ବେଙ୍ଗାଲୁରୁ ୦୭/୫୧: ବୟଫ୍ରେଣ୍ଡ୍ଙ୍କୁ ଅଟକାଇବା ପାଇଁ ବିମାନବନ୍ଦରକୁ ମିଛ ଫୋନ୍ କରି ଫସିଛନ୍ତି ଗର୍ଲଫ୍ରେଣ୍ଡ୍ । ୨୯ ବର୍ଷୀୟା ମହିଳା ଜଣକ ବେଙ୍ଗାଲୁରୁର କେମ୍ପେଗୌଡ଼ା ଅନ୍ତର୍ଜାତୀୟ ବିମାନବନ୍ଦର ହେଲ୍ପଲାଇନ୍କୁ ଫୋନ୍ କରି କହିଲେ, ବିମାନବନ୍ଦରରୁ ମୁମ୍ବାଇ ଯାଉଥିବା ତାଙ୍କ ବୟଫ୍ରେଣ୍ଡ୍ଙ୍କ ବ୍ୟାଗ୍ରେ ବୋମା ଅଛି ତାଙ୍କୁ ଅଟକାନ୍ତୁ । ଘଟଣାଟି ଗତ ଜୁନ୍ ୨୬ ତାରିଖରେ ଘଟିଥିଲା । କିନ୍ତୁ ଗତ ବୁଧବାର ପୁଲିସ ମହିଳାଙ୍କ ବିରୋଧରେ ଧାରା ୫୦୫(୧) (ବି) ଅନ୍ତର୍ଗତ ଏକ ମାମଲା ରୁଜୁ କରିଛି । ଅଭିଯୁକ୍ତ ଇନ୍ଦ୍ରା ରାଜୱାର ପୁନେ ବାସିନ୍ଦା ହୋଇଥିବାବେଳେ ସେ ବେଙ୍ଗାଲୁରୁରେ କାମ କରନ୍ତି ।
ପୁଲିସ ରିପୋର୍ଟ ଅନୁସାରେ, ଇନ୍ଦ୍ରା ରାଜୱାର ଏୟାରପୋର୍ଟ ହେଲ୍ପଲାଇନ୍ ନମ୍ବରକୁ ଫୋନ୍ କରି କହିଲେ, ବେଙ୍ଗାଲୁରୁରୁ ମୁମ୍ବାଇ ଯାଉଥିବା ମିର ରଜା ମେହଦି ନାମକ ଯାତ୍ରୀ ନିଜ ବ୍ୟାଗ୍ରେ ବୋମା ରଖିଛନ୍ତି । ଯାତ୍ରୀ ଜଣକ ତାଙ୍କର ବୟଫ୍ରେଣ୍ଡ୍ ବୋଲି ସେ ଦାବି କଲେ । ଏହା ପରେ ମେହଦିଙ୍କୁ ବିମାନବନ୍ଦରରେ ଅଟକାଇ ବିସ୍ଫୋରକ ଖୋଜାଗଲା । ତାଙ୍କ ପାଖରୁ ବୋମା ନ ମିଳିବାରୁ ଫୋନ୍ କଲ୍ର ସତ୍ୟତା ନ ଥିବା ଘୋଷଣା କରାଗଲା । ସେ ଦିନ ରାଜୱାରଙ୍କୁ ମଧ୍ୟ ବିମାନବନ୍ଦରରେ ଠାବ କରାଗଲା । ଉଭୟ ଭିନ୍ନ ଭିନ୍ନ ବିମାନରେ ମୁମ୍ବାଇକୁ ଟିକେଟ୍ କରିଥିଲେ । ଉଭୟ ସନ୍ଧ୍ୟାରେ ବିମାନବନ୍ଦରକୁ ଆସିଥିଲେ । ରାଜୱାର ହେଲ୍ପଲାଇନ୍କୁ ମିଛ ଫୋନ୍ କଲ୍ କରିବା ପୂର୍ବରୁ ଦୁହେଁ ପ୍ରସ୍ଥାନ ଲାଉଞ୍ଜରେ ବସି କଥା ହେଉଥିଲେ । ଏହି କାଣ୍ଡ ପରେ ରାଜୱାରଙ୍କୁ କିଆ ପୁଲିସ ଗିରଫ କଲା । ପୁଲିସ ଅନୁସାରେ, ରାଜୱାର ଓ ମେହଦିଙ୍କ ମଧ୍ୟରେ କିଛି ମତଭେଦ ଥିଲା । ମେହଦି ମୁମ୍ବାଇକୁ ବିମାନ ଯାତ୍ରା କରୁଥିଲେ, କିନ୍ତୁ ରାଜୱର ତାଙ୍କୁ ଅଟକାଇବାକୁ ଚାହୁଁଥିଲେ ।
