କାନପୁର: ଉତ୍ତର ପ୍ରଦେଶରେ ବନ୍ୟା ସଙ୍କଟ ମଧ୍ୟରେ ଯୋଗୀ ଆଦିତ୍ୟନାଥ ସରକାରଙ୍କ କ୍ୟାବିନେଟ ମନ୍ତ୍ରୀ ତଥା ନିଷାଦ ପାର୍ଟିର ନେତା ସଞ୍ଜୟ ନିଷାଦ ବନ୍ୟାଗ୍ରସ୍ତ ଗାଁରେ ଗଙ୍ଗାର ଜଳକୁ ‘ଆଶୀର୍ବାଦ’ ବୋଲି ଅଭିହିତ କରି ବିବାଦରେ ଫଶିଛନ୍ତି। ସୋମବାର କାନପୁର ଦେହାତର ବନ୍ୟାଗ୍ରସ୍ତ ଅଞ୍ଚଳ ପରିଦର୍ଶନ ସମୟରେ ସେ ସ୍ଥାନୀୟ ବନ୍ୟା ପୀଡ଼ିତଙ୍କୁ ସେ କହିଥିଲେ, “ଗଙ୍ଗା ମା ତୁମର ପାଦ ଧୋଇବା ପାଇଁ ତୁମ ଘର ଦ୍ୱାରକୁ ଆସିଛନ୍ତି, ଏହା ତୁମକୁ ସିଧା ସ୍ୱର୍ଗକୁ ନେଇଯିବ।” ଏହି ମନ୍ତବ୍ୟ ସାମାଜିକ ଗଣମାଧ୍ୟମରେ ଭାଇରାଲ ହେବା ପରେ ବିରୋଧୀ ଦଳ ଏହାକୁ ‘ଅସମ୍ବେଦନଶୀଳ’ ବୋଲି କହି ସମାଲୋଚନା କରିବା ଆରମ୍ଭ କରିଦେଇଛନ୍ତି।

ବିଭିନ୍ନ ସାମାଜିକ ଗଣମାଧ୍ୟମରେ ଭାଇରାଲ ହେଉଥିବା ଏକ ଭିଡିଓରେ ଦେଖାଯାଇଛି ଯେ, ମନ୍ତ୍ରୀ ନିଷାଦ ବନ୍ୟା ଜଳରେ ଠିଆ ହୋଇଥିବା ଜଣେ ମହିଳାଙ୍କୁ ଏହି ମନ୍ତବ୍ୟ ଦେଉଛନ୍ତି। ଜବାବରେ ଜଣେ ବୟସ୍କା ମହିଳା ତାଙ୍କୁ କହୁଛନ୍ତି, “ତୁମେ ନିଜେ ଗଙ୍ଗାର ଆଶୀର୍ବାଦ ନିଅ।” ଏହି ଘଟଣା ସାମାଜିକ ଗଣମାଧ୍ୟମରେ ବ୍ୟାପକ ଆଲୋଚନାର ବିଷୟ ହୋଇଛି। ସମାଜବାଦୀ ପାର୍ଟିର ମୁଖପାତ୍ର ଶରବେନ୍ଦ୍ର ବିକ୍ରମ ସିଂହ କହିଛନ୍ତି, “ଏହା ମନ୍ତ୍ରୀଙ୍କର ଅସମ୍ବେଦନଶୀଳତାକୁ ଦର୍ଶାଉଛି। ଯେତେବେଳେ ଲୋକେ ବନ୍ୟା ଯୋଗୁ ଘର ଓ ଜୀବିକା ହରାଉଛନ୍ତି, ସେତେବେଳେ ଏଭଳି ମନ୍ତବ୍ୟ ସରକାରର ବାସ୍ତବତା ସହ ସମ୍ପର୍କ ନଥିବା ଦର୍ଶାଉଛି।” 

