ନୂଆଦିଲ୍ଲୀ: ମାଞ୍ଚେଷ୍ଟର ଟେଷ୍ଟର ଶେଷ ଇନିଂସରେ ଭାରତୀୟ ଅଲରାଉଣ୍ଡର ୱାଶିଂଟନ ସୁନ୍ଦର ଅତି ଚମତ୍କାର ପ୍ରଦର୍ଶନ କରିଛନ୍ତି । ତାଙ୍କ ଟେଷ୍ଟ କ୍ୟାରିୟରର ପ୍ରଥମ ଶତକ ହାସଲ କରିଛନ୍ତି । ତାଙ୍କ ଇନିଂସ ଯୋଗୁଁ ଭାରତୀୟ ଦଳ ମାଞ୍ଚେଷ୍ଟରର ଓଲ୍ଡ ଟ୍ରାଫୋର୍ଡ ଗ୍ରାଉଣ୍ଡରେ ଇଂଲଣ୍ଡ ବିପକ୍ଷରେ ମ୍ୟାଚ୍ ଡ୍ର କରିବାରେ ସଫଳ ହୋଇଛି । ଏହି ଇନିଂସରେ ୱାଶିଂଟନ ସୁନ୍ଦର ୫ ନମ୍ବରରେ ବ୍ୟାଟିଂ କରିବାକୁ ଆସିଥିଲା। ସେ ଏହି ସୁଯୋଗର ପୂର୍ଣ୍ଣ ଫାଇଦା ଉଠାଇ ଏକ ସ୍ମରଣୀୟ ଇନିଂସ ଖେଳିଛନ୍ତି । ଯେତେବେଳେ ୱାଶିଂଟନ ସୁନ୍ଦର ବ୍ୟାଟିଂ କରିବାକୁ ଆସିଥିଲେ, ସେତେବେଳେ ଟିମ୍ ଇଣ୍ଡିଆ ୧୮୮ ରନରେ ୩ ୱିକେଟ ହରାଇ ସାରିଥିଲା। ଏହା ପରେ, ସେ ଶୁଭମନ ଗିଲଙ୍କ ସହ ମିଶି ଇନିଂସକୁ ଆଗକୁ ନେଇଥିଲେ ଏବଂ ତା’ପରେ ରବୀନ୍ଦ୍ର ଜାଡେଜାଙ୍କ ସହ ଏକ ସ୍ମରଣୀୟ ଭାଗୀଦାରି କରିଥିଲେ ।
ଏହି ଇନିଂସରେ ୱାଶିଂଟନ ସୁନ୍ଦର ୨୦୬ ବଲ୍ ସାମ୍ନା କରିଥିଲେ ଏବଂ ଅପରାଜିତ ୧୦୧ ରନ୍ କରିଥିଲେ । ତାଙ୍କ ଇନିଂସରେ ୯ଟି ଚୌକା ଏବଂ ୧ଟି ଛକା ଅନ୍ତର୍ଭୁକ୍ତ । ୱାଶିଂଟନ ସୁନ୍ଦରଙ୍କ ଟେଷ୍ଟ କ୍ୟାରିଅର ୨୦୨୧ ମସିହାରେ ଆରମ୍ଭ ହୋଇଥିଲା ଏବଂ ତାଙ୍କୁ ତାଙ୍କର ପ୍ରଥମ ଅନ୍ତର୍ଜାତୀୟ ଶତକ ପାଇଁ ୪ ବର୍ଷ ଅପେକ୍ଷା କରିବାକୁ ପଡିଥିଲା।
ଏହି ଇନିଂସରେ ୱାଶିଂଟନ ସୁନ୍ଦର ମଧ୍ୟ ରବୀନ୍ଦ୍ର ଜାଡେଜାଙ୍କ ସହ ଏକ ଦୃଢ଼ ଭାଗୀଦାରି କରିଥିଲେ। ଉଭୟ ଖେଳାଳି ୩୩୪ଟି ବଲ୍ ଖେଳି ଅପରାଜିତ ୨୦୩ ରନ୍ ଯୋଡ଼ିଥିଲେ। ଉଭୟ ଖେଳାଳି ୨ରୁ ଅଧିକ ସେସନ୍ ବ୍ୟାଟିଂ କରିଥିଲେ ଏବଂ ଭାରତୀୟ ଟିମ୍ର କୌଣସି ୱିକେଟ୍ ଯାଇ ନଥିଲା। ୱାଶିଂଟନ ସୁନ୍ଦର SENA(ଦକ୍ଷିଣ ଆଫ୍ରିକା, ଇଂଲଣ୍ଡ, ନ୍ୟୁଜିଲାଣ୍ଡ ଏବଂ ଅଷ୍ଟ୍ରେଲିଆ) ଦେଶରେ ତାଙ୍କର ପ୍ରଥମ ଟେଷ୍ଟ ଶତକ ହାସଲ କରିବାରେ ୨୬ତମ ଭାରତୀୟ ହୋଇଛନ୍ତି । ଏହାସହ, ସେ ଭାରତ ପାଇଁ ଟେଷ୍ଟରେ ଶତକ ହାସଲ କରିବାରେ ୭୦ତମ ଖେଳାଳି ମଧ୍ୟ ହୋଇଛନ୍ତି ।
