ଅହମ୍ମଦାବାଦ,୧୪।୬: ଅହମ୍ମଦାବାଦ ବିମାନ ଟ୍ରାଜେଡିରେ ମୃତ୍ୟୁ ସଂଖ୍ୟା ୨୭୪କୁ ବୃଦ୍ଧି । ମାତ୍ର ସରକାରୀ ଭାବେ ମୃତ୍ୟୁସଂଖ୍ୟା କେତେ ତାହା ସ୍ପଷ୍ଟ କରାଯାଇନାହିଁ । ମୃତକଙ୍କ ମଧ୍ୟରେ ୨୪୧ଜଣ ବିମାନ ଯାତ୍ରୀ ଅଛନ୍ତି । ସେମାନଙ୍କ ମଧ୍ୟରେ ୨୨୯ଜଣ ଯାତ୍ରୀ ଓ ୧୨ଜଣ କ୍ରୁ ସାମିଲ ରହିଛନ୍ତି । ସେହିଭଳି ଦୁର୍ଘଟଣା ସ୍ଥଳରେ ମଧ୍ୟ ୫୬ଜଣଙ୍କ ମୃତ୍ୟୁ ଘଟିଛି । ଏମାନଙ୍କ ମଧ୍ୟରେ ୧୦ଜଣ ଜୁନିୟର ଡାକ୍ତର ଥିବା ଜଣାପଡିଛି । ତେବେ ଏହି ଭୟଙ୍କର ଦୁର୍ଘଟଣାରେ ପ୍ରାଣ ଗୁଜରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନୀ । ମାତ୍ର ପାଉଁଶ ଭିତରରୁ ତାଙ୍କ ମୃତଦେହ ଚିହ୍ନଟ କରିବା ସମ୍ଭବ ହୋଇନାହିଁ । ଅହମ୍ମଦାବାଦ ସିଭିଲ ହସ୍ପିଟାଲରେ ଥିବା ୨୭୦ଟି ମୃତଦେହର ବ୍ୟବଚ୍ଛେଦ ସମ୍ପନ୍ନ ହୋଇଛି । ଏହି ମୃତଦେହ ମଧ୍ୟରୁ ମାତ୍ର ୮ଟିକୁ ଚିହ୍ନଟ କରି ସେମାନଙ୍କ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଛି । ଅନ୍ୟଗୁଡିକୁ ଚିହ୍ନଟ କରିବା ସମ୍ଭବ ହୋଇନାହିଁ । ତେଣୁ ସେଗୁଡିକର ଡିଏନ୍ଏ ନମୁନା ସଂଗ୍ରହ କରାଯାଇଛି । ୨୧୯ ମୃତକଙ୍କ ପରିବାର ସଦସ୍ୟଙ୍କ ଠାରୁ ଡିଏନ୍ଏ ସଂଗ୍ରହ ହୋଇଥିବା ଜଣାପଡିଛି । ଦୁର୍ଘଟଣାରେ ୫୦ଜଣ ଆହତ ହୋଇଛନ୍ତି । ସେମାନଙ୍କ ଚିକିତ୍ସା ସିଭିଲ ହସ୍ପିଟାଲରେ ଜାରି ରହିଛି ।
ଏପଟେ ବିମାନ ଦୁର୍ଘଟଣାର ତଦନ୍ତ ଆରମ୍ଭ ହୋଇଛି । ଏଥିରେ ୭ଟି ଟିମ୍ ସାମିଲ ହୋଇଛନ୍ତି । ସେମାନଙ୍କ ମଧ୍ୟରେ ଏନ୍ଆଇଏ, ଗୁଜରାଟ ପୁଲିସ, ଏଏଆଇବି, ଡିଜିସିଏ ବ୍ରିଟେନର ଏଏଆଇବି, ଆମେରିକାର ଏନ୍ଟିଏସ୍ବି ଏବଂ ଏଫଏଏ ପ୍ରମୁଖ ଅଛନ୍ତି । ବ୍ରିଟେନ ଓ ଆମେରିକାରୁ ତଦନ୍ତକାରୀ ଟିମ୍ ଆଜି ଏଠାରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ବିଜେ ମେଡିକାଲ କଲେଜର ହଷ୍ଟେଲରେ ରୋଷେଇ କରୁଥିବା ରୋଷେୟା ଠାକୁର ରବି କହିଛନ୍ତି, ଦୁର୍ଘଟଣା ପରେ ତାଙ୍କ ମା’ ଓ ଦୁଇବର୍ଷର ଝିଅ ନିଖୋଜ ଅଛନ୍ତି । ସୂଚନାଯୋଗ୍ୟ ଗୁରୁବାର ଅପରାହ୍ନରେ ଅହମ୍ମଦାବାଦରୁ ଲଣ୍ଡନ ଯାଉଥିବା ଏୟାର ଇଣ୍ଡିଆର ଏହି ବିମାନ ଉଡାଣର ମାତ୍ର ୩୦ ସେକେଣ୍ଡରେ ଦୁର୍ଘଟଣାଗ୍ରସ୍ତ ହୋଇଥିଲା । ଏଥିରେ ଥିବା ସମସ୍ତ ୨୪୨ ଯାତ୍ରୀ ଓ କ୍ରୁ ସଦସ୍ୟଙ୍କ ଭିତରୁ ୨୪୧ଙ୍କ ମୃତ୍ୟୁ ହୋଇଛି ।
