେତ ବିଶ୍ବରେ ଘଟିଛି ଅନେକ ବିମାନ ଦୁର୍ଘଟଣା । କେବେ କେବେ ଘଟିଛି ବିମାନ ଦୁର୍ଘଟଣା, କେତେ ଯାତ୍ରୀଙ୍କ ଯାଇଛି ଜୀବନ ?
ମାର୍ଚ୍ଚ ୨୦୨୫: ବ୍ରିଟିଶ୍ ଏରୋସ୍ପେସ୍ର ଲାନଶା ଏୟାର ଲାଇନ୍ ବିମାନ କ୍ରାସ ହୋଇଥିଲା । ରୋଟାନ ଅଭିମୁଖେ ଉଡ଼ାଣ ଭରିଥିବା ବିମାନଟି ହୋଣ୍ଡୁରାସ୍ ଉପକୂଳରେ ଜଳି ଯାଇଥିଲା । ଏଥିରେ ୧୨ ଜଣ ଯାତ୍ରୀଙ୍କ ଜୀବନ ଯାଇଥିଲା ।
ଜାନୁଆରୀ ୨୦୨୫: ଜାନୁଆରୀ ୨୯ରେ ୬୦ ଯାତ୍ରୀ ଓ ୪ କ୍ରୁ ସଦସ୍ୟଙ୍କୁ ନେଇ ଉଡ଼ାଣ ଭରିଥିଲା ଆମେରିକାନ୍ ଏୟାରଲାଇନ୍ସର ଏକ ଜେଟ୍ । ମଝି ଆକାଶରେ ୟୁଏସ୍ ଆର୍ମିର ବ୍ଲାକ ହକ୍ ହେଲିକପ୍ଟରକୁ ଦେଇଥିଲା ଧକ୍କା । ଏହି ଦୁର୍ଘଟଣାରେ ମୋଟ ୬୮ ଜଣଙ୍କ ମୃତ୍ୟୁ ହୋଇଥିଲା ।
ଡିସେମ୍ବର ୨୯, ୨୦୨୪: ଦକ୍ଷିଣ କୋରିଆ ଦେଖିଥିଲା ସବୁଠୁ ବଡ଼ ବିମାନ ଦୁର୍ଘଟଣା । ଏହି ଦୁର୍ଘଟଣାରେ ପ୍ରାଣ ହରାଇଥିଲେ ୧୭୯ ଜଣ । ମୁଆନ ଏୟାରପୋର୍ଟରେ ଅବତରଣ ବେଳେ ବିମାନଟି ରନ୍ଓ୍ବେରୁ ଖସି ଯାଇ କାନ୍ଥରେ ପିଟି ହୋଇଥିଲା । ନିମିଷକରେ ଜଳିପୋଡ଼ି ପାଉଁଶ ହୋଇଯାଇଥିଲା ବିମାନ । କେହି କିଛି ବୁଝିବା ଆଗରୁ ସବୁ କଛି ଛାରଖାର ହୋଇଯାଇଥିଲା ।
ଡିସେମ୍ବର ୨୫, ୨୦୨୪: ଆଜରବାଇଜାନ୍ର ଏୟାରଲାଇନ୍ସର ବିମାନ ୪କେ-ଏଜେଡ୍୬୫ ଦୁର୍ଘଟଣା ହୋଇଥିଲା । ବାକୁରୁ ଗ୍ରୋନି ଯାଉଥିବା ବେଳେ ବିମାନରେ ଦେଖା ଦେଇଥିଲା ଯାନ୍ତ୍ରିକ ତ୍ରୁଟି । ଏହି ଦୁର୍ଘଟଣାରେ ୩୮ ଜଣଙ୍କ ମୃତ୍ୟୁ ହୋଇଥିଲା ।
ଅଗଷ୍ଟ ୯, ୨୦୨୪: ବ୍ରାଜିଲ୍ର ସାଓ ପାଉଲୋରେ କ୍ରାସ୍ ହୋଇଥିଲା ଭୋଏପାସ୍ ଫ୍ଲାଇଟ ୨୨୮୩ । ୬୨ ଯାତ୍ରୀଙ୍କ ଯାଇଥିଲା ଜୀବନ ।
ଅଗଷ୍ଟ ୮, ୨୦୨୦: Air India Express Flight 1344 ଦୁର୍ଘଟଣାଗ୍ରସ୍ତ ହୋଇଥିଲା । କରୋନା ସମୟରେ ବିଦେଶରେ ଫସିଥିବା ଲୋକଙ୍କୁ ନେଇ ୟୁଏଇରୁ ଖୋଜିକୋଡ୍ ଆସୁଥିଲା । ପ୍ରବଳ ବର୍ଷା ଯୋଗୁଁ ବିମାନଟି ଅବତରଣ କରିନପାରି କାଲିକଟ୍ ଏୟାରପୋର୍ଟକୁ ଆସିଥିଲା । ୨ ଥର ବିଫଳ ହେବା ପରେ ତୃତୀୟ ଥର ଲ୍ୟାଣ୍ଡ କରିଥିଲା ବିମାନ । କିନ୍ତୁ ବିମାନଟି ରନଓ୍ବେରୁ ତଳକୁ ଖସି ଯାଇଥିଲା । ଏହି ଦୁର୍ଘଟଣାରେ ଦୁଇ ପାଇଲଟଙ୍କ ସେମତ ୨୧ ଜଣଙ୍କ ଜୀବନ ଯାଇଥିଲା ।
ମେ ୨୨, ୨୦୧୦: ଏୟାର ଇଣ୍ଡିଆ ଏକ୍ସପ୍ରେସ୍ ୮୧୨ ଅବତରଣ ସମୟରେ ରନଓ୍ବେରେ ଦୁର୍ଘଟଣାଗ୍ରସ୍ତ ହୋଇଥିଲା । କର୍ଣ୍ଣାଟକର ମାଙ୍କାଲୁରୁ ଅନ୍ତର୍ଜାତୀୟ ବିମାନବନ୍ଦରରେ ବିମାନଟି ଜଳିଯାଇଥିଲା । ଫଳରେ ୧୫୮ ଜଣଙ୍କ ଜୀବନ ଯାଇଥିଲା ।
ଜୁଲାଇ ୧୭, ୨୦୦୦: ଭାରତରେ ବହୁ ବଡ଼ ବଡ଼ ବିମାନ ଦୁର୍ଘଟଣା ଘଟିଛି । ୨୦୦୦ ମସିହାରେ ବିହାରର ପାଟନାରେ ଅବତରଣ ବେଳେ ଆଲିଆନ୍ସ ଏୟାର ଫ୍ଲାଇଟ୍ ୭୪୧୨ ଦୁର୍ଘଟଣାର ଶିକାର ହୋଇଥିଲା । ଏହି ଦୁର୍ଘଟଣାରେ ୬୦ ଜଣଙ୍କ ଲୋକ ପ୍ରାଣ ହରାଇଥିଲେ । ତେବେ ଏହା ପୂର୍ବରୁ ଭାରତରେ ୧୯୯୬, ୧୯୯୦, ୧୯୮୮, ୧୯୭୮ ଏବଂ ୧୯୭୩ରେ ଭୟଙ୍କର ବିମାନ ଦୁର୍ଘଟଣା ହୋଇଥିଲା ଏବଂ ଅନେକ ଲୋକଙ୍କ ଜୀବନ ଯାଇଥିଲା ।
