ଥାଇରଏଡ୍ । ଏହା ବେକରେ ଥିବା ଏକ ଛୋଟ ଗ୍ରନ୍ଥି। ଯାହା ଗଳାର ଆଗ ଭାଗରେ ଆଦମସ୍ ଆପଲ୍ ତଳେ ଥାଏ । ଏହା ଶରୀରର ଏଣ୍ଡୋକ୍ରାଇନ୍ ସିଷ୍ଟମ୍ ପାଇଁ ଅତ୍ୟନ୍ତ ଜରୁରୀ କାରଣ ଏହା ମେଟାବୋଲିଜିମ୍ , ଶରୀର ବୃଦ୍ଧି ଏବଂ ବିକାଶକୁ ନିୟନ୍ତ୍ରଣ କରୁଥିବା ହରମୋନ୍ ଉତ୍ପାଦନ କରେ । ଥାଇରଏଡର ପ୍ରମୁଖ୍ୟ କାର୍ଯ୍ୟ ହେଉଛି ଶରୀରର ମେଟାବୋଲିଜିମ୍ ହାରକୁ ନିୟନ୍ତ୍ରଣ କରିବା । ଏହାକୁ ମେଟାବୋଲିଜିମର ମୁଖ୍ୟ ଗ୍ରନ୍ଥି ମଧ୍ୟ କୁହାଯାଏ । ଶରୀରର ମେଟାବୋଲିଜିମ୍ ହାରକୁ ନିୟନ୍ତ୍ରଣ କରିବା ପାଇଁ ଏହା ଥାଇରକ୍ସିନ୍ ଏବଂ ଟ୍ରାଇଓଡୋଥାଇରୋନିନ୍ ହରମୋନ୍ ଉତ୍ପାଦନ କରେ । ଯାହା ଶରୀରର କୋଷ ଗୁଡ଼ିକୁ ଶକ୍ତି ବ୍ୟବହାର କରିବାକୁ ନିର୍ଦ୍ଦେଶ ଦିଏ । ଥାଇରଏଡ୍ ସମସ୍ୟା ପାଇଁ ଔଷଧ ଜରୁରୀ, କିନ୍ତୁ ସଠିକ୍ ଖାଦ୍ୟପେୟ ମଧ୍ୟ ଏଥିରେ ବହୁତ ସାହାଯ୍ୟ କରିଥାଏ । ତେବେ କେଉଁ ଖାଦ୍ୟଗୁଡ଼ିକ ଥାଇରଏଡ୍ ରୋଗୀ ଖାଇବା ଉଚିତ୍ ଏବଂ କେଉଁଥିରୁ ଆପଣ ଦୂରେଇ ରହିବା ଉଚିତ୍ ଆସନ୍ତୁ ଜାଣବା ।
ଦହି ଏବଂ ଦୁଗ୍ଧଜାତ ଦ୍ରବ୍ୟ: ଏଥିରେ ଆୟୋଡିନ୍ ଏବଂ ଭିଟାମିନ୍ ଡି ଉଭୟ ରହିଥାଏ। ଭିଟାମିନ୍ ଡି’ର ଅଭାବରୁ ଅଟୋଇମ୍ୟୁନ୍ ଥାଇରଏଡ୍ ରୋଗ ହୋଇପାରେ। ତେଣୁ ଏହାକୁ ନିଜ ଖାଦ୍ୟରେ ନିଶ୍ଚିତ ଭାବରେ ସାମିଲ କରନ୍ତୁ।
ସାମୁଦ୍ରିକ ଶୈବାଳ ଖାଦ୍ୟ : ନୋରି, କେଲ୍ପ ଏବଂ ୱାକାମେ ଭଳି ସାମୁଦ୍ରିକ ଶୈବାଳରେ ପ୍ରଚୁର ପରିମାଣରେ ଆୟୋଡିନ୍ ଥାଏ । ଥାଇରଏଡ୍ ହରମୋନ୍ ତିଆରି ପାଇଁ ଆୟୋଡିନ୍ ଅତ୍ୟନ୍ତ ଜରୁରୀ । ଯଦି ଆପଣଙ୍କର ପୂର୍ବରୁ ଥାଇରଏଡ୍ ରୋଗ ଅଛି, ତେବେ ଏହାକୁ ଅଧିକ ଖାଇବାରୁ ଦୂରେଇ ରୁହନ୍ତୁ ।
ଅଣ୍ଡା: ଅଣ୍ଡାରେ ଆୟୋଡିନ୍ ଏବଂ ସେଲେନିୟମ୍ ସହିତ ଉଚ୍ଚମାନର ପ୍ରୋଟିନ୍ ମଧ୍ୟ ମିଳିଥାଏ । ଥାଇରଏଡ୍ ପାଇଁ ସମ୍ପୂର୍ଣ୍ଣ ଅଣ୍ଡା ଖାଇବା ଅଧିକ ଲାଭଦାୟକ ।
କେଉଁ ଖାଦ୍ୟରୁ ଦୂରେଇ ରହିବେ
ସୋୟା ଉତ୍ପାଦ: ଟୋଫୁ ଏବଂ ସୋୟା କ୍ଷୀର ଭଳି ସୋୟା ଉତ୍ପାଦଗୁଡ଼ିକ ଆପଣଙ୍କ ଥାଇରଏଡ୍ ଶୋଷଣରେ ବାଧା ସୃଷ୍ଟି କରିପାରେ । ଯଦି ଆପଣ ଥାଇରଏଡ୍ ଔଷଧ ଖାଉଛନ୍ତି, ତେବେ ଔଷଧ ଖାଇବାର କିଛି ଘଣ୍ଟା ମଧ୍ୟରେ ସୋୟା ଖାଆନ୍ତୁ ନାହିଁ ।
ଗ୍ଲୁଟେନ୍: ହାଶିମୋଟୋ ଥାଇରଏଡାଇଟିସ୍ ଭଳି ରୋଗ ଥିବା ଲୋକଙ୍କ ପାଇଁ ଗ୍ଲୁଟେନ୍ ସମସ୍ୟା ସୃଷ୍ଟି କରିପାରେ । ଯଦି ଆପଣଙ୍କୁ ଗ୍ଲୁଟେନ ସମ୍ବେଦନଶୀଳତା ଅଛି, ତେବେ ଡାକ୍ତରଙ୍କ ସହ ପରାମର୍ଶ କରି ଗ୍ଲୁଟେନ୍-ମୁକ୍ତ ଖାଦ୍ୟ ଗ୍ରହଣ କରିବା ଭଲ ହୋଇପାରେ ।
ପନିପରିବା: ବ୍ରୋକୋଲି, ବନ୍ଧାକୋବି ଭଳି ପନିପରିବାରେ ଗୋଇଟ୍ରୋଜେନ୍ ନାମକ ଏକ ପଦାର୍ଥ ଥାଏ । ଏହା ଥାଇରଏଡର ଆୟୋଡିନ୍ ଶୋଷିବା କ୍ଷମତାକୁ କମ୍ କରିପାରେ । ଯଦି ଆପଣଙ୍କର ଆୟୋଡିନ୍ ଅଭାବ ଅଛି, ତେବେ ଏହି ପନିପରିବାକୁ କମ୍ ମାତ୍ରାରେ ଖାଆନ୍ତୁ।
