ମୁମ୍ବାଇ,୧୮/୦୫: ନବନିଯୁକ୍ତ ଭାରତର ପ୍ରଧାନ ବିଚାରପତି (ସିଜେଆଇ) ବି.ଆର. ଗଭାଇ ରବିବାର ତାଙ୍କର ମହାରାଷ୍ଟ୍ର ଗସ୍ତ ସମୟରେ ପ୍ରୋଟୋକଲ ଅନୁପାଳନରେ ତ୍ରୁଟି ଉପରେ ଚିନ୍ତା ପ୍ରକାଶ କରିଛନ୍ତି। ସେ କହିଛନ୍ତି ଯେ ରାଜ୍ୟର ମୁଖ୍ୟ ଶାସନ ସଚିବ, ପୋଲିସ ମହାନିର୍ଦ୍ଦେଶକ ଏବଂ ପୋଲିସ କମିଶନରଙ୍କ ସମେତ ପ୍ରମୁଖ ରାଜ୍ୟ ଅଧିକାରୀମାନେ ତାଙ୍କୁ ମୁମ୍ବାଇରେ ପହଞ୍ଚିବା ପରେ ସ୍ୱାଗତ କରିବାକୁ ଅନୁପସ୍ଥିତ ଥିଲେ।
ମହାରାଷ୍ଟ୍ର ଏବଂ ଗୋଆର ବାର କାଉନସିଲ ଦ୍ୱାରା ସିଜେଆଇଙ୍କ ସମ୍ମାନରେ ଆୟୋଜିତ ଏକ ସମ୍ବର୍ଦ୍ଧନା କାର୍ଯ୍ୟକ୍ରମରେ ସମ୍ବୋଧନ ଦେଇ, ଗଭାଇ ଗଣତନ୍ତ୍ରର ତିନୋଟି ସ୍ତମ୍ଭ - ନ୍ୟାୟପାଳିକା, ବ୍ୟବସ୍ଥାପିକା ଏବଂ କାର୍ଯ୍ୟପାଳିକା ମଧ୍ୟରେ ପାରସ୍ପରିକ ସମ୍ମାନର ଗୁରୁତ୍ୱକୁ ଗୁରୁତ୍ୱାରୋପ କରିଥିଲେ। ପ୍ରଧାନ ବିଚାରପତି କହିଛନ୍ତି ଯେ,' "ଯେତେବେଳେ ମହାରାଷ୍ଟ୍ରର ଜଣେ ବ୍ୟକ୍ତି ଭାରତର ମୁଖ୍ୟ ବିଚାରପତି ହୁଅନ୍ତି ଏବଂ ପ୍ରଥମ ଥର ପାଇଁ ମହାରାଷ୍ଟ୍ର ଗସ୍ତ କରନ୍ତି, ହେଲେ ଏହି ସମୟରେ ଯଦି ରାଜ୍ୟର ମୁଖ୍ୟ ଶାସନ ସଚିବ, ପୋଲିସ ମହାନିର୍ଦ୍ଦେଶକ କିମ୍ବା ପୋଲିସ କମିଶନର ତାଙ୍କୁ ସ୍ୱାଗତ ସମୟରେ ଉପସ୍ଥିତ ରହିବାକୁ ଉପଯୁକ୍ତ ମନେ କରୁ ନାହାଁନ୍ତି, ତେବେ ସେମାନେ ଏ ବିଷୟରେ ଚିନ୍ତା କରିବାର ଆବଶ୍ୟକତା ରହିଛି।’’
ଏହା ବ୍ୟତୀତ, ସିଜେଆଇ ଗଭାଇ ଏହା ମଧ୍ୟ ଦର୍ଶାଇଛନ୍ତି ଯେ 'ପ୍ରୋଟୋକଲ କେବଳ ଏକ ଔପଚାରିକତା ନୁହେଁ, ବରଂ ସାମ୍ବିଧାନିକ କର୍ତ୍ତୃପକ୍ଷମାନେ ପରସ୍ପରକୁ ପ୍ରଦାନ କରୁଥିବା ସମ୍ମାନର ଏକ ପ୍ରତୀକ। ସେ ପୁଣି ଟିପ୍ପଣୀ ଦେଇଛନ୍ତି ଯେ, "ପ୍ରୋଟୋକଲ କିଛି ନୂଆ କଥା ନୁହେଁ - ଏହା ଗୋଟିଏ ସାମ୍ବିଧାନିକ ବିଧି ଦ୍ବାରା ଅନ୍ୟ ଜଣଙ୍କୁ ଦେଉଥିବା ସମ୍ମାନର ପ୍ରଶ୍ନ।"
ଗଭାଇ କହିଛନ୍ତି ଯେ 'ସେ ଏପରି ଛୋଟ ଛୋଟ ପ୍ରସଙ୍ଗରେ ଆଲୋଚନା କରିବାକୁ ଚାହୁଁ ନଥିଲେ ମଧ୍ୟ, ଲୋକମାନେ ଏହା ବିଷୟରେ ଜାଣିବା ପାଇଁ ମୁଁ ଏ ବିଷୟରେ ଉଲ୍ଲେଖ କରିବାର ଆବଶ୍ୟକତା ଅନୁଭବ କରିଥିଲି। "ଯଦି ମୋ ସ୍ଥାନରେ ଅନ୍ୟ କେହି ଥାଆନ୍ତେ, ତେବେ ଧାରା ୧୪୨ର ବ୍ୟବସ୍ଥା ବିଚାର କରାଯାଇଥାନ୍ତା।" ସୂଚନା ଥାଉକି, ଭାରତୀୟ ସମ୍ବିଧାନର ଧାରା ୧୪୨ ସୁପ୍ରିମକୋର୍ଟକୁ କୌଣସି ମାମଲାରେ ସମ୍ପୂର୍ଣ୍ଣ ନ୍ୟାୟ ପ୍ରଦାନ ପାଇଁ ଆବଶ୍ୟକୀୟ ଯେକୌଣସି ନିର୍ଦ୍ଦେଶ ଜାରି କରିବାକୁ କ୍ଷମତା ପ୍ରଦାନ କରେ। ଏହା ବ୍ୟକ୍ତିବିଶେଷଙ୍କ ଉପସ୍ଥିତିକୁ ସୁରକ୍ଷିତ ରଖିବାକୁ ପାଇଁ ନିର୍ଦ୍ଦେଶ ଜାରି କରିବାକୁ ମଧ୍ୟ କୋର୍ଟକୁ ଅଧିକାର ଦିଏ।
