କୋଲକାତା: ପଶ୍ଚିମବଙ୍ଗରେ ସ୍କୁଲ ଶିକ୍ଷକଙ୍କ ନିଯୁକ୍ତିରେ ଦୁର୍ନୀତି ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ଆକ୍ସନ ମୁଡ୍‌ରେ ଆସିଛି  । ପଶ୍ଚିମବଙ୍ଗର ମୁର୍ଶିଦାବାଦ ଜିଲ୍ଲାର ବରୱାନ ବିଧାନସଭା ଆସନରୁ ତୃଣମୂଳ କଂଗ୍ରେସ ବିଧାୟକ ଜୀବନ କୃଷ୍ଣ ସାହାଙ୍କୁ ଇଡି ଗିରଫ କରିଛି। ବିଧାୟକ ଜୀବନ କୃଷ୍ଣ ସାହାଙ୍କ ବାସଭବନରେ ଇଡି ଚଢ଼ାଉ କରିବା ସହ ତାଙ୍କୁ ଗିରଫ କରିଥିବା ଜଣାପଡ଼ିଛି । ସହାୟକ ଶିକ୍ଷକ ନିଯୁକ୍ତି ଦୁର୍ନୀତି ସହ ଜଡିତ ତଦନ୍ତ ସମୟରେ ଏହି ଗିରଫଦାରୀ ହୋଇଛି । 

ଯେତେବେଳେ ଇଡି ଟିମ୍‌ ବିଧାୟକ ସାହାଙ୍କ ଘରେ ପହଞ୍ଚିଲା, ସେ ହଠାତ୍ ପ୍ରଥମ ମହଲାରୁ ଡେଇଁ ପଡ଼ିଥିଲେ ।  କାନ୍ଥ ଡେଇଁ ଖସିଯିବାକୁ ଚେଷ୍ଟା କରିଥିଲେ। ଇଡି ଟିମ୍ ତାଙ୍କୁ ଘଟଣାସ୍ଥଳରୁ ଧରି ପକାଇଥିଲା। ଏହି ସମୟରେ ସେ ତାଙ୍କ ମୋବାଇଲ୍ ଫୋନ୍ ପାଖରେ ଥିବା ଏକ ଡ୍ରେନକୁ ଫିଙ୍ଗି ଦେଇଥିଲେ । କିନ୍ତୁ ଇଡି ଅଧିକାରୀମାନେ ତୁରନ୍ତ ଏହାକୁ ଉଦ୍ଧାର କରିଥିଲେ । ଇଡି ବିଧାୟକଙ୍କ ଘର ଏବଂ ତାଙ୍କ ନିକଟତମ ଲୋକଙ୍କ ଘରେ ଚଢ଼ାଉ କରିଥିଲା । 

ତଦନ୍ତକାରୀ ସଂସ୍ଥା ସନ୍ଦେହ କରୁଛି ଯେ, ସାହା ଏବଂ ତାଙ୍କ ନିକଟତମ ଲୋକଙ୍କ ପାଖରେ ନିଯୁକ୍ତି ଦୁର୍ନୀତି ସହିତ ଜଡିତ ଅନେକ ଗୁରୁତ୍ୱପୂର୍ଣ୍ଣ ପ୍ରମାଣ ରହିଛି । ଗିରଫ ପରେ ଇଡି ଟିମ୍ ତାଙ୍କୁ ପଚରାଉଚରା ପାଇଁ ନିଜ ସହିତ ନେଇଛି ।  ଏହି ମାମଲାରେ ଆହୁରି ନାମ ସାମ୍ନାକୁ ଆସିପାରେ। ପ୍ରବର୍ତ୍ତନ ନିର୍ଦ୍ଦେଶାଳୟ ଦଳ ସୂଚନା ଦେଇଛି ଯେ, ସ୍କୁଲ ଶିକ୍ଷକ ନିଯୁକ୍ତି ଦୁର୍ନୀତି ସହିତ ଜଡିତ ତଦନ୍ତ ସମୟରେ ବୀରଭୂମି ଜିଲ୍ଲାର ଜଣେ ବ୍ୟକ୍ତିଙ୍କ ଦ୍ୱାରା ଟଙ୍କା କାରବାରର ସୂଚନା ମିଳିଥିଲା । 

ଏହି ସୂଚନା ଆଧାରରେ ଚଢାଉ କରାଯାଇଥିଲା। ଅଧିକାରୀଙ୍କ ଅନୁଯାୟୀ, ବୀରଭୂମିର ଜଣେ ବ୍ୟକ୍ତି ଆଜି ସକାଳେ ଇଡି ଅଧିକାରୀମାନଙ୍କ ସହିତ ବିଧାୟକ ସାହାଙ୍କ ବାସଭବନରେ ପହଞ୍ଚିଥିଲେ। ପୂର୍ବରୁ ଏଜେନ୍ସି ଏହି ଠକେଇ ସମ୍ପର୍କରେ ବିଧାୟକ ସାହାଙ୍କ ପତ୍ନୀଙ୍କୁ ମଧ୍ୟ ପଚରାଉଚରା କରିଥିଲା ।