ନୂଆଦିଲ୍ଲୀ: ପରିବାରକୁ ଝୁରୁଛି ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ ଆତଙ୍କବାଦୀ ତହବୁର ରାଣା। ସେ ତାଙ୍କ ପରିବାର ସଦସ୍ୟଙ୍କ ସହ କଥା ହେବାକୁ ଚାହୁଁଛି ଏବଂ ଏଥିପାଇଁ ସେ NIA ସ୍ୱତନ୍ତ୍ର କୋର୍ଟରେ ଆବେଦନ କରିଛି । ସମ୍ପ୍ରତି ତାଙ୍କୁ ଆମେରିକାରୁ ଭାରତ ଅଣାଯାଇଥିଲା।

ରାଣାର ଆବେଦନ ଉପରେ ଦିଲ୍ଲୀର ଜଣେ ବିଚାରପତି ନୋଟିସ ଜାରି କରିଛନ୍ତି ଏବଂ ଜାତୀୟ ତଦନ୍ତ ସଂସ୍ଥା (NIA) ଠାରୁ ଜବାବ ମାଗିଛନ୍ତି। ସ୍ୱତନ୍ତ୍ର NIA କୋର୍ଟ ୨୩ ଏପ୍ରିଲରେ ଏହି ମାମଲାର ଶୁଣାଣି କରିବେ। ରାଣା ତାର ଓକିଲଙ୍କ ମାଧ୍ୟମରେ ସ୍ୱତନ୍ତ୍ର ବିଚାରପତି ହରଦୀପ କୌରଙ୍କ ନିକଟରେ ଏକ ଆବେଦନ ଦାଖଲ କରିଛି । ସୂଚନାଯୋଗ୍ୟ ଯେ ରାଣାକୁ ଭାରତ ଫେରାଇ ଆଣିବା ପରେ, ବିଳମ୍ବିତ ରାତିରେ କୋର୍ଟର ନିଷ୍ପତ୍ତି ଅନୁଯାୟୀ ତାକୁ ୧୮ ଦିନିଆ NIA ହେପାଜତକୁ ପଠାଯାଇଥିଲା।

ଆତଙ୍କବାଦୀ ରାଣାକୁ NIA ମୁଖ୍ୟାଳୟ ଭିତରେ କଡ଼ା ସୁରକ୍ଷା ମଧ୍ୟରେ ରଖାଯାଇଛି ଏବଂ ସିସିଟିଭି ମାଧ୍ୟମରେ ତା ଉପରେ ନଜର ରଖାଯାଇଛି। ରାଣାକୁ ଶାକାହାରୀ ଖାଦ୍ୟ ଦିଆଯାଉଛି ଏବଂ ତାକୁ ପର୍ଯ୍ୟାପ୍ତ ସମୟ ଶୋଇବାକୁ ଦିଆଯାଉଛି। ଏହା ସହିତ, ଅଧିକାରୀ ମାନେ ବିଶେଷ ଧ୍ୟାନ ଦେଇଛନ୍ତି ଯେ, ସେ ନିଜକୁ ଯେପରି କୌଣସି କ୍ଷତି ନ ପହଞ୍ଚାଉ।