ନୂଆଦିଲ୍ଲୀ,୨୪/୦୩: ଶିକ୍ଷାନୁଷ୍ଠାନରେ ଛାତ୍ରମାନଙ୍କ ଆତ୍ମହତ୍ୟା ଖବରକୁ ନେଇ ସୁପ୍ରିମକୋର୍ଟ ଉଦ୍ବେଗ ପ୍ରକାଶ କରିଛନ୍ତି। ସୋମବାର ସୁପ୍ରିମକୋର୍ଟ ଦିଲ୍ଲୀ ପୋଲିସକୁ ଆଇଆଇଟି-ଦିଲ୍ଲୀରେ ଦୁଇଜଣ ଏସସି / ଏସଟି ଛାତ୍ରଙ୍କ ଆତ୍ମହତ୍ୟା ଘଟଣାର ତଦନ୍ତ କରିବା ସହିତ ଏଫଆଇଆର ପଞ୍ଜିକରଣ କରିବାକୁ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ ଜେ.ବି ପାରଦୀୱାଲା ଏବଂ ଜଷ୍ଟିସ ଆର ମହାଦେବନଙ୍କ ଏକ ଖଣ୍ଡପୀଠ ଡେପୁଟି କମିଶନରଙ୍କୁ ଏଫଆଇଆର ପଞ୍ଜିକରଣ କରିବାକୁ ଏବଂ ସହକାରୀ ପୋଲିସ କମିଶନର ର୍ୟାଙ୍କ ଅଧିକାରୀଙ୍କୁ ନିଯୁକ୍ତ କରିବାକୁ ନିର୍ଦ୍ଦେଶ ଦେଇଛନ୍ତି। ଖଣ୍ଡପୀଠ କହିଛନ୍ତି ଯେ ଏହି ପ୍ରସଙ୍ଗରେ ଆମକୁ ଆଉ କିଛି କହିବାର ଆବଶ୍ୟକତା ନାହିଁ, କାରଣ କୌଣସି ଅପରାଧର ତଦନ୍ତ ପୋଲିସର ଅଧିକାର ଅଧୀନରେ ଅଛି।
ସୁପ୍ରିମକୋର୍ଟ କହିଛନ୍ତି ଯେ ଛାତ୍ରଛାତ୍ରୀଙ୍କ ସୁରକ୍ଷା ତଥା କଲ୍ୟାଣ ସୁନିଶ୍ଚିତ କରିବାର ଦାୟିତ୍ବ ପ୍ରତ୍ୟେକ ଶିକ୍ଷାନୁଷ୍ଠାନ ପ୍ରଶାସନର କାନ୍ଧରେ ରହିଛି। "ତେଣୁ, କ୍ୟାମ୍ପସରେ ଆତ୍ମହତ୍ୟା ଭଳି କକୌଣସି ଦୁର୍ଭାଗ୍ୟଜନକ ଘଟଣା ଘଟିଲେ ତୁରନ୍ତ ଉପଯୁକ୍ତ ପ୍ରଶାସନ ସହିତ ଏଫଆଇଆର ଦାଖଲ କରିବା ଏକ ସ୍ପଷ୍ଟ କର୍ତ୍ତବ୍ୟ ବୋଲି ସର୍ବୋଚ୍ଚ ନ୍ୟାୟାଳୟ କହିଛନ୍ତି। ସେ ଏହା ମଧ୍ୟ କହିଛନ୍ତି ଯ, ''ଏପରି କାର୍ଯ୍ୟ କେବଳ ଆଇନଗତ ବାଧ୍ୟତାମୂଳକ ନୁହେଁ ବରଂ ସ୍ୱଚ୍ଛତା, ଉତ୍ତରଦାୟିତ୍ୱ ଏବଂ ନ୍ୟାୟ ନିଶ୍ଚିତ କରିବା ପାଇଁ ଏକ ନୈତିକ ଆବଶ୍ୟକତା ଅଟେ। " ଏଥିସହ, କୌଣସି ବିଳମ୍ବ କିମ୍ବା ଅସ୍ୱୀକାର ନକରି ଏଫ୍ଆଇଆର୍ ପଞ୍ଜିକରଣ କରି ତତ୍ପରତା ଏବଂ ଦାୟିତ୍ବ ସହିତ କାର୍ଯ୍ୟ କରିବା ପୋଲିସ୍ ଅଧିକାରୀଙ୍କ ଦାୟିତ୍ବ ଅଟେ। ”
ସୁପ୍ରିମକୋର୍ଟ କହିଛନ୍ତି ଯେ ଏଭଳି ଦୁଃଖଦ ଘଟଣାକୁ ରୋକିବା ଏବଂ ସାମାଜିକ ଅନୁଷ୍ଠାନଗୁଡ଼ିକରେ ବିଶ୍ୱାସ ବଜାୟ ରଖିବା ପାଇଁ ଶିକ୍ଷାନୁଷ୍ଠାନ ଏବଂ ଆଇନ ଶୃଙ୍ଖଳା ସଂସ୍ଥା ଦ୍ୱାରା ଏହି ଦାୟିତ୍ୱଗୁଡିକର ସଠିକ୍ ଯାଞ୍ଚ ଆବଶ୍ୟକ। ଛାତ୍ରମାନଙ୍କ ମାନସିକ ସ୍ବାସ୍ଥ୍ୟ ସମସ୍ୟାର ସମାଧାନ ତଥା ଉଚ୍ଚଶିକ୍ଷା ପ୍ରତିଷ୍ଠାନରେ ଆତ୍ମହତ୍ୟାକୁ ରୋକିବା ପାଇଁ ସର୍ବୋଚ୍ଚ ନ୍ୟାୟାଳୟ ଏକ ଜାତୀୟ ଟାସ୍କ ଫୋର୍ସ ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି। ପୂର୍ବତନ ସର୍ବୋଚ୍ଚ ନ୍ୟାୟାଳୟ ଜଷ୍ଟିସ ଏସ ରବିନ୍ଦ୍ର ଭଟ ଏହି ଦଳର ନେତୃତ୍ୱ ନେବେ। ସର୍ବୋଚ୍ଚ ଅଦାଲତ ତାଙ୍କ ନିର୍ଦ୍ଦେଶରେ କହିଛନ୍ତି ଯେ ଆମେ ସମସ୍ତ ରାଜ୍ୟ / କେନ୍ଦ୍ରଶାସିତ ଅଞ୍ଚଳର ମୁଖ୍ୟ ସଚିବମାନଙ୍କୁ ଯୁଗ୍ମ ସଚିବ ସ୍ତରର ଅଧିକାରୀମାନଙ୍କୁ ସେମାନଙ୍କ ରାଜ୍ୟ / କେନ୍ଦ୍ରଶାସିତ ଅଞ୍ଚଳର ଉଚ୍ଚଶିକ୍ଷା ବିଭାଗରେ ନୋଡାଲ ଅଧିକାରୀ ଭାବରେ ମନୋନୀତ କରିବାକୁ ନିର୍ଦ୍ଦେଶ ଦେଉଛୁ।
