ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ବସିଥିବା କେନ୍ଦ୍ର କ୍ୟାବିନେଟ୍ରେ ବଡ଼ ନିଷ୍ପତ୍ତି ନିଆଯାଇଛି । ଭାରତୀୟ ମହକାଶ ଗବେଷଣା କ୍ଷେତ୍ର ପାଇଁ ବଡ଼ ଘୋଷଣା କରାଯାଇଛି । ଆନ୍ଧ୍ର ପ୍ରଦେଶର ଶ୍ରୀହରିକୋଟାରେ ଥିବା ସତୀଶ ଧାଓ୍ବନ ମହକାଶ କେନ୍ଦ୍ରରେ ତୃତୀୟ ଲଞ୍ଚ ପ୍ୟାଡ୍ (ଟିଏଲପି) ପ୍ରତିଷ୍ଠାକୁ କେନ୍ଦ୍ର କ୍ୟାବିନେଟ୍ ମଞ୍ଜୁରି ଦେଇଛି । ଏହା ଦ୍ବାରା ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ)କୁ ନେକ୍ସଟ ଜେନେରେସନ୍ ଲଞ୍ଚ ଭେଇକିଲ (ଏନଜିଏଭି) ଉତକ୍ଷେପଣ ଦିଗରେ ସାହାଯ୍ୟ ମିଳିବ ଏବଂ ଦ୍ବିତୀୟ ଲଞ୍ଚ ପ୍ୟାଡ୍ ପାଇଁ ଏହା ଏକ ବ୍ୟାକଅପ୍ ଭାବରେ କାର୍ଯ୍ୟ କରିବ । ଭବିଷ୍ୟତରେ ମହକାଶକୁ ମଣିଷ ଯିବା ମିଶନ ଲାଗି ଟିଏଲପି ସହାୟକ ହେବ ବୋଲି କୁହାଯାଉଛି ।
ମିଳିଥିବା ସୂଚନା ଅନୁସାରେ, ନୂଆ ଲଞ୍ଚ ପ୍ୟାଡ୍ ୪୮ ମାସ ମଧ୍ୟରେ କାର୍ଯ୍ୟକ୍ଷମ ହେବ । ୨୫-୩୦ ବର୍ଷ ପର୍ଯ୍ୟନ୍ତ ଏହି ଟିଏଲପି ମାଧ୍ୟମରେ ବିଭିନ୍ନ ମହାକାଶ ମିଶନ୍ ଲଞ୍ଚ ହେବ । ତୃତୀୟ ଲଞ୍ଚ ପ୍ୟାଡ୍ ନିର୍ମାଣ ଲାଗି ୩,୯୮୪.୮୬ କୋଟି ଟଙ୍କା ମଞ୍ଜୁର କରିଛି କେନ୍ଦ୍ର କ୍ୟାବିନେଟ୍ । ମାନବ ଅନ୍ତରୀକ୍ଷ ଉଡ଼ାଣ ଏବଂ ଅନ୍ତରୀକ୍ଷ ଗବେଷଣା ଲକ୍ଷ୍ୟ ପୂରଣ କରିବା ଦିଗରେ ଏହା ଫଳପ୍ରଦ ସାବ୍ୟସ୍ତ ହେବ ବୋଲି କୁହାଯାଉଛି ।
The Union Cabinet, chaired by PM Shri Narendra Modi, has approved the establishment of a Third Launch Pad (TLP) at ISRO's Satish Dhawan Space Centre, Sriharikota.
— ISRO (@isro) January 16, 2025
This will support Next Generation Launch Vehicles, future human spaceflight missions and augmenting the LVM-3…
ଏବେ ଶ୍ରୀହରିକୋଟାରେ ଦୁଇଟି ଲଞ୍ଚ ପ୍ୟାଡ୍ ରହିଛି । ପ୍ରଥମ ଲଞ୍ଚ ପ୍ୟାଡ୍ ୩୦ ବର୍ଷ ତଳେ ନିର୍ମାଣ ହୋଇଥିବା ବେଳେ ଏହା ଦ୍ବାରା ପିଏସଏଭି ଏବଂ ଏସ୍ଏସଏଲଭି ମିଶନ୍ ଲଞ୍ଚ ହୋଇପାରୁଛି । ସେହିଭଳି ଦ୍ବିତୀୟ ଲଞ୍ଚ ପ୍ୟାଡ୍ ଜିଏସ୍ଏଲଭି ଏବଂ ଏଲଭିଏମ୩ ମିଶନ ପାଇଁ ଡିଜାଇନ୍ କରାଯାଇଛି । ଏହି ଲଞ୍ଚ ପ୍ୟାଡ୍ ବାଣିଜ୍ୟିକ ଏବଂ ଅନ୍ୟ ମିଶନ ଲାଗି ମଧ୍ୟ ବ୍ୟବହାର ହେଉଛି । ଦ୍ବିତୀୟ ଲଞ୍ଚ ପ୍ୟାଡ୍ରୁ ଚନ୍ଦ୍ରଯାନ-୩ ମିଶନ ଲଞ୍ଚ ହୋଇଥିଲା । ତେବେ ଭବିଷ୍ୟତରେ ଆହୁରି ଅଧିକ ଓଜନର ପେଲୋଡ୍ ମହାକାଶକୁ ନେବା ଲାଗି ତୃତୀୟ ଲଞ୍ଚ ପ୍ୟାଡ୍ ସହାୟକ ହେବ ।
