ଅଞ୍ଜିର୍ ଏକ ହାଇଫ୍ରୁଟ୍ । ଯାହା ହାଲ୍କା ହଳଦିଆ ଓ ଗାଢା ସୁନେଲୀ ରଙ୍ଗର । ପୋଷକ ତତ୍ତ୍ୱରେ ଭରା ଏହି ଫଳ। ଖାଇବାକୁ ବେଶ୍ କୁରକୁରା ମଧ୍ୟ ଲାଗିଥାଏ । ଏହା ଅନେକ ରୋଗର ଉପଚାର ମଧ୍ୟ କରିଥାଏ । ଅଞ୍ଜିର୍ ଜିଙ୍କ୍, ମାଙ୍ଗାନିଜ୍, ମ୍ୟାଗ୍ନେସିୟମ୍, ଆଇରନ୍ ପରି ପୋଷକ ତତ୍ତ୍ୱରେ ଭରା। ଏଥିରେ ଆଣ୍ଟିଅକ୍ସିଡାଣ୍ଟ ଓ ଫାଇବର ମଧ୍ୟ ରହିଛି । ଅଞ୍ଜିରରେ ବହୁ ମାତ୍ରାର ପୋଟାସିୟମ୍ ରହିଥାଏ। ଯାହା ଶରୀରରେ ଶର୍କରାସ୍ତରକୁ ନିୟନ୍ତ୍ରିତ ରଖିଥାଏ । ଅଞ୍ଜିର ଖାଇବା ଦ୍ୱାରା ଟାଇପ୍-୨ ମଧୁମେହ ରୋଗୀର ଶର୍କରାସ୍ତର ନିୟନ୍ତ୍ରିତ ରହିଥାଏ । କେବଳ ମଧୁମେହ ନୁହେଁ, ଅନ୍ୟାନ୍ୟ କେତେକ ରୋଗକୁ ମଧ୍ୟ ଅଞ୍ଜିର୍ ନିୟନ୍ତ୍ରିତ କରିଥାଏ ।
ପାଚନତନ୍ତ୍ରକୁ ସୁସ୍ଥ ରଖେ: ଫାଇବରରେ ଭରା ଅଞ୍ଜିର୍ ପାଚନ ତନ୍ତ୍ରକୁ ସୁସ୍ଥ ରଖିଥାଏ । ଫଳରେ କବ୍ଚ ପରି ସମସ୍ୟା ଦୂର ହୋଇଥାଏ । କବ୍ଚ ଦୂର କରିବା ପାଇଁ ଅଞ୍ଜିର୍କୁ ଦୁଗ୍ଧରେ ଫୁଟାଇ ଖାଇପାରିବେ ।
ହାଇପର୍ଟେନ୍ସନ୍କୁ ନିୟନ୍ତ୍ରିତ କରେ: କମ୍ ପୋଟାସିୟମ୍ ଓ ଅଧିକ ସୋଡିୟମ୍ ଯୋଗୁଁ ହାଇପର୍ଟେନ୍ସନ୍ ସମସ୍ୟା ଦେଖାଦେଇଥାଏ । ଅଞ୍ଜିର୍ରେ ଅଧିକ ପୋଟାସିୟମ୍ ଓ କମ୍ ସୋଡିୟମ୍ ରହିଥାଏ । ତେଣୁ ଏହା ହାଇପର୍ଟେନ୍ସନରୁ ରକ୍ଷା କରିଥାଏ ।
ହାଡ଼କୁ ମଜଭୁତ୍ କରାଏ: ଅଞ୍ଜିର୍ରେ ବହୁ ମାତ୍ରାରେ କ୍ୟାଲସିୟମ୍ ରହିଥାଏ, ତେଣୁ ଏହାକୁ ନିୟମିତ ଖାଇବା ଦ୍ୱାରା ହାଡ଼ ମଜଭୁତ ହୋଇଥାଏ । ଏହାକୁ ଦୁଗ୍ଧ ସହ ଖାଇପାରିବେ ।
ଆସ୍ଥାମା ପାଇଁ ଉପଯୋଗୀ: ଆସ୍ଥମା ରୋଗୀଙ୍କ ପାଇଁ ଖୁବ୍ ଉପଯୋଗୀ । ଏହା କଫକୁ ସହଜରେ ବାହାରକୁ ବାହାର କରିଥାଏ । ଫଳରେ ରୋଗୀକୁ ଆରାମ ମିଳେ । ୨/୪ଟି ଶୁଖିଲା ଅଞ୍ଜିର୍କୁ ସକାଳ-ସଂଧ୍ୟାରେ ଦୁଗ୍ଧ ସହ ଗରମ କରି ପିଇବା ଦ୍ୱାରା କଫ କମିଥାଏ ।
ଥଣ୍ଡାର ଚିକିତ୍ସା କରେ: ପାଣିରେ ୫ ଖଣ୍ଡ ଅଞ୍ଜିର୍ ପକାଇ ଏହାକୁ ଫୁଟାଇ ନିଅନ୍ତୁ । ଏହି ପାଣିକୁ ଛାଣି ସକାଳେ ଓ ସଂଧ୍ୟାରେ କିଛିଦିନ ପାଇଁ ପିଅନ୍ତୁ । ଧୀରେ ଧୀରେ ଶରୀରରୁ ଥଣ୍ଡା ଦୂର ହୋଇଯିବ ।
