କଟକ, ୨୮/୧୨ : କଟକ ଜିଲ୍ଲା ବାରଙ୍ଗ ରତାଗଡ଼ରେ ହେବ ମେଟ୍ରୋ ରେଳ ପ୍ରକଳ୍ପର ଡିପୋ । ଏଥିପାଇଁ ରତାଗଡ଼ ଲେଙ୍କାସାହିରେ ଥିବା ପ୍ରାୟ ୨୦ ଏକର ଜମି ଚିହ୍ନଟ କରାଯାଇଛି । ପ୍ରସ୍ତାବିତ କ୍ୟାନସର୍ କେୟାର ପ୍ରୋଜେକ୍ଟ ବାତିଲ୍ ହେବା ପରେ ଏହି ଜମିକୁ ମେଟ୍ରୋ ରେଲ୍ ଡିପୋ ଭାବେ ବ୍ୟବହାର କରିବାକୁ ସରକାର ଯୋଜନା କରିଥିବା ସୂଚନା ମିଳିଛି । ଏହି ଜମି ଏବେ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପାଖରେ ରହିଛି । ବର୍ତ୍ତମାନ ଭୁବନେଶ୍ୱରରୁ କଟକଯାଏ ମେଟ୍ରୋ ରେଲ୍ ପ୍ରୋଜେକ୍ଟ କାର୍ଯ୍ୟକାରୀ ହେବାକୁ ଯାଉଛି । ଆସନ୍ତା ଜାନୁଆରୀରେ ମୁଖ୍ୟମନ୍ତ୍ରୀ ଏହାର ଶିଳାନ୍ୟାସ କରିବେ । ପ୍ରାୟ ସାଢେ ଚାରିହଜାର କୋଟି ଟଙ୍କାର ଏହି ପ୍ରକଳ୍ପ ଆରମ୍ଭ ହେବା ପରେ ଓଡ଼ିଶା ସଫଳତାର ଆଉ ଏକ ମାଇଲ୍ଖୁଣ୍ଟ ସ୍ଥାପନ କରିବ । କିନ୍ତୁ ଏତେ ବଡ ମେଟ୍ରୋ ରେଲ୍ ପ୍ରକଳ୍ପ ପାଇଁ ଡିପୋ ବା କାରଖାନାର ବି ଆବଶ୍ୟକତା ରହିଛି । ଯେଉଁଠି ମେଟ୍ରୋ ରେଲ୍ ପ୍ରକଳ୍ପର ବିଭିନ୍ନ ଉପକରଣ, ସାମଗ୍ରୀ ଓ ଯନ୍ତ୍ରାଂଶ ଆଦି ରହିପାରିବ । ତେଣୁ ଏକ ଡିପୋ ପାଇଁ ପ୍ରସ୍ତାବ ରହିଥିବା ବେଳେ ତ୍ରିଶୁଳିଆକୁ ସଂଯୋଗ କରୁଥିବା ବାରଙ୍ଗ ତହସିଲ ଅଧୀନରେ ଜମି ଖୋଜୁଥିଲା ପ୍ରଶାସନ ।
ଏହି କ୍ରମରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ଶାସନ ସଚିବ ଶାଲିନି ପଣ୍ଡିତ୍ ରାଜସ୍ୱ ବିଭାଗର ଅତିରିକ୍ତ ଶାସନ ସଚିବଙ୍କୁ ଚିଠି ଲେଖି କ୍ୟାନସର୍ ପ୍ରୋଜେକ୍ଟ ବାତିଲ୍ ସମ୍ପର୍କରେ ସୂଚନା ଦେବା ସହ ବିଭାଗ ପାଖରେ ଥିବା ଜମି ମାଲିକାନାକୁ ପୁନଶ୍ଚ ରାଜସ୍ୱ ବିଭାଗକୁ ଫେରାଇବାକୁ କହିଛନ୍ତି । ବାରଙ୍ଗ ରତାଗଡ଼ ଲେଙ୍କାସାହିରେ ୧୯ ଏକର ୪୦ ଡିସିମିଲ୍ ଜମି ଅଛି । ତିନୋଟି ଖାତାରେ ମିଶି ରହିଥିବା ଏହି ଘରବାଡ଼ି କିସମର ଜମିକୁ ଗୃହ ଓ ନଗର ଉନ୍ନୟନ ବିଭାଗକୁ ହସ୍ତାନ୍ତର କରାଯିବା ପରେ ଏଠାରେ ମେଟ୍ରୋ ରେଲ୍ ପ୍ରକଳ୍ପର ଡିପୋ କରାଯିବାକୁ ସ୍ଥିର ହୋଇଛି । ଅନ୍ୟପକ୍ଷରେ, ମେଟ୍ରୋ ରେଲ୍ ପ୍ରୋଜେକ୍ଟ କଟକ ନେତାଜୀ ବସ୍ ଟର୍ମିନାଲ୍ (ସିଏନ୍ବିଟି)କୁ ସଂଯୋଗ କରାଯିବାର ସମ୍ଭାବନା ନେଇ ଚର୍ଚ୍ଚା ହେଉଥିଲେ ହେଁ ଏବେ ଯାଏ ଯୋଜନା ସ୍ପଷ୍ଟ ହୋଇନାହିଁ । ଏ ସମ୍ପର୍କରେ ଜିଲ୍ଲାପାଳ ନରହରି ସେଠୀଙ୍କୁ ପଚାରିବାରେ ସେ କହିଛନ୍ତି, ସଂଯୋଗ ଯୋଜନା ସମ୍ପର୍କରେ ରାଜ୍ୟ ସରକାରଙ୍କ ତରଫରୁ ଜିଲ୍ଲା ପ୍ରଶାସନ ସହିତ କୌଣସି ଆଲୋଚନା ହୋଇନାହିଁ । ଏଣୁ ସିଏନ୍ବିଟିକୁ ମେଟ୍ରୋ ସଂଯୋଗ ଯୋଜନା ଏବେ ଆପାତତଃ ନାହିଁ । ପୁଣି, କଟକ ବେଲିଭ୍ୟୁ ଛକରୁ ତ୍ରିଶୂଳିଆକୁ ସଂଯୋଗ କରି କାଠଯୋଡ଼ି ଉପରେ ପ୍ରସ୍ତାବିତ ଦ୍ୱିତୀୟ ସେତୁ ଲାଗି ଟେଣ୍ଡର ବାତିଲ୍ ହୋଇନାହିଁ ବରଂ ସ୍ଥଗିତ ରଖାଯାଇଥିବା କଟକ ମେୟର ସୁବାସ ସିଂ କହିଛନ୍ତି ।
