ଫିରିଙ୍ଗିଆ,୨୨/୦୭ : କନ୍ଧମାଳ ଜିଲ୍ଲା ଫିରିଙ୍ଗିଆ ପୋଲିସ ଦୁଇଟି କାର ଯାଞ୍ଚ କରି ୨୭ କିଲୋ ଗଞ୍ଜେଇ ଜବତ କରିଛି। ଏଥି ସହ ପାଞ୍ଚ ଜଣ ବିଟେକ ଛାତ୍ରଙ୍କୁ ଗିରଫ କରିଛି ।  ଗିରଫ ଛାତ୍ରମାନେ ହେଲେ ଯାଜପୁର ଜିଲ୍ଲା ବଡ଼ଚଣା ଥାନା ବଇରୀ ମଇଁଷିଗୋଠର ସଂଗ୍ରାମ ରାଉତ,  କେଉଁଝର ଜିଲ୍ଲା ଆନନ୍ଦପୁର ଥାନା ଫକୀରପୁର ଗାଁର ରଂଜିତ କୁମାର ପାତ୍ର, ଘସିପୁରା ଥାନା ଖାଇଲୋ ଗାଁର ବୁଦ୍ଧଦେବ ପଳେଇ ଓ ଘସିପୁରା ଥାନା ଅଁଳାପାଳ ଗାଁର ଓମପ୍ରତାପ ଓ ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଭୋବ୍ରା ଗାଁର ଦେବାଶିଷ ପ୍ରଧାନ ।

ସୋମବାର ସଂଧ୍ୟା ସମୟରେ ଫିରିଙ୍ଗିଆ ବାଲିଗୁଡା ରାସ୍ତାର ମାଶ୍ରୀପଡା ଛକ ନିକଟରେ  ପୁଲିସ ଗାଡି ମୋଟର ଯାଞ୍ଚ  କରୁଥିଲା। ଏହି ସମୟରେ ଦ୍ରୁତ ଗତିରେ ଆସୁଥିବା ଦୁଇଟି କାରକୁ ଅଟକାଇ ଯାଞ୍ଚ କରିଥିଲେ I କାରରୁ ଏକ ଗଞ୍ଜେଇ ଭର୍ତ୍ତି ବ୍ୟାଗ ବାହାରିଥିଲା I ଏଥିରେ ଭୟଭୀତ ହୋଇ କାରରେ ଥିବା ଛାତ୍ର ମାନେ ଫେରାର ହୋଇଯିବା ପାଇଁ ଚେଷ୍ଟା କରିଥିଲେ।  କିନ୍ତୁ କୌଶଳ କ୍ରମେ ପୋଲିସ ସେମାନଙ୍କୁ ଧରିବାରେ ସଫଳ ହୋଇଥିଲେ I ଅନ୍ୟପଟେ ଏହି ଘଟଣାରେ ଫିରିଙ୍ଗିଆ ଥାନାରେ ଏକ ମାମଲା ରୁଜୁ କରାଯାଇଥିବା ବେଳେ ମଙ୍ଗଳବାର ଗିରଫ ଛାତ୍ର ମାନଙ୍କୁ କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ଗୋପୀନାଥ ପ୍ରଧାନ ସୂଚନା ଦେଇଛନ୍ତି I