ନୂଆଦିଲ୍ଲୀ,୧୬/୦୬: ବିମାନରେ ବସିବାକୁ ଟଙ୍କା ଦରକାର ହେଲେ ସୁରକ୍ଷିତ ଓହ୍ଲାଇବାକୁ ଭାଗ୍ୟ ବଳ ଦରକାର । ଭୟଙ୍କର ଅହମ୍ମଦାବାଦ ବିମାନ ଦୁର୍ଘଟଣାର ଦୁଃଖ ମନରୁ ଲିଭି ନାହିଁ । ରବିବାର କେଦାରନାଥରେ ଏକ ହେଲିକପ୍ଟର କ୍ରାସ ହୋଇ ୭ ଜଣଙ୍କର ମୃତ୍ୟୁ ହୋଇଛି । ଏଥିରେ ପାଇଲଟ କ୍ୟାପ୍ଟେନ୍ ରାଜବୀର ସିଂହଙ୍କ ସମେତ ୭ ଜଣଙ୍କର ମୃତ୍ୟୁ ହୋଇଥିଲା । ବିବାହର ୧୪ ବର୍ଷ ପରେ ପାଇଲଟ ରାଜବୀର ୪ ମାସ ତଳେ ଯାଆଁଳା ଶିଶୁପୁତ୍ରଙ୍କର ପିତା ହୋଇଥିଲେ । ଦୁଇ ପିଲାଙ୍କୁ କୋଳରେ ଧରି ଭଲରେ ଟିକେ ସ୍ନେହ କରିନଥିବେ ଦୁନିଆରୁ ବିଦାୟ ନେଇଛନ୍ତି ରାଜବୀର । କ୍ୟାପ୍ଟେନଙ୍କ ବିୟୋଗକୁ ନେଇ ପରିବାରରେ ଶୋକର ଛାୟା ଖେଳିଯାଇଛି ।
ଇଞ୍ଜିନ ବିମାନର ହାର୍ଟ ହେଲେ ପାଇଲଟ ତାର ଆତ୍ମା- ରାଜସ୍ଥାନ ଜୟପୁର ଶାସ୍ତ୍ରୀ ନଗରର ୩୭ ବର୍ଷୀୟ ରାଜବୀର ସିଂହ ଚୌହାନ ୨୦୨୪ରୁ ଆର୍ୟନ ଏଭିଏସନ୍ କମ୍ପାନୀ ସହ ଯୋଡ଼ି ହୋଇଥିଲେ । ସେ ୧୫ ବର୍ଷ ଭାରତୀୟ ସେନାରେ କାର୍ଯ୍ୟ କରିଛନ୍ତି । ତାଙ୍କର ଯଥେଷ୍ଟ ଉଡାଣ ଅଭିଜ୍ଞତା ରହିଛି । ହେଲେ ବିଧିର ବିଧାନ କିଛି ଅଲଗା ଥିଲା । ରବିରାର କେଦାରନାଥ ଗୌରୀକୁଣ୍ଡ ଜଙ୍ଗଲରେ ବେଲ୍ ୪୦୭ ହେଲିକପ୍ଟର ଦୁର୍ଘଟଣାରେ ପାଇଲଟ କ୍ୟାପ୍ଟେନ୍ ରାଜବୀର ସିଂହଙ୍କର ମୃତ୍ୟୁ ହୋଇଛି । ତାଙ୍କ ବିବାହକୁ ୧୪ ବର୍ଷ ହୋଇଥିଲା । ତାଙ୍କ ପତ୍ନୀ ଦୀପିକା ସେନାରେ ଲେପ୍ଟନାଣ୍ଟ କର୍ଣ୍ଣଲ ଭାବେ କାର୍ଯ୍ୟରତ । ୪ ମାସ ତଳେ ଯାଆଁଳା ଶିଶୁପୁତ୍ରଙ୍କ ପିତା ହୋଇଥିଲେ ରାଜବୀର । ହେଲେ ସବୁ ଖୁସି ପାଣି ଫୋଟକା ପରି ମିଳେଇ ଗଲା ।
ଅହମ୍ମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣାର ଦୁଃଖ ମନରୁ ଲିଭି ନ ଥିବା ବେଳେ ରବିବାର ଆଉ ଏକ ଦୁର୍ଘଟଣା ଘଟିଥିଲା । ଉତ୍ତରାଖଣ୍ଡର କେଦାରନାଥ ନିକଟ ଗୌରୀକୁଣ୍ଡରେ ହେଲିକପ୍ଟର କ୍ରାସ୍ରେ ପାଇଲଟ୍ଙ୍କ ସମେତ ସମସ୍ତ ୭ ଜଣ ଯାତ୍ରୀ ପ୍ରାଣ ହରାଇଥିଲେ । ମୃତକଙ୍କ ମଧ୍ୟରେ ଗୋଟିଏ ପରିବାରର ୩ ଜଣ ଥିଲେ । ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି ଦୁର୍ଘଟଣାର ଉଚ୍ଚସ୍ତରୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି ।
