ନୂଆଦିଲ୍ଲୀ,୧୮/୦୫: ଆମେରିକା ଯିବାର ସ୍ୱପ୍ନ ଦେଖୁଥିବା ଲୋକଙ୍କ ପାଇଁ ଏକ ପରାମର୍ଶ ଆସିଛି। ଏଥିରେ କୁହାଯାଇଛି ଯେ ଆପଣଙ୍କର କିଛି ଭୁଲ ଯୋଗୁଁ, ଆପଣଙ୍କ ଆମେରିକା ଯାତ୍ରା ଉପରେ ସ୍ଥାୟୀ ପ୍ରତିବନ୍ଧକ ଲାଗିପାରେ। ଭାରତରେ ଥିବା ଆମେରିକୀୟ ଦୂତାବାସ ଏହି ସୂଚନା ଦେଇଛି। ନିକଟ ଅତୀତରେ, ଆମେରିକୀୟ ଦୂତାବାସ ପ୍ରାୟ ୩ଟି ପୋଷ୍ଟ ସେୟାର କରିଛି ଯେଉଁଥିରେ ଏପରି କିଛି ଚେତାବନୀ ଦିଆଯାଇଛି। ଆମେରିକା ଦୂତାବାସ ଏହାର ପୋଷ୍ଟରେ ଚେତାବନୀ ଦେଇଛି ଯେ ଯଦି ଆପଣ ନିର୍ଦ୍ଧାରିତ ସମୟ ସୀମାଠାରୁ ଅଧିକ ସମୟ ପାଇଁ ଆମେରିକାରେ ରୁହନ୍ତି, ତେବେ ଆପଣଙ୍କୁ ଦେଶାନ୍ତର କରାଯିବ ଏବଂ ଆମେରିକାରେ ଆପଣଙ୍କ ପ୍ରବେଶ ଉପରେ ସ୍ଥାୟୀ ପ୍ରତିବନ୍ଧକ ଲଗାଯିବ।
ଟ୍ରମ୍ପଙ୍କ କାର୍ଯ୍ୟକାଳରେ କଠୋର ହୋଇଛି ନିୟମ:
ଉଲ୍ଲେଖଯୋଗ୍ୟ ଯେ, ଡୋନାଲ୍ଡ ଟ୍ରମ୍ପଙ୍କ ଦ୍ୱିତୀୟ କାର୍ଯ୍ୟକାଳରେ ଆମେରିକାରେ ପ୍ରବାସନ ନିୟମକୁ ଅଧିକ କଠୋର କରାଯାଇଛି। ନୂତନ ନୀତି ଅନୁଯାୟୀ, ଯେଉଁମାନେ ୩୦ ଦିନରୁ ଅଧିକ ସମୟ ପାଇଁ ଆମେରିକାରେ ରହୁଛନ୍ତି ସେମାନଙ୍କୁ ପଞ୍ଜୀକରଣ କରିବାକୁ ପଡ଼ବ। ପୂର୍ବରୁ ମଧ୍ୟ, ଆମେରିକୀୟ ଦୂତାବାସ ଏକ ପୋଷ୍ଟ ସେୟାର କରି କହିଥିଲା ଯେ ସରକାର ଠକେଇ ବିରୋଧରେ ଲଢ଼ିବା ଏବଂ ଅବୈଧ ପ୍ରବାସନକୁ ବନ୍ଦ କରିବା ପାଇଁ ପ୍ରୟାସ କରୁଛି। ଏହା ଅଧୀନରେ, ଭିସା ଜାଲିଆତିରେ ଦୋଷୀ ଲୋକଙ୍କ ପାଇଁ ଆମେରିକା ଯାତ୍ରା ଉପରେ ସ୍ଥାୟୀ ପ୍ରତିବନ୍ଧକ ଲଗାଇବା ପାଇଁ ଚେତାବନୀ ଦିଆଯାଇଥିଲା।
ତଥାପି, ଏହି ଚେତାବନୀ ଆମେରିକା କେବଳ ଭାରତୀୟଙ୍କ ପାଇଁ ଜାରି କରିନାହିଁ। ବରଂ ଏହି ସତର୍କତା ଆମେରିକା ଯାତ୍ରା କରୁଥିବା ପ୍ରତ୍ୟେକ ଦେଶର ନାଗରିକଙ୍କ ପାଇଁ ଉଦିଷ୍ଟ। କାର୍ଯ୍ୟ ଭିସା, ଛାତ୍ର ଭିସା ଏବଂ ପର୍ଯ୍ୟଟନ ଭିସାରେ ଯାତ୍ରା କରୁଥିବା ସମସ୍ତଙ୍କ ପାଇଁ ଏହି ଚେତାବନୀ ଜାରି କରାଯାଇଛି। ସୂଚନାଥାଉକି, ଡୋନାଲ୍ଡ ଟ୍ରମ୍ପ ଦ୍ବିତୀୟ ଥର ପାଇଁ ଆମେରିକାର ରାଷ୍ଟ୍ରପତି ହେବା ପରଠାରୁ ଆପ୍ରବାସନ ନୀତି, ଶୁଳ୍କ ବୃଦ୍ଧି ଏବଂ ଏବେ ଭିସାକୁ ନେଇ କଠୋର ଆଭିମୁଖ୍ୟ ଗ୍ରହଣ କରୁଛନ୍ତି।
