ନୀଳଗିରି,୧୦/୮ : ନୀଳଗିରି ଅଞ୍ଚଳରେ ଥିବା କୁଳଡିହା ଅଭୟାରଣ୍ୟରେ ଶିକାରୀଙ୍କ ପ୍ରାଦୁର୍ଭାବ ବୃଦ୍ଧି ହୋଇ ଚାଲିଛି। ବନ୍ୟଜନ୍ତୁଙ୍କ ଜୀବନ ପ୍ରତି ବିପଦ ଘାରୁଥିବାବେଳେ ବନବିଭାଗ ସୁରକ୍ଷା ଯୋଗାଇବା ପାଇଁ ପାଟ୍ରୋଲିଂ କରୁଥିବା ବେଳେ ଶିକାରୀମାନେ ଖାତିର ନ କରି ଅଭୟାରଣ୍ୟରେ ଶିକାର କରୁଛନ୍ତି।
ଆଜି କୁଳଡିହା ଅଭୟାରଣ୍ୟରେ କିଛି ଶିକାରୀ ଶିକାର କରିବା ପାଇଁ ଯାଇଥିବା ବିଶେଷ ସୂତ୍ରରୁ ଖବରପାଇ ରେଞ୍ଜର ଦାୟିତ୍ୱରେ ଥିବା ଏସିଏଫ ସୁବ୍ରତ ବେହେରା ଏକ ଟିମ ନେଇ ଅଚାନକ ଚଢ଼ଉ କରିଥିଲେ । ଡେଙ୍ଗୁଚୁଖାଲ ଅଞ୍ଚଳରେ ଦୁଇ ଜଣ ଶିକାରୀଙ୍କୁ ଗିରଫ କରିବା ସହ ତାଙ୍କ ପାଖରୁ ଏକ ଦେଶୀ ବନ୍ଧୁକ, ଗୋଳାବାରୁଦ ଓ ଯନ୍ତ୍ରାଂଶ ଜବତ କରିଛନ୍ତି । ଗିରଫ ଶିକାରୀମାନେ ହେଲେ ନୀଳଗିରି ବ୍ଲକ ସିଆଡିମାଳ ପଞ୍ଚାୟତ ଅଧିନ ସିନ୍ଦୁରିଆ ଗ୍ରାମର ସାନିଆ ସିଂ ଓ ଡେଙ୍ଗୁଚୁଖାଲ ଅଞ୍ଚଳର ହଗୁରୁ ସିଂ। ଏ ନେଇ ବନବିଭାଗ ଏକ ମାମଲା ରୁଜୁକରି ଉଭୟଙ୍କୁ କୋର୍ଟ ଚାଲାଣ କରାଯାଇଛି ।
