ମୁମ୍ବାଇ,୧୬।୬: ମୁମ୍ବାଇର ଦୁଇ ନାମୀ ଇଣ୍ଟରନ୍ୟାସନାଲ ସ୍କୁଲକୁ ବୋମାରେ ଉଡାଇବା ଧମକ। ଯାହାଫଳରେ ସୃଷ୍ଟି ହୋଇଛି ଆତଙ୍କ। ସ୍କୁଲ ପ୍ରଶାସନକୁ ସୋମବାର ସକାଳେ ଧମକପୂର୍ଣ୍ଣ ଇ-ମେଲ୍ ଆସିଥିଲା। ଏହାପରେ ତା’ର ସୂଚନା ପୋଲିସକୁ ଦିଆଯାଇଥିଲା। ପୋଲିସ ଦୁଇ ସ୍କୁଲରେ ଯାଞ୍ଚ କରିବା ପରେ ମଧ୍ୟ କୌଣସି ସନ୍ଦିଗ୍ଧ କିମ୍ବା ବିସ୍ଫୋରକ ସାମଗ୍ରୀ ପାଇନଥିଲା।
ମୁମ୍ବାଇର ଦେଭନାର ସ୍ଥିତ କନାକିୟା ଇଣ୍ଟରନ୍ୟାସନାଲ ସ୍କୁଲ ଓ କାନ୍ଦିଭାଲିର ସମତାନଗର ସ୍ଥିତ ରାୟନ ଇଣ୍ଟରନ୍ୟାସନାଲ ସ୍କୁଲକୁ ଧମକପୂର୍ଣ୍ଣ ଇ-ମେଲ୍ ମିଳିଛି। ପୋଲିସ ମାମଲାର ଗମ୍ଭୀରତାକୁ ଦେଖି ଦେଭନାର ଓ ସମତାନଗର ପୋଲିସ ଷ୍ଟେସନ୍ରେ ଅଜଣାବ୍ୟକ୍ତିଙ୍କ ବିରୋଧରେ ମାମଲା ରୁଜୁ କରିଛି। ପୋଲିସ ଏବେ ଇ-ମେଲ୍ ପଠାଇଥିବା ବ୍ୟକ୍ତିର ସନ୍ଧାନରେ ରହିଛି। ଅଭିଯୁକ୍ତର ଚିହ୍ନଟ ପାଇଁ ଟେକ୍ନୋଲୋଜି ଓ ସାଇବର ଯାଞ୍ଚ କରାଯାଉଛି। ମୁମ୍ବାଇ ପୋଲିସ ଗୁଜବ ଉପରେ ବିଶ୍ବାସ ନକରିବାକୁ ଅପିଲ କରିଛି। ଯଦି କିଛି ସନ୍ଦିଗ୍ଧ ଗତିବିଧି ଦେଖାଯାଏ ତେବେ ତୁରନ୍ତ ପୋଲିସକୁ ସୂଚନା ଦେବାକୁ କୁହାଯାଇଛି।
ସ୍କୁଲ ପ୍ରଶାସନ ଶିକ୍ଷକ ଓ ଛାତ୍ରଙ୍କୁ ସତର୍କ ରହିବାକୁ କହିଛି। ପୋଲିସ ସହ ମିଶି ସ୍କୁଲ କ୍ୟାମ୍ପସର ସୁରକ୍ଷା ବଢାଇ ଦିଆଯାଇଛି। ଫଳରେ ଯେପରି କୌଣସି ଅଘଟଣକୁ ଏଡାଇ ଦିଆଯାଇ ପାରିବ। ଏଭଳି ଧମକପୂର୍ଣ୍ଣ ଇ-ମେଲ ପରେ ଅବିଭାବକ ମଧ୍ୟ ଚିନ୍ତିତ ଅଛନ୍ତି। ନିକଟରେ ମୁମ୍ବାଇ ସ୍ଥିତ ଆମେରିକୀୟ ବାଣିଜ୍ୟ ଦୂତାବାସକୁ ଧମକ ମିଳିବା ପରେ ଏବେ ସ୍କୁଲକୁ ନୂଆ ଧମକ ଚିନ୍ତା ବଢାଇ ଦେଇଛି।
