କଳାହାଣ୍ଡି,୨୧।୪ :  ଭବାନୀପାଟଣା ସହରରେ ଦିନ ଦିପହରେ ଡକାୟତି ଉଦ୍ୟମ l ଲଙ୍କା ଗୁଣ୍ଡ ସହିତ ବୋମା ପକାଇ ଟଙ୍କା ବ୍ୟାଗ ଝାମ୍ପି ନେବା ପାଇଁ ଉଦ୍ୟମ  । ପୋଲିସ ହାତରେ ଧରାପଡିଲେ ୫ ଅଭିଯୁକ୍ତ । ସେମାନେ ହେଲେ  ଗଞ୍ଜାମ ଜିଲ୍ଲା ସୋରାଡା  ବ୍ଲକର ଇଶାନ ନାୟକ,  ବ୍ରହ୍ମପୁରର ମନୁ ନାୟକ, ସୋରଡା କାଠଗଡା ସାହିର ବିରଞ୍ଚି ନାୟକ, ଭବାନୀପାଟଣା ସମ୍ଭୁନଗରପଡାର  ତ୍ରିଲୋଚନ ପ୍ରଧାନ,  ଗୋଦମାପଡାର ବାବୁ ଖାନ।  ସେମାନଙ୍କ ନିକଟରୁ ପୋଲିସ ଗୋଟିଏ ପଲସର ବାଇକ,  ବନ୍ଧୁକ, ୫ଟି ମୋବାଇଲ ଫୋନ ଜବତ କରିଛି। 

ସୂଚନା ଅନୁଯାୟୀ ଭବାନୀପାଟଣା ସଦର ଥାନା ଅନ୍ତର୍ଗତ ବଗିଚାପଡାର ଶରତ କୁମାର ବେହେରା ତାଙ୍କ ସାଙ୍ଗ ସହ ଟଙ୍କା ଜମା କରିବା ପାଇଁ ବ୍ୟାଙ୍କ କୁ ଯାଉଥିଲେ l ଭବାନୀପାଟଣା ମହାବୀରପଡା ନିକଟରେ ତିନି ଦୁର୍ବୃତ୍ତ ଏକ ପଲସର ବାଇକରେ ଆସି ତାଙ୍କ ଉପରେ ଲଙ୍କାଗୁଣ୍ଡ ଫିଙ୍ଗିବା ସହିତ ଗୋଟିଏ ବୋମା  ଫିଙ୍ଗିଥିଲେ । ଟଙ୍କା ବ୍ୟାଗ କୁ ଝାମ୍ପି ନେବା  ପାଇଁ ଚେଷ୍ଟା କରି ବିଫଳ ହୋଇଥିଲେ।  ବୋମ ଫୁଟିବା ଶବ୍ଦ ଶୁଣି ଲୋକେ ଜମା ହୋଇଯିବା ଫଳରେ ଦୁର୍ବୃତ୍ତମାନେ ସେଠାରୁ ଖସି ଯିବା ପାଇଁ ଚେଷ୍ଟା କରୁଥିବା ବେଳେ ଜଣଙ୍କୁ ଲୋକେ  କାବୁ କରିଥିଲେ। ଅନ୍ୟ ଦୁଇ ଜଣ ଫେରାର ହୋଇଯାଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ଜଣଙ୍କୁ ନେଇ ପଚରାଉଚରା କରିବା ସହ ଘଟଣାର ତଦନ୍ତ କରିଥିଲେ। ଏହି ଲୁଟ ଘଟଣାରେ ଜଡିତ ୫ ଜଣ ଅଭିଯୁକ୍ତଙ୍କୁ ଗିରଫ କରିଥିଲା।