ମାଲକାନଗିରି/କାଲିମେଳା, ୮/୧୧ : ମାଲକାନଗିରି ଜିଲ୍ଲା ସୀମାନ୍ତ ମୋଟୁ ତହସିଲ ଅଞ୍ଚଳରୁ ବାହାର ରାଜ୍ୟକୁ ଚୋରା ଚାଲାଣବେଳେ କୋଟି କୋଟି ଟଙ୍କାର ୪୦ଟନ ମୂଲ୍ୟବାନ ଧଳା କ୍ଵାର୍ଜ ପଥର, ୨ଟି ଟିପର ଗାଡି, ଗୋଟିଏ ଜେସିବି ମେସିନ, ଗୋଟିଏ ମଟର ସାଇକେଲ, ୮ଟି ମୋବାଇଲ ଫୋନ ଜବତ । ଏହି ଚୋରା ଚାଲାଣ ଅଭିଯୋଗରେ ଅନ୍ୟପ୍ରଦେଶର ୬ଜଣଙ୍କୁ ଗିରଫ କରିଛି ବନ ବିଭାଗ ।

ମୋଟୁ ତହସିଲ ଅଞ୍ଚଳରୁ ଟନ୍ ଟନ୍ ମୂଲ୍ୟବାନ ଧଳା କ୍ଵାର୍ଜ ପଥର ବାହାର ରାଜ୍ୟକୁ ଚାଲାଣ ହେଉଥିବା ଖବରପାଇ  ମାଲକାନଗିରି ବନଖଣ୍ଡ ଅଧିକାରୀଙ୍କ ନିର୍ଦ୍ଦେଶକ୍ରମେ ମୋଟୁ ବନାଞ୍ଚଳ ରେଞ୍ଜର ଓ ବନ କର୍ମଚାରୀ ଗ୍ରାମବାସୀଙ୍କ ସହ ମୋଟୁ ସୀମାନ୍ତ ଚେକପୋଷ୍ଟଠାରେ ପୂର୍ବରୁ ଜଗିଥିଲେ । ମାଲକାନଗିରି ଜିଲ୍ଲା ସୀମାନ୍ତ ମୋଟୁଠାରେ ଆଜି ଭୋର ୪ ଟାରେ ଏହି ପଥର ଚାଲାଣ ଗାଡି ଯାଉଥିବାବେଳେ ମୋଟୁ ଗ୍ରାମବାସୀ ଓ ମୋଟୁ ବନବିଭାଗ ମିଳିତ ଉଦ୍ୟମରେ ଧରିଥିଲେ। ଦୁଇଟି ଟିପ୍ପର ଗାଡ଼ିରୁ ୪୦ଟନ୍ କ୍ଵାର୍ଜ ଧଳା ମୂଲ୍ୟବାନ ପଥର ଜବତ କରାଯାଇଛି l ଏହାର ମୂଲ୍ୟ ପ୍ରାୟ କୋଟି କୋଟି ଟଙ୍କା ହେବ । ବିଶେଷ କରି ଦେଶ ବିଦେଶରେ ଏହି ପଥରର ଚାହିଦା ଅଧିକ l ଏହି ଧଳା କ୍ୱାର୍ଜ ପଥର ଦ୍ୱାରା ବୁଲେଟ ପ୍ରୁଫ ଜାକେଟ, ମୂଲ୍ୟବାନ କାଚ ତିଆରି ସାମଗ୍ରୀ ସହ ଅନ୍ୟାନ୍ୟ ସୌଖିନ ସାମଗ୍ରୀ, ଖେଳନା ନିର୍ମାଣ ହୋଇଥାଏ।

ଆଜି ସକାଳୁ ବନ ବିଭାଗର ଅଧିକାରୀ ପଥର ବୋଝଇ ୨ଟି ଟିପ୍ପର ଗାଡି, ଗୋଟିଏ ଜେସିବି, ପୋକଲୀନ, ମଟର ସାଇକେଲ, ୮ଟି ମୋବାଇଲ ଫୋନ ଜବତ ସହିତ ଗାଡିରେ ଥିବା ୬ଜଣଙ୍କୁ ଗିରଫ କରିଛି । ୫ଜଣ ଆନ୍ଧ୍ରପ୍ରଦେଶର ହୋଇଥିବାବେଳେ ଅନ୍ୟ ଜଣେ ବିହାର ରାଜ୍ୟର ବୋଲି ଜଣାପଡ଼ିଛି । ଏହି ଚାଲାଣକାରୀମାନଙ୍କୁ ଗିରଫ କରାଯାଇ ବନବିଭାଗ କାର୍ଯ୍ୟାଳୟକୁ ଅଣାଯାଇ ପଚରାଉଚରା ଚାଲିଛି । ଗିରଫ ବ୍ୟକ୍ତିମାନେ ହେଲେ ଆନ୍ଧ୍ରପ୍ରଦେଶ ଓ ବିହାରର କେ ନରସୀମା ରାଓ, ବୋରା କାନକାନାଗ ସତ୍ୟନାରାୟଣ, ମୁଣ୍ଡଗୁଲା ସନ୍ଦୀପ, ୟାର ପବନ କୁମାର, କେନେରୁ ଶ୍ରୀନିବାସ ରାଓ, ସତ୍ୟନ୍ଦ୍ର କୁମାରଏହି ଚୋରା ଚାଲାଣ ରେ ଆଉ କାହାର ସମ୍ପୃକ୍ତି ଅଛି କି ନାହିଁ ବନ ବିଭାଗ ପକ୍ଷରୁ ଅଧିକ ତଦନ୍ତ ଜାରି ରହିଥିବା ଏସିଏଫ ମୁନସୁନ ଖେମୁଣ୍ଡୁ କହିଛନ୍ତି।

ସୂଚନାଯୋଗ୍ୟ ଯେ, ମୋଟୁ ତହସିଲ ଅନ୍ତର୍ଗତ ପେଟା, ଆଲମା, ବିନାୟକପୁର ଅଞ୍ଚଳରେ ପ୍ରଚୁର ପରିମାଣର ମୂଲ୍ୟବାନ ଖଣିଜ ଦ୍ରବ୍ୟ ପାହାଡ଼ରେ ଭରପୁର ହୋଇ ରହିଛି । କିଛି ବ୍ୟବସାୟୀ ରାତିରେ ସୀମାନ୍ତ ମୋଟୁ ଚେକଗେଟ ପାର ହୋଇ ବାହାର ରାଜ୍ୟକୁ ଚୋରାଚାଲାଣ କରିଥାନ୍ତି । ସୀମାନ୍ତ ମୋଟୁଠାରେ ଗୋଟିଏ ମାତ୍ର ଚେକ ପୋଷ୍ଟ, ସେଠାରେ ଦିନ ରାତି ପୋଲିସ ମୁତୟନ ରହିଥାନ୍ତି l ପୋଲିସ ମୁତୟନ ଥାଇ ମଧ୍ୟ କେମିତି କୋଟି କୋଟି ଟଙ୍କାର ମୂଲ୍ୟବାନ କ୍ୱାର୍ଜ ପଥର ବାହାର ରାଜ୍ୟକୁ ଚାଲାଣ ହେଉଛି ବୋଲି ସ୍ଥାନୀୟ ଲୋକେ ପୁଲିସର କାର୍ଯ୍ୟକଳାପ ପ୍ରତି ସନ୍ଦେହ କରିଛନ୍ତି l