ନୂଆଦିଲ୍ଲୀ ୨୧/୦୩: ପ୍ରତ୍ୟେକ ଗଛର ମଞ୍ଜି ରହିଥାଏ। ଫଳର ଆକାର ଅନୁସାରେ ମଞ୍ଜି ଛୋଟ ବା ବଡ ହୋଇଥାଏ। କିନ୍ତୁ ଏପରି ଏକ ମଞ୍ଜି ରହିଛି, ଯାହାର ଓଜନ ୪୦ କେଜି। ଏହାକୁ ବିଶ୍ୱର ସବୁଠୁ ବଡ ମଞ୍ଜି ବୋଲି କୁହାଯାଉଛି। ଏହି ମଞ୍ଜିର ନାମ ‘କୋକୋ ଡେ ମେର’। ଏହି ମଞ୍ଜିର ଓଜନ ୧୫ରୁ ୩୦ କେଜି ମଧ୍ୟରେ ହୋଇଥାଏ। କିନ୍ତୁ କେତେକ କ୍ଷେତ୍ରରେ ଏହାର ଓଜନ ବୃଦ୍ଧି ପାଇ ୪୦ କିଲୋଗ୍ରାମ ପର୍ଯ୍ୟନ୍ତ ହୋଇଥାଏ। ଏହାର ଲମ୍ବ ୪୦ରୁ ୫୦ ସେଣ୍ଟିମିଟର ହୋଇଥିବାବେଳେ ଓସାର ୩୦ ସେଣ୍ଟିମିଟର ହୋଇଥାଏ। କେବଳ ସେତିକି ନୁହେଁ ଏହାର ଆକାର ମଧ୍ୟ ସ୍ୱତନ୍ତ୍ର। ଏହା ଦୁଇଟି ଭାଗରେ ବାଣ୍ଟି ହୋଇଥିବା ଭଳି ଦୃଶ୍ୟମାନ ହୋଇଥାଏ। ତେଣୁ ଏହାକୁ ଦ୍ୱିଖଣ୍ଡି ସଂରଚନା ବୋଲି କୁହାଯାଏ। ଏହାର ବାହାର ଆବରଣ ବେଶ୍ ବଡ, ଶକ୍ତ ଓ ପାଉଁଶିଆ ରଙ୍ଗର ହୋଇଥାଏ।
ଏହି ଗଛ ମୁଖ୍ୟତଃ ସିଚେଲ୍ସ, କ୍ୟୁରିୟସରେ ଦେଖିବାକୁ ମିଳିଥାଏ। ୧୬୦୦-୧୭୦୦ ଶତାବ୍ଦୀରେ ନାବିକମାନେ ଏହି ମଞ୍ଜିକୁ ମହାସାଗରରୁ ପାଇଥିଲେ। ସେତେବେଳେ ନାବିକମାନେ ଏହାକୁ ନଡିଆ ବୋଲି ଭାବିଥିଲେ। କିନ୍ତୁ ୧୮୦୦ ଶତାବ୍ଦୀରେ ସିଚେଲ୍ସରେ ଏହାକୁ ସନ୍ଧାନ କରାଯିବା ପରେ ସେତେବେଳେ ଏହି ଗଛ ଚିହ୍ନଟ ହୋଇଥିଲା। ଏଥିରୁ ଏହି ମଞ୍ଜି ଏକ ବିଶେଷ ପ୍ରକାରର ତାଳଗଛ ବୋଲି ଜଣାପଡିଥିଲା। ତେବେ ଏହି ଗଛର ପ୍ରଜନନ ଖୁବ୍ ଧିମା ଓ କଠିନ ହୋଇଥାଏ। ଗୋଟିଏ ମଞ୍ଜିରୁ ଗଛଟିଏ ହେବା ପାଇଁ ୨୦-୪୦ ବର୍ଷ ସମୟ ଲାଗିଥାଏ। ଏହି ଗଛର ଫଳ ପାଚିବାକୁ ୬ରୁ ୭ ବର୍ଷ ସମୟ ଲାଗିଥାଏ।
