ଫିରିଙ୍ଗିଆ ୨/୬ କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକରେ ପ୍ରାଣୀ ସମ୍ପଦ ଚିକିତ୍ସା ସେବା ବର୍ତମାନ ବିପଦରେ । ବ୍ଲକରେ ଥିବା ମୁଖ୍ୟ ପ୍ରାଣୀ ସମ୍ପଦ କାର୍ଯ୍ୟାଳୟ ଭଙ୍ଗା ଦଦରା ଅବସ୍ଥାରେ ପଡିରହିଥିବା ବେଳେ ବ୍ଲକର ଗୋଚ୍ଛାପଡ଼ା, ପ୍ରାଣୀ ସମ୍ପଦ କାର୍ଯ୍ୟାଳୟ ମଧ୍ୟ ଦୟନୀୟ ଅବସ୍ଥାରେ ଗତି କରୁଛି l ଏହି ଗୋଛାପଡା ପ୍ରାଣୀ ସମ୍ପଦ ସହାୟକ କେନ୍ଦ୍ର ଗୃହ   କାର୍ଯ୍ୟାଳୟ କାହିଁ କେଉଁ କାଳରୁ ନିର୍ମାଣ କରାଯାଇଥିବା ବେଳେ ପାଞ୍ଚରୁ ଅଧିକ ଥର ମରାମତି କରାଯାଇଛି l ବର୍ତମାନ ପରିସ୍ଥିତିରେ କାର୍ଯ୍ୟାଳୟ ବିପଦ ପୂର୍ଣ୍ଣ ଅବସ୍ଥାରେ ରହିଛି । ଛାତ ଉପରେ ଜରି ପାଲ ଦେଇ କାର୍ଯ୍ୟାଳୟ ଚାଲିଥିବା ଦେଖିବାକୁ ମିଳିଛି । ଘର ଭିତରେ ସରକାରୀ କାଗଜ ପତ୍ର ଓ ଗଡ଼ରେଜ ମଧ୍ୟ ଜରି ପାଲ ଘୋଡାଇ ରଖାଯାଇଛି । ସେହିପରି ଚତୁର୍ପାଶ୍ୱ କାନ୍ଥ ଭାଙ୍ଗି ବିପଦପୂର୍ଣ୍ଣ ଭାବରେ ଫାଟି ଆଁ କଲାଣି । ଯାହାଦ୍ୱାରା କାର୍ଯ୍ୟାଳୟ ଭିତରେ ପଶିବା ମଧ୍ୟ ଜୀବନ ପ୍ରତି ବିପଦ ପୂର୍ଣ୍ଣ ରହିଛି l ତଥାପି ଜୀବନକୁ ବାଜି ଲଗାଇ କାର୍ଯ୍ୟାଳୟର ଭିଏସ ସ୍ୱସ୍ତିକ ପାଣିଗ୍ରାହୀ, ସହାୟିକା ସଶ୍ମିତା ପୃଷ୍ଟିଙ୍କ ସହ କାର୍ଯ୍ୟାଳୟର କର୍ମଚାରୀ ବହୁ ଅସୁବିଧାରେ ବିପଦପୂର୍ଣ୍ଣ ଭାବରେ ଚିକିତ୍ସା ସେବା ଯୋଗାଇ ଆସୁଛନ୍ତି l

ବର୍ତମାନ ବିଭାଗୀୟ ଅଧିକାରୀ ହେଉ କି ସରକାର ପ୍ରାଣୀ ସମ୍ପଦ ସୁରକ୍ଷାକୁ ଗୁରୁତ୍ୱ ଦେଉ ନଥିବାରୁ ବିପଦରେ ପ୍ରାଣୀ ସମ୍ପଦ ଓ କାର୍ଯ୍ୟାଳୟ କର୍ମଚାରୀ l ଅନ୍ୟପଟେ ଗତ ୨୨ - ୨୩ ମସିହାରେ ଗୋଚ୍ଛାପଡ଼ା ଠାରେ ପାଖାପାଖି ୧ କୋଟି  ଟଙ୍କା ବ୍ୟୟରେ ପ୍ରାଣୀ ସମ୍ପଦ ବିଭାଗର କାର୍ଯ୍ୟାଳୟ ଗୃହ ନିର୍ମାଣ ପାଇଁ ବ୍ୟୟ ବରାଦ ହେବା ସହ ଏହି କାର୍ଯ୍ୟକୁ ଜଣେ ଠିକାଦାରକୁ ଦିଆ ଯାଇଥିଲେ ମଧ୍ୟ ଠିକାଦାର କେବଳ କାମ ଆରମ୍ଭ କରି କେତୋଟି ପିଲର ଠିଆ କରି କାମ ଛାଡି କେଉଁ ଆଡେ ଉଭାନ ହୋଇଯାଇଛନ୍ତି । ଏହି ଘଟଣାରେ ତୁରନ୍ତ ପଦକ୍ଷେପ ଗ୍ରହଣ କରି କନ୍ଧମାଳ ଜିଲ୍ଲାପାଳ ଦୃଷ୍ଟି ଦେଇ ଠିକାଦାର ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରି ତୁରନ୍ତ କାର୍ଯ୍ୟାଳୟ ଗୃହ କୋଠା ନିର୍ମାଣ କରାଇବା ବ୍ୟବସ୍ଥା କଲେ ଏହାର ସମାଧାନ ହୋଇ ପାରିବ ବୋଲି ବୁଦ୍ଧିଜୀବୀ ମହଲରେ ଦାବି ହେଉଛି l