ବିବାଦ ବଢ଼ିବା ପରେ ମନ୍ତ୍ରୀ ନିଷାଦ ସ୍ପଷ୍ଟୀକରଣ ଦେଇ କହିଛନ୍ତି ଯେ, ତାଙ୍କ ମନ୍ତବ୍ୟ ହାଲୁକା ଭାବରେ ଦିଆଯାଇଥିଲା। ସେ କହିଛନ୍ତି, “ମୁଁ ନିଷାଦ ସମ୍ପ୍ରଦାୟର ବନ୍ୟାଗ୍ରସ୍ତ ଅଞ୍ଚଳ ପରିଦର୍ଶନ କରୁଥିଲି, ଯେଉଁଠାରେ ମୁଁ କହିଥିଲି ଯେ ମୋକ୍ଷ ପାଇଁ ଲୋକେ ଦୂରରୁ ଗଙ୍ଗାରେ ସ୍ନାନ କରିବାକୁ ଆସନ୍ତି, କିନ୍ତୁ ଏଠାରେ ଗଙ୍ଗା ମା ନିଜେ ତୁମ ଦ୍ୱାରକୁ ଆସିଛନ୍ତି। ନିଷାଦ ସମ୍ପ୍ରଦାୟ ନଦୀକୁ ପୂଜା କରେ, କାରଣ ଏହା ଆମର ଜୀବନ ଓ ଜୀବିକାର ଉତ୍ସ।” ସେ ଆହୁରି ଉଲ୍ଲେଖ କରିଛନ୍ତି ଯେ, ପ୍ରୟାଗରାଜର ଜଣେ ନିଷାଦ ସମ୍ପ୍ରଦାୟର ପୁଲିସ ଅଧିକାରୀ ଚନ୍ଦ୍ରଦୀପ ନିଷାଦଙ୍କର ଭିଡିଓ, ଯେଉଁଥିରେ ସେ ବନ୍ୟା ଜଳକୁ ଗଙ୍ଗା ମୈୟା ଭାବେ ପୂଜା କରୁଛନ୍ତି, ତାଙ୍କ ମନ୍ତବ୍ୟରେ ପ୍ରେରଣା ଯୋଗାଇଛି।

ପରିଦର୍ଶନ ସମୟରେ ମନ୍ତ୍ରୀ ପ୍ରଶାସନ ସହ ମିଶି ବନ୍ୟା ପୀଡ଼ିତଙ୍କୁ ରିଲିଫ ସାମଗ୍ରୀ ବଣ୍ଟନ କରିଥିଲେ। ତେବେ, ତାଙ୍କ ମନ୍ତବ୍ୟକୁ ନେଇ କଂଗ୍ରେସ ଓ ସମାଜବାଦୀ ପାର୍ଟି ତୀବ୍ର ସମାଲୋଚନା କରିବା ଆରମ୍ଭ କରିଦେଇଛନ୍ତି। କଂଗ୍ରେସ ନେତାମାନେ ଏହାକୁ ‘ଅସମ୍ବେଦନଶୀଳ’ ବୋଲି କହିଥିବା ବେଳେ, ସମାଜବାଦୀ ପାର୍ଟି ସରକାରଙ୍କୁ ବନ୍ୟା ପୀଡ଼ିତଙ୍କୁ ସରକାର ପର୍ଯ୍ୟାପ୍ତ ରିଲିଫ ଯୋଗାଇବାରେ ବିଫଳ ହୋଇଛନ୍ତି ବୋଲି ଅଭିଯୋଗ କରିଛନ୍ତି। 

ଉତ୍ତର ପ୍ରଦେଶରେ ଗଙ୍ଗା ଓ ଯମୁନା ନଦୀର ଜଳସ୍ତର ବିପଦ ଚିହ୍ନ ଉପରେ ରହିଥିବା ବେଳେ, ପ୍ରୟାଗରାଜ ସମେତ ୧୭ଟି ଜିଲ୍ଲାରେ ବନ୍ୟା ପରିସ୍ଥିତି ଗମ୍ଭୀର ରହିଛି। ହଜାର ହଜାର ପରିବାର ବିସ୍ଥାପିତ ହୋଇଛନ୍ତି ଏବଂ ରିଲିଫ କ୍ୟାମ୍ପରେ ଆଶ୍ରୟ ନେଇଛନ୍ତି। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ୧୨ଟି ଜିଲ୍ଲାରେ ରିଲିଫ କାର୍ଯ୍ୟ ପାଇଁ ‘ଟିମ-୧୧’କୁ ନିୟୋଜିତ କରିଛନ୍ତି। ଏହି ଘଟଣା ରାଜ୍ୟରେ ବନ୍ୟା ପରିଚାଳନା ଓ ସରକାରୀ ନେତାଙ୍କ ଦାୟିତ୍ୱବୋଧ ଉପରେ ନୂଆ ବିତର୍କ ସୃଷ୍ଟି କରିଛି।