ନୂଆଦିଲ୍ଲୀ,୧୮।୫:  ଉତ୍ତରାଖଣ୍ଡ ପୋଲିସ ଏମ୍ସ ଋଷିକେଶର ଜଣେ ଡାକ୍ତରଙ୍କ ବିରୋଧରେ ମାମଲା ରୁଜୁ କରିଛି। ତାଙ୍କ ବିରୋଧରେ ଅଭିଯୋଗ ରହିଛି ଯେ, ପହଲଗାମ୍ ଆକ୍ରମଣ ଘଟଣାର ଦିନକ ପରେ ସେ ପୁରା ହସ୍ପିଟାଲରେ ମିଠା ବାଣ୍ଟିଥିଲେ।  ଅଭିଯୋଗ ପରେ ତାଙ୍କ ବିରୋଧରେ ମାମଲା ରୁଜୁ କରାଯାଇଛି। ଅଭିଯୁକ୍ତ ଡାକ୍ତର ଆତଙ୍କୀ ହମଲାରେ ପର୍ଯ୍ୟଟକଙ୍କ ଜଘନ୍ୟ ହତ୍ୟାର ଉତ୍ସବ ପାଳନ କରିବା ପାଇଁ ମିଠା ବାଣ୍ଟିଥିଲା। ଅଭିଯୋଗକାରୀଙ୍କ କହିବା ଅନୁସାରେ, ଏହାଦ୍ବାରା ଲୋକଙ୍କ ଭାବନାକୁ ଆଘାତ ଲାଗିଥିଲା। 

ବିଶ୍ବ ହିନ୍ଦୁ ପରିଷଦ ରିଷିକେଶର ଅଧ୍ୟକ୍ଷ ରାଜେନ୍ଦ୍ର ପାଣ୍ଡେଙ୍କ ଅଭିଯୋଗ ଅନୁସାରେ, ୧୬ ମଇରେ ଋଷିକେଶ ଥାନାରେ ଭାରତୀୟ ନ୍ୟାୟ ସଂହିତା(ବିଏନ୍‌ଏସ୍‌)ର ଧାରା 196(1)(A),196(1)(B)( ଧର୍ମ, ଜାତି, ଜନ୍ମସ୍ଥାନ, ନିବାସ, ଭାଷା ଆଦିର ଆଧାରରେ ବିଭିନ୍ନ ଧର୍ମ ମଧ୍ୟରେ ଶତ୍ରୁତାକୁ ପ୍ରୋତ୍ସାହନ ଦେବା) ଓ 197(1)(A)(ରାଷ୍ଟ୍ରୀୟ ଏକତାକୁ କ୍ଷତି ପହଁଞ୍ଚାଇବା) ଅନ୍ତର୍ଗତ ଏଫ୍‌ଆଇଆର ରୁଜୁ କରାଯାଇଛି। 

ରାଜେନ୍ଦ୍ର ପାଣ୍ଡେ ଅଭିଯୋଗ କରିଛନ୍ତି, ଡାକ୍ତର ଜଣ ୨୩ ଅପ୍ରେଲରେ ହିନ୍ଦୁଙ୍କ ହତ୍ୟାର ଉତ୍ସବ ପାଳନ କରିବା ପାଇଁ ହସ୍ପିଟାଲରେ ମିଠା ବାଣ୍ଟିଥିଲେ। ଯେତେବେଳେ ତାଙ୍କୁ କାହିଁକି ମିଠା ଦେଉଛନ୍ତି ପଚରାଯାଇଥିଲା ସେ କହିଥିଲେ, ଇଦ ପାଇଁ ମିଠା ବାଣ୍ଟୁଛନ୍ତି। ଯଦିଓ ରମଜାମ୍ ମାସ ଗୋଟିଏ ମାସ ପୂର୍ବରୁ ପାଳନ କରିସାରିଛନ୍ତି। ଅଭିଯୋଗ ରହିଛି ଯେ, ଡାକ୍ତର ନିର୍ଦୋଷ ଲୋକଙ୍କୁ ମାରିଥିବା ଆତଙ୍କୀଙ୍କ ଖୋଲା ସମର୍ଥନ କରିଥିଲେ। ଏପରିକି ଡାକ୍ତର ଜଣକ ମଧ୍ୟ ପୂର୍ବରୁ ସୋସିଆଲ ମିଡିଆରେ ଭାରତ ବିରୋଧି ମନ୍ତବ୍ୟ ଦେଇଥିଲେ। ଅଭିଯୁକ୍ତ ଡାକ୍ତର କହିଛନ୍ତି, ଖୁସି ଓ ଏକତାର ବାର୍ତ୍ତା ରୂପରେ ମୁଁ ମିଠା ଓ ଖାଇବା ବାଣ୍ଟିଥିଲି। ହେଲେ ମୋ ନାଁରେ ସାମ୍ପ୍ରଦାୟିକତା ଘୃଣା ସୃଷ୍ଟି କରିବା ନେଇ ଭୁଲ ବାର୍ତ୍ତା ଦିଆଯାଉଛି।  ମୋତେ ମାନସିକ ଭାବରେ କଷ୍ଟ ଦିଆଯାଉଛି।